തിരുവനന്തപുരം: കേരള രാഷ്ട്രീയവും കലാരംഗവും ഒരുപോലെ ഉറ്റുനോക്കുന്ന മുഖ്യമന്ത്രി പിണറായി വിജയനും മോഹൻലാലും ഒന്നിക്കുന്ന പ്രത്യേക അഭിമുഖം ‘കണ്ടും മിണ്ടിയും ഇരുവർ’ ഇന്ന് റിലീസ് ചെയ്യും. കഴിഞ്ഞ ദിവസം പുറത്തിറങ്ങിയ അഭിമുഖത്തിന്റെ ടീസർ ഇതിനോടകം തന്നെ സോഷ്യൽ മീഡിയയിൽ തരംഗമായിക്കഴിഞ്ഞു. മോഹൻലാലിന്റെ ഔദ്യോഗിക ഫേസ്ബുക്ക് പേജിലൂടെ മാത്രം 20 ലക്ഷത്തിലധികം പേരാണ് ടീസർ കണ്ടത്.
‘ജനങ്ങൾ നെഞ്ചിലേറ്റിയ, ജനങ്ങളെ നെഞ്ചിലേറ്റിയ രണ്ടുപേർ’ എന്ന ടാഗ്ലൈനോടെയാണ് അഭിമുഖം പുറത്തിറങ്ങുന്നത്. രാഷ്ട്രീയത്തിന് പുറമെ മുഖ്യമന്ത്രിയുടെ വ്യക്തിജീവിതം, അദ്ദേഹത്തിന് ഇഷ്ടപ്പെട്ട സിനിമകൾ, ആക്ഷൻ സിനിമകളോടുള്ള താൽപ്പര്യം തുടങ്ങിയ രസകരമായ കാര്യങ്ങളും അഭിമുഖത്തിലുണ്ട്. മുഖ്യമന്ത്രിയുടെ ഔദ്യോഗിക വസതിയായ ക്ലിഫ് ഹൗസിൽ രണ്ട് ദിവസമെടുത്താണ് അഭിമുഖം പൂർത്തിയാക്കിയത്. പ്രശസ്ത സംവിധായകൻ ടി.കെ. രാജീവ് കുമാറാണ് ഇതിന് പിന്നിൽ പ്രവർത്തിച്ചിരിക്കുന്നത്.
Also Read: ‘ഫ്രിദ സോമനായി’ രജിഷ വിജയൻ എത്തുന്നു; ഡിസ്റ്റോപ്യൻ ത്രില്ലർ ‘മസ്തിഷ്ക മരണം’ തിയേറ്ററുകളിലേക്ക്!
നിയമസഭാ തിരഞ്ഞെടുപ്പ് അടുത്തിരിക്കെ പുറത്തിറങ്ങുന്ന ഈ അഭിമുഖത്തെ പ്രതിപക്ഷം ‘പി.ആർ. സ്റ്റണ്ട്’ എന്ന് പരിഹസിക്കുമ്പോൾ, ഇത് ഇരുവരും തമ്മിലുള്ള വ്യക്തിപരമായ സൗഹൃദത്തിന്റെ ഭാഗമാണെന്ന് സി.പി.എം. വ്യക്തമാക്കുന്നു. മുൻ മുഖ്യമന്ത്രി ഉമ്മൻ ചാണ്ടിയും മോഹൻലാലും ഇതേ പേരിൽ നടത്തിയ അഭിമുഖം ഇതിനോടകം തന്നെ രാഷ്ട്രീയ കേന്ദ്രങ്ങളിൽ ചർച്ചകൾക്ക് വഴിമാറിയിട്ടുണ്ട്. അഭിമുഖത്തിന്റെ പൂർണ്ണരൂപം ഇന്ന് വൈകുന്നേരത്തോടെ വിവിധ ചാനലുകളിലും സോഷ്യൽ മീഡിയ പേജുകളിലും ലഭ്യമാകും.
The post മോഹൻലാൽ- പിണറായി വിജയൻ അഭിമുഖം ‘ഇരുവർ’ ഇന്ന് പുറത്തിറങ്ങും; ടീസർ തരംഗമായത് 20 ലക്ഷം കാഴ്ചക്കാരിലേക്ക്! appeared first on Express Kerala.