നിക്ഷേപകരെ തെറ്റിദ്ധരിപ്പിക്കാതിരിക്കാൻ മ്യൂച്വൽ ഫണ്ട് സ്കീമുകളുടെ പേരുകൾ ലളിതമാക്കണമെന്നാണ് സെബിയുടെ പ്രധാന നിർദ്ദേശം. ഇനി മുതൽ ഓരോ ഫണ്ടിന്റെയും പേര് അത് ഉൾപ്പെടുന്ന കാറ്റഗറിയെ സൂചിപ്പിക്കുന്നതാകണം. ഉദാഹരണത്തിന്, മുൻപ് ‘ബ്ലൂചിപ്’ എന്നൊക്കെ വിളിച്ചിരുന്ന ഫണ്ടുകൾ ഇനി മുതൽ നിർബന്ധമായും ‘ലാർജ് ക്യാപ് ഫണ്ട്’ എന്ന് തന്നെ അറിയപ്പെടണം. നിക്ഷേപത്തിൽ നിന്നുള്ള ലാഭത്തെയോ വരുമാനത്തെയോ സൂചിപ്പിക്കുന്ന ആകർഷകമായ വാക്കുകൾ പേരുകൾക്കൊപ്പം ഉപയോഗിക്കരുതെന്നും സെബി കർശനമായി നിർദ്ദേശിച്ചിട്ടുണ്ട്.
പുതിയ കാറ്റഗറികളും മാറ്റങ്ങളും
മ്യൂച്വൽ ഫണ്ട് സ്കീമുകളെ സെബി പ്രധാനമായും അഞ്ച് വിഭാഗങ്ങളായിട്ടാണ് തരംതിരിച്ചിരിക്കുന്നത്. ഇക്വിറ്റി, ഡെറ്റ്, ഹൈബ്രിഡ്, പുതുതായി ഉൾപ്പെടുത്തിയ ലൈഫ് സൈക്കിൾ ഫണ്ട്, മറ്റുള്ളവ (ഇൻഡക്സ് ഫണ്ട്, ETF, FoF) എന്നിവയാണവ. നിക്ഷേപകർക്ക് കാര്യമായ പ്രയോജനമില്ലെന്ന് കണ്ടെത്തിയതിനെ തുടർന്ന് ‘സൊല്യൂഷൻ ഓറിയന്റഡ്’ സ്കീമുകൾ സെബി നിർത്തലാക്കി. ഈ വിഭാഗത്തിലുള്ള പുതിയ സബ്സ്ക്രിപ്ഷനുകൾ നിരോധിച്ചതിനാൽ, ഇത്തരം ഫണ്ടുകൾ മറ്റ് വിഭാഗങ്ങളിലേക്ക് ലയിപ്പിക്കേണ്ടി വരും.
Also Read: മാറിമറിഞ്ഞ് സ്വർണവില; സംസ്ഥാനത്ത് ഇന്ന് പവന് 400 രൂപ വർധിച്ചു; വെള്ളി വിലയിൽ ഇടിവ്
പോർട്ട്ഫോളിയോ ഓവർലാപ്പ് നിയന്ത്രണം
ഒരേ ഫണ്ട് ഹൗസിന് കീഴിലുള്ള വിവിധ സ്കീമുകൾ ഒരേ ഓഹരികളിൽ തന്നെ നിക്ഷേപിക്കുന്നത് ഒഴിവാക്കാൻ സെബി ‘പോർട്ട്ഫോളിയോ ഓവർലാപ്പ്’ 50 ശതമാനമായി പരിമിതപ്പെടുത്തി. അതായത് ഒരു തീമാറ്റിക് സ്കീമിലെ നിക്ഷേപങ്ങൾ മറ്റ് സ്കീമുകളുമായി 50 ശതമാനത്തിലധികം സാമ്യമുള്ളതാകാൻ പാടില്ല. വാല്യൂ, കോൺട്രാ ഫണ്ടുകൾക്കും ഈ നിയമം ബാധകമാണ്. ഈ മാനദണ്ഡം പാലിക്കാൻ തീമാറ്റിക് ഫണ്ടുകൾക്ക് മൂന്ന് വർഷവും മറ്റ് ഫണ്ടുകൾക്ക് ആറ് മാസവും സമയപരിധി അനുവദിച്ചിട്ടുണ്ട്. നിശ്ചിത സമയത്തിനുള്ളിൽ മാറ്റം വരുത്താത്ത ഫണ്ടുകൾ ലയിപ്പിക്കാൻ സെബി നിർദ്ദേശിച്ചു.
ആർബിട്രേജ് ഫണ്ടുകളിലെ പരിഷ്കാരം
ആർബിട്രേജ് ഫണ്ടുകളുടെ നിക്ഷേപ രീതിയിലും സെബി പുതിയ വ്യവസ്ഥകൾ കൊണ്ടുവന്നു. ഈ വിഭാഗത്തിലെ കടപ്പത്ര നിക്ഷേപം ഇനി മുതൽ ഒരു വർഷത്തിൽ താഴെ കാലാവധിയുള്ള സർക്കാർ സെക്യൂരിറ്റികളിൽ മാത്രമായി പരിമിതപ്പെടുത്തണം. സെക്യൂരിറ്റീസ് ട്രാൻസാക്ഷൻ ടാക്സ് വർധിച്ചതും പുതിയ നിക്ഷേപ നിയന്ത്രണങ്ങളും കാരണം ഇത്തരം ഫണ്ടുകളിൽ നിന്നുള്ള വരുമാനത്തിൽ 30 മുതൽ 40 ബേസിസ് പോയിന്റ് വരെ കുറവുണ്ടായേക്കാമെന്ന് വിപണി വിദഗ്ധർ വിലയിരുത്തുന്നു.
The post മ്യൂച്വൽ ഫണ്ട് നിക്ഷേപകർക്ക് ആശ്വാസം; പേരുകളിലും കാറ്റഗറികളിലും വൻ മാറ്റങ്ങളുമായി സെബി appeared first on Express Kerala.