ആരോഗ്യകാര്യങ്ങളിൽ ഏറെ ശ്രദ്ധാലുക്കളെന്ന് അവകാശപ്പെടുന്ന മലയാളികളെ ആശങ്കയിലാഴ്ത്തി പുതിയ പഠന റിപ്പോർട്ട്. ഇന്ത്യയിൽ ഏറ്റവും കൂടുതൽ കുടവയറുള്ളവർ താമസിക്കുന്നത് കേരളത്തിലാണെന്ന് ഇന്ത്യൻ കൗൺസിൽ ഓഫ് മെഡിക്കൽ റിസർച്ചും ഇന്ത്യ ഡയബെറ്റിസും സംയുക്തമായി നടത്തിയ പഠനം വ്യക്തമാക്കുന്നു.
പതിറ്റാണ്ടിലേറെ നീണ്ടുനിന്ന പഠനത്തിനൊടുവിൽ പുറത്തുവന്ന റിപ്പോർട്ട് പ്രകാരം കേരളത്തിലെ 58.02 ശതമാനം ആളുകൾക്കും കുടവയറുണ്ട്. അതായത് പത്തിൽ ആറ് മലയാളികളും ഈ ഗണത്തിൽപ്പെടുന്നു.
Also Read: കാണാൻ എന്ത് ചന്തം! ലോകത്തിലെ ഏറ്റവും ‘ക്യൂട്ടായ’ വിരുതന്മാർ ഇതാ…
അമിതവണ്ണത്തിലും കേരളം പിന്നിലല്ല
അമിതവണ്ണത്തിന്റെ കാര്യത്തിൽ രാജ്യത്ത് രണ്ടാം സ്ഥാനത്താണ് കേരളം. കേരളത്തിലെ 43.6 ശതമാനം ആളുകൾ അമിതവണ്ണമുള്ളവരാണെന്ന് കേന്ദ്ര ആരോഗ്യ മന്ത്രാലയം പാർലമെന്റിൽ സമർപ്പിച്ച റിപ്പോർട്ടിൽ പറയുന്നു. 45.9 ശതമാനവുമായി പുതുച്ചേരി മാത്രമാണ് ഈ പട്ടികയിൽ കേരളത്തിന് മുന്നിലുള്ളത്.
ദേശീയ ശരാശരിയേക്കാൾ വളരെ ഉയർന്ന നിരക്കാണ് കേരളത്തിലേത് എന്നത് ആരോഗ്യ വിദഗ്ധരെ ആശങ്കപ്പെടുത്തുന്നു. ഇന്ത്യയിലെ കുടവയറിന്റെ ദേശീയ ശരാശരി 39.5 ശതമാനവും അമിതവണ്ണത്തിന്റേത് 28.6 ശതമാനവുമാണ്.
കുടവയർ അളക്കുന്നത് എങ്ങനെ?
പഠന റിപ്പോർട്ട് പ്രകാരം കുടവയർ നിശ്ചയിക്കുന്നതിനുള്ള മാനദണ്ഡങ്ങൾ താഴെ പറയുന്നവയാണ്.
പുരുഷന്മാർ: അരക്കെട്ടിന്റെ ചുറ്റളവ് 90 സെന്റിമീറ്ററിൽ (35 ഇഞ്ച്) കൂടുതൽ.
സ്ത്രീകൾ: അരക്കെട്ടിന്റെ ചുറ്റളവ് 80 സെന്റിമീറ്ററിൽ (31 ഇഞ്ച്) കൂടുതൽ.
വിവാഹിതരായ ദമ്പതികളുടെ ഇടയിലെ അമിതവണ്ണത്തിന്റെ കാര്യത്തിലും കേരളം ഏറെ മുന്നിലാണ്. സംസ്ഥാനത്തെ വിവാഹിതരിൽ 51.3 ശതമാനം പേരും അമിതവണ്ണമുള്ളവരാണ്.
വില്ലനാകുന്നത് മാറുന്ന ജീവിതശൈലി
അനാരോഗ്യകരമായ ഭക്ഷണരീതികൾ, കഠിനമായ വ്യായാമത്തിന്റെ കുറവ്, മണിക്കൂറുകളോളം ഇരുന്നുള്ള ജോലി എന്നിവയാണ് മലയാളികളെ ഈ അവസ്ഥയിലേക്ക് നയിക്കുന്നതെന്ന് പഠനം ചൂണ്ടിക്കാട്ടുന്നു. വെറുമൊരു ശാരീരിക മാറ്റം എന്നതിലുപരി, അമിതവണ്ണത്തെ ഗൗരവകരമായ ഒരു രോഗാവസ്ഥയായാണ് ആധുനിക വൈദ്യശാസ്ത്രം കാണുന്നത്. ഭാവിയിൽ പ്രമേഹം, ഹൃദയസംബന്ധമായ അസുഖങ്ങൾ, ഉയർന്ന രക്തസമ്മർദ്ദം എന്നിവ വർധിക്കാൻ ഇത് കാരണമാകുമെന്ന് റിപ്പോർട്ട് മുന്നറിയിപ്പ് നൽകുന്നു.
NB: ഈ വാർത്തയിൽ ഉപയോഗിച്ചിരിക്കുന്ന ചിത്രം പ്രതീകാത്മകമാണ്. (Generated by AI)
The post വയർ തള്ളി മലയാളി; കുടവയറന്മാരുടെ എണ്ണത്തിൽ കേരളം ‘നമ്പർ വൺ’! appeared first on Express Kerala.