സ്മാർട്ട്ഫോൺ പ്രേമികൾ ആകാംക്ഷയോടെ കാത്തിരിക്കുന്ന വിവോയുടെ പുത്തൻ ഫ്ലാഗ്ഷിപ്പ് മോഡലായ ‘വിവോ X300 അൾട്രാ’ അടുത്ത മാസം ബാഴ്സലോണയിൽ നടക്കുന്ന മൊബൈൽ വേൾഡ് കോൺഗ്രസിൽ (MWC 2026) പ്രദർശിപ്പിക്കും. മാർച്ച് 2 മുതൽ 5 വരെ നടക്കുന്ന ചടങ്ങിൽ വെച്ച് ഈ പ്രീമിയം ഫോണിനെ കമ്പനി ലോകത്തിന് മുന്നിൽ പരിചയപ്പെടുത്തും. നിലവിൽ വിപണിയിലുള്ള X300, X300 പ്രോ മോഡലുകളേക്കാൾ കരുത്തുറ്റ ഹാർഡ്വെയറും നൂതനമായ ക്യാമറ സംവിധാനങ്ങളുമായിരിക്കും അൾട്രാ മോഡലിന്റെ പ്രധാന ആകർഷണം.
ഇത്തവണ ചൈനയ്ക്ക് പുറമെ ആഗോള വിപണിയിലും X300 അൾട്രാ ലോഞ്ച് ചെയ്യുമെന്ന സൂചനകൾ വലിയ ആവേശമാണ് ഉണ്ടാക്കിയിരിക്കുന്നത്. ഷവോമി 17 അൾട്രാ, ഒപ്പോ ഫൈൻഡ് X9 അൾട്രാ തുടങ്ങിയ കരുത്തൻമാരുമായാണ് വിവോ വിപണിയിൽ ഏറ്റുമുട്ടുക. ഫെബ്രുവരി 28-ന് ഷവോമി തങ്ങളുടെ അൾട്രാ മോഡൽ പുറത്തിറക്കാനിരിക്കെ, തൊട്ടുപിന്നാലെ മാർച്ച് ആദ്യവാരം വിവോ നടത്തുന്ന ഈ പടയൊരുക്കം സ്മാർട്ട്ഫോൺ വിപണിയിൽ വലിയ ചലനങ്ങൾ സൃഷ്ടിക്കുമെന്ന് ഉറപ്പാണ്.
ഇന്ത്യൻ വിപണിയിലേക്കും ഈ ഫ്ലാഗ്ഷിപ്പ് ഫോൺ എത്തുമെന്നാണ് ലഭിക്കുന്ന സൂചനകൾ. ഫോണിന്റെ ഡിസൈനെയോ കൃത്യമായ ക്യാമറ സെൻസറുകളെയോ കുറിച്ചുള്ള ഔദ്യോഗിക വിവരങ്ങൾ കമ്പനി ഇതുവരെ പുറത്തുവിട്ടിട്ടില്ലെങ്കിലും, വിവോയുടെ വിഖ്യാതമായ ക്യാമറ മികവ് X300 അൾട്രായിൽ അതിന്റെ പൂർണ്ണതയിൽ എത്തുമെന്നാണ് പ്രതീക്ഷിക്കുന്നത്. വരും മാസങ്ങളിൽ പ്രീമിയം ഫോൺ വിപണിയിൽ വിവോയും ഷവോമിയും തമ്മിലുള്ള കടുത്ത പോരാട്ടത്തിനാകും ലോകം സാക്ഷ്യം വഹിക്കുക.
The post ക്യാമറ വിപ്ലവവുമായി വിവോ X300 അൾട്രാ വരുന്നു! appeared first on Express Kerala.