പ്രധാനമന്ത്രി നരേന്ദ്ര മോദിയുടെ രണ്ടാമത് ഇസ്രായേൽ സന്ദർശനം ഇരുരാജ്യങ്ങളും തമ്മിലുള്ള തന്ത്രപ്രധാന ബന്ധത്തിൽ പുതിയൊരു അധ്യായം കുറിച്ചിരിക്കുകയാണ്. ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹുവുമായി നടത്തിയ കൂടിക്കാഴ്ചയിൽ പ്രതിരോധം, സാങ്കേതികവിദ്യ, കൃഷി തുടങ്ങിയ സുപ്രധാന മേഖലകളിൽ സഹകരണം വർദ്ധിപ്പിക്കാൻ തീരുമാനമായി. ഇരുരാജ്യങ്ങളും തമ്മിലുള്ള സ്വതന്ത്ര വ്യാപാര കരാർ ഉടൻ യാഥാർത്ഥ്യമാകുമെന്നും ഇന്ത്യയുടെ ഡിജിറ്റൽ പേയ്മെന്റ് സംവിധാനമായ യുപിഐ ഇസ്രയേലിലും ലഭ്യമാക്കുമെന്നും നേതാക്കൾ സംയുക്തമായി പ്രഖ്യാപിച്ചു.
സാങ്കേതിക-കാർഷിക മേഖലകളിൽ വിപ്ലവകരമായ മാറ്റങ്ങൾ ലക്ഷ്യമിട്ടുള്ള പദ്ധതികളാണ് സന്ദർശനത്തിന്റെ പ്രധാന ആകർഷണം. ബഹിരാകാശം, സിവിലിയൻ ന്യൂക്ലിയർ എനർജി എന്നീ മേഖലകളിൽ പുതിയ പങ്കാളിത്തം ഉറപ്പാക്കുന്നതിനൊപ്പം, ആധുനിക കൃഷിരീതികൾക്കായി ‘വില്ലേജസ് ഓഫ് എക്സലൻസ്’ പദ്ധതി വ്യാപിപ്പിക്കാനും ധാരണയായി. ഇതിന്റെ ഭാഗമായി ഇരുരാജ്യങ്ങളിലെയും മന്ത്രിമാർ പങ്കെടുക്കുന്ന ഗവൺമെന്റ്-ടു-ഗവൺമെന്റ് മീറ്റിംഗ് ഉടൻ ഇന്ത്യയിൽ വെച്ച് നടക്കും. ഇത് വരും വർഷങ്ങളിൽ സാമ്പത്തിക-ഫിൻടെക് മേഖലകളിൽ വലിയ കുതിച്ചുചാട്ടത്തിന് വഴിയൊരുക്കും.
സമാധാനത്തിനും നയതന്ത്രത്തിനും ഊന്നൽ നൽകിക്കൊണ്ടാണ് പ്രധാനമന്ത്രി തന്റെ നിലപാടുകൾ വ്യക്തമാക്കിയത്. ഗാസ സമാധാന പദ്ധതിയെ ഇന്ത്യ പിന്തുണയ്ക്കുന്നുവെന്നും യുദ്ധത്തേക്കാൾ എപ്പോഴും സമാധാനത്തിനാണ് ഇന്ത്യ മുൻഗണന നൽകുന്നതെന്നും അദ്ദേഹം പറഞ്ഞു. സന്ദർശനത്തിനിടെ ഇസ്രായേൽ പാർലമെന്റായ നെസെറ്റിന്റെ സ്പീക്കർ മെഡൽ പ്രധാനമന്ത്രിക്ക് സമ്മാനിച്ചു. ഇരുരാജ്യങ്ങളും തമ്മിലുള്ള ഹൃദയബന്ധം വരും വർഷങ്ങളിൽ കൂടുതൽ കരുത്താർജ്ജിക്കുമെന്ന് ബെഞ്ചമിൻ നെതന്യാഹു പ്രതികരിച്ചപ്പോൾ, ഈ പുരസ്കാരം 140 കോടി ഭാരതീയർക്കായി സമർപ്പിക്കുന്നുവെന്ന് മോദി വ്യക്തമാക്കി.
The post യുപിഐ മുതൽ പ്രതിരോധം വരെ! ഇസ്രായേലുമായി കൈകോർത്ത് ഇന്ത്യ: സ്വതന്ത്ര വ്യാപാര കരാർ ഉടൻ appeared first on Express Kerala.