വാഹനാപകടങ്ങളിൽ പരിക്കേൽക്കുന്നവരെ എത്രയും വേഗം ആശുപത്രിയിലെത്തിച്ച് ജീവൻ രക്ഷിക്കാൻ സഹായിക്കുന്നവർക്ക് 25,000 രൂപ പാരിതോഷികം പ്രഖ്യാപിച്ച് ഡൽഹി സർക്കാർ. കേന്ദ്രസർക്കാരിന്റെ ‘ഗുഡ് സമ്മരിറ്റൻ’ പദ്ധതിയുടെ ഭാഗമായി ‘രാഹ് വീർ’ എന്ന പേരിലാണ് ഈ പദ്ധതി നടപ്പിലാക്കുന്നത്. അപകടം നടക്കുമ്പോൾ നിയമക്കുരുക്കുകൾ ഭയന്ന് പരിക്കേറ്റവരെ സഹായിക്കാൻ ആളുകൾ മടിക്കുന്നത് ഒഴിവാക്കാനും കൂടുതൽ പേരെ രക്ഷാപ്രവർത്തനത്തിലേക്ക് ആകർഷിക്കാനുമാണ് ഈ വമ്പിച്ച തുക പാരിതോഷികമായി പ്രഖ്യാപിച്ചിരിക്കുന്നത്.
സഹായം നൽകുന്നവരുടെ വിവരങ്ങൾ പരിശോധിക്കുന്നതിനായി ജില്ലാ മജിസ്ട്രേറ്റ്, മുതിർന്ന പോലീസ് ഉദ്യോഗസ്ഥൻ, ചീഫ് മെഡിക്കൽ ഓഫീസർ, ആർ.ടി.ഒ എന്നിവരടങ്ങുന്ന പ്രത്യേക സമിതി രൂപീകരിച്ചിട്ടുണ്ട്. ഈ സമിതിയുടെ ശുപാർശ പ്രകാരം തിരഞ്ഞെടുക്കപ്പെടുന്ന ഗുണഭോക്താക്കൾക്ക് സമ്മാനത്തുക നേരിട്ട് ബാങ്ക് അക്കൗണ്ടിലേക്ക് ഓൺലൈനായി കൈമാറും. സുതാര്യത ഉറപ്പുവരുത്താൻ കർശനമായ പരിശോധനകൾക്ക് ശേഷമായിരിക്കും പണം നൽകുക. അപകടത്തിന്റെ ആദ്യ മണിക്കൂറുകളിൽ വൈദ്യസഹായം ഉറപ്പാക്കി മരണനിരക്ക് കുറയ്ക്കുകയാണ് ഈ നീക്കത്തിലൂടെ സർക്കാർ ലക്ഷ്യമിടുന്നത്.
The post അപകടത്തിൽപ്പെട്ടവരെ സഹായിക്കാം, 25,000 രൂപ സമ്മാനം നേടാം; ഡൽഹിയിൽ പുതിയ പദ്ധതി appeared first on Express Kerala.