കുവൈത്തിൽ ഗതാഗത നിയമലംഘകർക്കെതിരെ കർശന നടപടികളുമായി ജനറൽ ട്രാഫിക് ഡിപ്പാർട്ട്മെന്റ്. കഴിഞ്ഞ ഒരാഴ്ചയ്ക്കിടെ രാജ്യത്തിന്റെ വിവിധ ഭാഗങ്ങളിൽ നടത്തിയ പരിശോധനയിൽ 27,000-ത്തിലധികം നിയമലംഘനങ്ങളാണ് കണ്ടെത്തിയത്. നിയമലംഘനങ്ങളിൽ ഏർപ്പെടുന്ന പ്രവാസികൾക്ക് നാടുകടത്തൽ ഉൾപ്പെടെയുള്ള കടുത്ത ശിക്ഷാ നടപടികൾ നേരിടേണ്ടി വരുമെന്ന് അധികൃതർ വ്യക്തമാക്കി. ഗതാഗത സുരക്ഷ ഉറപ്പാക്കുന്നതിന്റെ ഭാഗമായി വരും ദിവസങ്ങളിലും പരിശോധനകൾ തുടരാനാണ് തീരുമാനം.
കഴിഞ്ഞ ഏഴ് ദിവസത്തിനിടെ രാജ്യത്ത് 1,770 വാഹനാപകടങ്ങളാണ് റിപ്പോർട്ട് ചെയ്തത്. ഇതിൽ 256 അപകടങ്ങൾ അതീവ ഗുരുതരമായ സ്വഭാവത്തിലുള്ളവയായിരുന്നു. അമിതവേഗത, അശ്രദ്ധമായ ഡ്രൈവിംഗ്, വാഹനമോടിക്കുന്നതിനിടയിലെ മൊബൈൽ ഫോൺ ഉപയോഗം എന്നിവയാണ് പ്രധാനമായും അപകടങ്ങളിലേക്ക് നയിക്കുന്നത്. ഗുരുതരമായ നിയമലംഘനങ്ങൾ നടത്തിയ നിരവധി കാറുകളും മോട്ടോർ സൈക്കിളുകളും ട്രാഫിക് വിഭാഗം പിടിച്ചെടുത്തിട്ടുണ്ട്.
Also Read: അശ്രദ്ധമായ നടത്തത്തിന് വിട; ഷാർജയിൽ ട്രാഫിക് പരിശോധന ശക്തമാക്കി പോലീസ്
നിയമലംഘനം നടത്തിയ നിരവധി പ്രവാസികളെ ഇതിനോടകം അറസ്റ്റ് ചെയ്യുകയും തുടർനടപടികൾക്കായി ബന്ധപ്പെട്ട വകുപ്പുകൾക്ക് കൈമാറുകയും ചെയ്തു. അത്യാധുനിക ക്യാമറകളും നൂതന സാങ്കേതിക വിദ്യകളും ഉപയോഗിച്ച് നിരീക്ഷണം കൂടുതൽ ശക്തമാക്കാനാണ് ട്രാഫിക് വിഭാഗത്തിന്റെ നീക്കം. റോഡ് സുരക്ഷാ നിയമങ്ങൾ കർശനമായി പാലിക്കണമെന്നും അല്ലാത്തപക്ഷം വിട്ടുവീഴ്ചയില്ലാത്ത നടപടികൾ ഉണ്ടാകുമെന്നും അധികൃതർ ആവർത്തിച്ചു വ്യക്തമാക്കി.
The post കുവൈത്തിൽ ഗതാഗത പരിശോധന കർശനം! ഒരാഴ്ചയ്ക്കിടെ 27,000 നിയമലംഘനങ്ങൾ, മുന്നറിയിപ്പ് appeared first on Express Kerala.