ടി20 ലോകകപ്പിലെ നിർണായക മത്സരത്തിൽ സിംബാബ്വെക്കെതിരെ ഇന്ത്യ 256 റൺസിന്റെ കൂറ്റൻ സ്കോർ പടുത്തുയർത്തി. ടോസ് നഷ്ടപ്പെട്ട് ബാറ്റിംഗിനിറങ്ങിയ ഇന്ത്യക്കായി ഓപ്പണർ അഭിഷേക് ശർമ്മയും (55), അവസാന ഓവറുകളിൽ തകർത്തടിച്ച ഹാർദ്ദിക് പാണ്ഡ്യയും (50) അർധസെഞ്ചുറികൾ നേടി. ലോകകപ്പ് ചരിത്രത്തിൽ ഇന്ത്യ നേടുന്ന ഏറ്റവും ഉയർന്ന ടീം ടോട്ടലാണിത്. അഭിഷേകിനൊപ്പം ഇഷാൻ കിഷൻ (38), സൂര്യകുമാർ യാദവ് (33), തിലക് വർമ്മ (44) എന്നിവരുടെ തകർപ്പൻ ബാറ്റിംഗ് കൂടി ചേർന്നതോടെ ഇന്ത്യ നാല് വിക്കറ്റ് നഷ്ടത്തിൽ റൺമല തീർക്കുകയായിരുന്നു.
ആക്രമണശൈലിയിൽ ബാറ്റിംഗ് ആരംഭിച്ച സഞ്ജു സാംസൺ പവർപ്ലേയിൽ ഇന്ത്യക്ക് മികച്ച തുടക്കമാണ് നൽകിയത്. നേരിട്ട രണ്ടാം പന്തിൽ തന്നെ സിക്സർ പറത്തിയ സഞ്ജു, 15 പന്തിൽ 24 റൺസെടുത്ത് പുറത്തായി. മുസർബാനിയുടെ സ്ലോ ബോളിൽ സിക്സറിന് ശ്രമിച്ചാണ് സഞ്ജു മടങ്ങിയതെങ്കിലും അഭിഷേക് ശർമ്മയുമായി ചേർന്ന് 48 റൺസിന്റെ മികച്ച ഓപ്പണിംഗ് കൂട്ടുകെട്ട് അദ്ദേഹം സമ്മാനിച്ചു. ഈ ലോകകപ്പിൽ ഇന്ത്യയുടെ ഏറ്റവും മികച്ച ഓപ്പണിംഗ് പങ്കാളിത്തമാണിത്. സഞ്ജുവിന് ശേഷം ക്രീസിലെത്തിയ ഇഷാൻ കിഷനും ക്യാപ്റ്റൻ സൂര്യകുമാർ യാദവും സ്കോർ ബോർഡ് അതിവേഗം ചലിപ്പിച്ചു.
Also Read: സഞ്ജു നൽകി ‘വെടിക്കെട്ട്’ തുടക്കം, പക്ഷെ പാതിവഴിയിൽ വീണു; പവർ പ്ലേയിൽ സിംബാബ്വെയെ തകർത്ത് ഇന്ത്യ!
മത്സരത്തിന്റെ അവസാന ഓവറുകളിൽ ഹാർദ്ദിക് പാണ്ഡ്യയും തിലക് വർമ്മയും നടത്തിയ മിന്നൽ ആക്രമണമാണ് ഇന്ത്യൻ സ്കോർ 250 കടത്തിയത്. അവസാന അഞ്ച് ഓവറിൽ മാത്രം ഇരുവരും ചേർന്ന് 84 റൺസാണ് അടിച്ചെടുത്തത്. വെറും 23 പന്തിൽ 50 റൺസുമായി ഹാർദ്ദിക് പുറത്താകാതെ നിന്നപ്പോൾ, 16 പന്തിൽ 44 റൺസുമായി തിലക് വർമ്മ മികച്ച പിന്തുണ നൽകി. നാല് സിക്സറുകൾ വീതമാണ് ഇരുവരും ഇന്നിംഗ്സിൽ പറത്തിയത്. 257 റൺസ് എന്ന ഹിമാലയൻ ലക്ഷ്യം പിന്തുടരുന്ന സിംബാബ്വെക്ക് പന്തുകൊണ്ട് മറുപടി നൽകാനുള്ള തയ്യാറെടുപ്പിലാണ് ഇന്ത്യ.
The post സിംബാബ്വെയെ റൺമലയിൽ മൂടി ഇന്ത്യ; പാണ്ഡ്യക്കും അഭിഷേകിനും അർധസെഞ്ചുറി, ലോകകപ്പിൽ റെക്കോർഡ് സ്കോർ! appeared first on Express Kerala.