ആലപ്പുഴ പള്ളിത്തോടിൽ മകൻ അമ്മയുടെ മൃതദേഹം ആരുമറിയാതെ വീടിന് മുന്നിൽ സംസ്കരിച്ച സംഭവം കൊലപാതകമല്ലെന്ന് പോലീസ് വ്യക്തമാക്കി. മരിച്ച രാധയുടെ (75) പോസ്റ്റ്മോർട്ടം റിപ്പോർട്ട് പുറത്തുവന്നതോടെയാണ് മരണത്തിലെ ദുരൂഹതകൾ നീങ്ങിയത്. വാർധക്യസഹജമായ അസുഖങ്ങളെത്തുടർന്നുള്ള സ്വാഭാവിക മരണമാണ് ഇതെന്നാണ് പോസ്റ്റ്മോർട്ടം കണ്ടെത്തൽ. ഇതോടെ, അമ്മയെ കൊലപ്പെടുത്തിയതാണെന്ന സംശയത്തിൽ പോലീസ് കസ്റ്റഡിയിലെടുത്ത മകൻ ഗിരീഷിനെ (49) വിട്ടയയ്ക്കും.
രാധയുടെ ശരീരത്തിൽ ആന്തരികമായ ക്ഷതങ്ങളോ മുറിവുകളോ കണ്ടെത്താനായിട്ടില്ലെന്ന് റിപ്പോർട്ടിൽ പറയുന്നു. ശാരീരികമായ ആക്രമണങ്ങൾ നടന്നതിന്റെ ലക്ഷണങ്ങളൊന്നും മൃതദേഹത്തിൽ ഉണ്ടായിരുന്നില്ല. കഴിഞ്ഞ ദിവസം മൃതദേഹം പുറത്തെടുത്ത് നടത്തിയ വിശദമായ പരിശോധനയിലാണ് മരണകാരണം വ്യക്തമായത്. ഇതോടെ ഗിരീഷിനെതിരെയുള്ള കൊലപാതക സംശയം പോലീസ് തള്ളിക്കളഞ്ഞു.
Also Read: ഒഡീഷയിൽ നിന്ന് കഞ്ചാവെത്തിച്ച് വിൽപന; കുപ്രസിദ്ധ ക്രിമിനൽ സംഘം ആലപ്പുഴയിൽ വലയിൽ
കഴിഞ്ഞ ചൊവ്വാഴ്ച വൈകീട്ടോടെയാണ് നാട്ടുകാരെ നടുക്കിയ സംഭവം പുറംലോകമറിഞ്ഞത്. ചൊവ്വാഴ്ച രാവിലെ അമ്മ മരിച്ചെന്നും ആരെയും അറിയിക്കാതെ വീടിന് മുന്നിൽ താൻ തന്നെ കുഴിയെടുത്ത് സംസ്കരിച്ചെന്നും ഗിരീഷ് നാട്ടുകാരോട് വെളിപ്പെടുത്തുകയായിരുന്നു. ഗിരീഷ് മദ്യപിച്ച് അമ്മയുമായി നിരന്തരം വഴക്കുണ്ടാക്കാറുള്ള വ്യക്തിയായതിനാൽ നാട്ടുകാർക്ക് കൊലപാതകമാണെന്ന സംശയം തോന്നി. തുടർന്ന് നാട്ടുകാർ പോലീസിനെ വിവരമറിയിക്കുകയായിരുന്നു.
പോലീസ് എത്തുമ്പോൾ ഗിരീഷ് കടുത്ത മദ്യലഹരിയിലായിരുന്നു. എങ്കിലും അമ്മയുടേത് സ്വാഭാവിക മരണമാണെന്നും താൻ കൊലപ്പെടുത്തിയതല്ലെന്നും ഇയാൾ പോലീസിനോട് ആവർത്തിച്ചു പറഞ്ഞു. തന്റെ വാദങ്ങൾ ശരിവെക്കുന്ന പോസ്റ്റ്മോർട്ടം റിപ്പോർട്ട് വന്നതോടെയാണ് ഗിരീഷിനെ പോലീസ് വിട്ടയയ്ക്കാൻ തീരുമാനിച്ചത്. മൃതദേഹം ആചാരപ്രകാരം സംസ്കരിക്കാതെ രഹസ്യമായി കുഴിച്ചുമൂടിയത് മദ്യലഹരിയിലായതിനാലാണെന്നാണ് പ്രാഥമിക നിഗമനം.
The post പള്ളിത്തോട് മൃതദേഹം കുഴിച്ചുമൂടിയ സംഭവം! രാധയുടേത് സ്വാഭാവിക മരണമെന്ന് പോലീസ് appeared first on Express Kerala.