ശബരിമല ആക്ടിവിസം കാണിക്കാനുള്ള ഇടമല്ലെന്നും വിശ്വാസി സമൂഹത്തിന്റെ താൽപ്പര്യങ്ങൾ സംരക്ഷിച്ചുകൊണ്ട് മാത്രമേ സുപ്രീംകോടതിയിൽ സത്യവാങ്മൂലം നൽകുകയുള്ളൂവെന്നും മന്ത്രി വി.എൻ. വാസവൻ വ്യക്തമാക്കി. ഇക്കാര്യത്തിൽ മുൻ ദേവസ്വം മന്ത്രി കടകംപള്ളി സുരേന്ദ്രൻ സ്വീകരിച്ച നിലപാട് ശരിയാണെന്നും അദ്ദേഹം കൂട്ടിച്ചേർത്തു. പൊതുവായ നിലപാടെടുത്ത് മുന്നോട്ട് പോകണമെന്നാണ് സർക്കാർ ആഗ്രഹിക്കുന്നതെന്നും വിശ്വാസികളുടെ വികാരങ്ങളെ വ്രണപ്പെടുത്തുന്ന ഒരു തീരുമാനവും സർക്കാരിന്റെ ഭാഗത്തുനിന്നുണ്ടാകില്ലെന്നും മന്ത്രി കൊച്ചിയിൽ പറഞ്ഞു.
കഴിഞ്ഞ മണ്ഡലകാലത്ത് ശബരിമലയിൽ ആചാരാനുഷ്ഠാനങ്ങൾ ലംഘിക്കാൻ ഒരിടത്തും അവസരം നൽകിയിട്ടില്ലെന്ന് മന്ത്രി ചൂണ്ടിക്കാട്ടി. മുഖ്യമന്ത്രിയും നിയമമന്ത്രിയും നേരത്തെ വ്യക്തമാക്കിയതുപോലെ വിശ്വാസികളെ കൂടെനിർത്തിയുള്ള നടപടികളാണ് സർക്കാർ സ്വീകരിക്കുന്നത്. ശബരിമലയിൽ ആക്ടിവിസം നടപ്പാക്കേണ്ടതില്ലെന്ന കടകംപള്ളി സുരേന്ദ്രന്റെ മുൻ പ്രസ്താവനയെ ശരിവെച്ചുകൊണ്ടാണ് വാസവൻ സർക്കാരിന്റെ നിലപാട് ആവർത്തിച്ചത്.
ശബരിമല സന്നിധാനത്തെ സ്വർണ്ണം ഇളക്കിമാറ്റുന്നതുമായി ബന്ധപ്പെട്ട വിവാദങ്ങളിലും മന്ത്രി മറുപടി നൽകി. തന്ത്രിയുടെ അറിവോ സമ്മതമോ ഇല്ലാതെ സന്നിധാനത്ത് നിന്ന് യാതൊന്നും നീക്കം ചെയ്യാൻ സാധിക്കില്ലെന്നത് സാമാന്യബുദ്ധിയുള്ള ആർക്കും മനസ്സിലാക്കാവുന്ന കാര്യമാണെന്ന് അദ്ദേഹം പറഞ്ഞു. ക്ഷേത്രത്തിലെ ആചാരപരമായ കാര്യങ്ങളിൽ തന്ത്രിയ്ക്കുള്ള പരമാധികാരത്തെ മാനിക്കണമെന്നും ഇത്തരം കാര്യങ്ങൾ എല്ലാവരും മനസ്സിലാക്കി വെക്കണമെന്നും അദ്ദേഹം കൂട്ടിച്ചേർത്തു.
The post തന്ത്രി അറിയാതെ ഒന്നും നടക്കില്ല! ശബരിമല ആക്ടിവിസം കാണിക്കാനുള്ള ഇടമല്ല; കടകംപള്ളി പറഞ്ഞത് ശരിയെന്ന് വി.എൻ. വാസവൻ appeared first on Express Kerala.