ചെന്നൈയിൽ നടക്കുന്ന ഇന്ത്യ-സിംബാബ്വെ ടി20 ലോകകപ്പ് സൂപ്പർ-8 പോരാട്ടം നേരിൽ കാണാനെത്തുന്ന ക്രിക്കറ്റ് പ്രേമികൾക്ക് ഇരട്ടി മധുരവുമായി ചെന്നൈ മെട്രോ റെയിൽ ലിമിറ്റഡ് (CMRL). തമിഴ്നാട് ക്രിക്കറ്റ് അസോസിയേഷനുമായി സഹകരിച്ച് സ്റ്റേഡിയത്തിലേക്ക് എത്തുന്ന പതിനായിരക്കണക്കിന് ആരാധകർക്ക് സൗജന്യ യാത്രയാണ് മെട്രോ പ്രഖ്യാപിച്ചിരിക്കുന്നത്. മത്സരത്തിനുള്ള ഫിസിക്കൽ ടിക്കറ്റുകൾ തന്നെ മെട്രോ ടിക്കറ്റുകളായി ഉപയോഗിക്കാം എന്നതാണ് ഇതിന്റെ പ്രത്യേകത. ടിക്കറ്റിലെ ക്യുആർ (QR) കോഡ് മെട്രോ സ്റ്റേഷനുകളിലെ ഓട്ടോമാറ്റിക് ഫെയർ കളക്ഷൻ ഗേറ്റുകളിൽ സ്കാൻ ചെയ്ത് യാത്രക്കാർക്ക് സുഗമമായി പ്രവേശിക്കാവുന്നതാണ്.
Also Read: ഓപ്പണറോ ഫിനിഷറോ? സഞ്ജുവിന്റെ ബാറ്റിംഗ് പൊസിഷനെച്ചൊല്ലി ആകാംക്ഷയിൽ ആരാധകർ
ഏതൊരു മെട്രോ സ്റ്റേഷനിൽ നിന്നും സ്റ്റേഡിയത്തിന് തൊട്ടടുത്തുള്ള ‘ഗവൺമെന്റ് എസ്റ്റേറ്റ്’ സ്റ്റേഷനിലേക്കും തിരിച്ചുമുള്ള ഒരു റൗണ്ട് ട്രിപ്പ് യാത്രയാണ് ആരാധകർക്ക് സൗജന്യമായി ലഭിക്കുക. മത്സരദിവസമായ ഫെബ്രുവരി 26-ന് മാത്രമായിരിക്കും ഈ ആനുകൂല്യം ലഭ്യമാകുക. ആരാധകരുടെ തിരക്ക് പരിഗണിച്ച് തടസ്സമില്ലാത്ത യാത്രാസൗകര്യം ഒരുക്കുന്നതിന്റെ ഭാഗമായാണ് ഈ വമ്പൻ പ്രഖ്യാപനം. “ലോകകപ്പ് പോരാട്ടം കാണാനെത്തുന്നവർക്ക് മികച്ച യാത്രാനുഭവം നൽകുന്നതിൽ ഞങ്ങൾക്ക് സന്തോഷമുണ്ട്” എന്ന് ചെന്നൈ മെട്രോ ഔദ്യോഗിക പ്രസ്താവനയിൽ അറിയിച്ചു.
രാത്രി വൈകി മത്സരം അവസാനിക്കുന്നത് കണക്കിലെടുത്ത് മെട്രോ ട്രെയിനുകളുടെ സമയം അർദ്ധരാത്രി 12 മണി വരെ നീട്ടിയിട്ടുണ്ട്. ഗവൺമെന്റ് എസ്റ്റേറ്റ് സ്റ്റേഷനിൽ നിന്നുള്ള അവസാന ട്രെയിനുകൾ രാത്രി 12 മണിക്ക് വിംകോ നഗർ ഡിപ്പോയിലേക്കും എയർപോർട്ട് ലൈനിലേക്കും പുറപ്പെടും. എന്നാൽ രാത്രി 11 മണിക്ക് ശേഷം ഗ്രീൻ ലൈനിലേക്ക് മാറാൻ ആഗ്രഹിക്കുന്നവർ ചെന്നൈ സെൻട്രൽ സ്റ്റേഷനിൽ വെച്ച് മാത്രമേ അതിന് സാധിക്കൂ എന്ന കാര്യം ശ്രദ്ധിക്കണം. അവസാന ട്രെയിൻ പുറപ്പെടുന്നതിന് 10 മിനിറ്റ് മുമ്പ് ഗവൺമെന്റ് എസ്റ്റേറ്റ് സ്റ്റേഷനിലേക്കുള്ള പ്രവേശനം അവസാനിപ്പിക്കുമെന്നും അധികൃതർ വ്യക്തമാക്കിയിട്ടുണ്ട്.
The post ക്രിക്കറ്റ് ആവേശത്തിന് മെട്രോയുടെ ‘ഫ്രീ ഹിറ്റ്’; ഇന്ത്യ-സിംബാബ്വെ പോരാട്ടം കാണാൻ ചെന്നൈ മെട്രോയിൽ യാത്ര സൗജന്യം! appeared first on Express Kerala.