ഇറാനെതിരായ സൈനിക നടപടി വരും ദിവസങ്ങളിലും തുടരുമെന്ന ശക്തമായ മുന്നറിയിപ്പുമായി അമേരിക്കൻ പ്രസിഡന്റ് ഡോണൾഡ് ട്രംപ്. ഫ്ലോറിഡയിലെ മാർ-എ-ലാഗോ വസതിയിൽ വെച്ച് പെന്റഗൺ മേധാവി പീറ്റ് ഹെഗ്സെത്ത്, സംയുക്ത സൈനിക മേധാവി ഡാൻ കെയ്ൻ എന്നിവരുമായി നടത്തിയ കൂടിക്കാഴ്ചയ്ക്ക് ശേഷമാണ് ട്രംപ് നിലപാട് വ്യക്തമാക്കിയത്. ഇറാൻ ഭരണകൂടത്തെ താഴെയിറക്കുക എന്ന ലക്ഷ്യത്തോടെയുള്ള ഈ സൈനിക നീക്കം പെട്ടെന്ന് അവസാനിക്കില്ലെന്നും കൃത്യമായ ലക്ഷ്യങ്ങൾ കൈവരിക്കുന്നത് വരെ പോരാട്ടം തുടരുമെന്നും ട്രംപ് ആവർത്തിച്ചു. ഇറാൻ സൈന്യം ഉടനടി ആയുധം താഴെ വെക്കണമെന്നും അല്ലാത്തപക്ഷം കനത്ത പ്രത്യാഘാതങ്ങൾ നേരിടേണ്ടി വരുമെന്നും അദ്ദേഹം മുന്നറിയിപ്പ് നൽകി.
ഇറാൻ ജനതയുടെ സ്വാതന്ത്ര്യമാണ് തന്റെ പ്രഥമ ലക്ഷ്യമെന്ന് വ്യക്തമാക്കിയ ട്രംപ്, ഇറാൻ റെവല്യൂഷനറി ഗാർഡിന് നേരെ ‘കീഴടങ്ങുക അല്ലെങ്കിൽ മരണം’ എന്ന അന്ത്യശാസനമാണ് നൽകിയിരിക്കുന്നത്. ഇറാൻ നാവികസേനയെ പൂർണ്ണമായും ഇല്ലാതാക്കുമെന്ന് പ്രഖ്യാപിച്ച അദ്ദേഹം, ഇറാനിലെ ഭരണമാറ്റം തന്നെയാണ് ഈ ആക്രമണത്തിന്റെ ആത്യന്തിക ലക്ഷ്യമെന്നും സൂചിപ്പിച്ചു. അമേരിക്കയിൽ എത്താൻ ശേഷിയുള്ള മിസൈലുകൾ വികസിപ്പിക്കാനുള്ള ഇറാന്റെ ശ്രമം നോക്കിനിൽക്കാനാവില്ലെന്നും, ശത്രുശക്തികൾ തങ്ങളെ ആക്രമിക്കുന്നത് വരെ കാത്തിരിക്കാതെ മുൻകരുതൽ എന്ന നിലയിലാണ് ഇപ്പോൾ സൈനിക നടപടി ആരംഭിച്ചതെന്നും അദ്ദേഹം വിശദീകരിച്ചു.
ഇറാൻ തങ്ങളുടെ ആണവ പദ്ധതി പുനർനിർമ്മിക്കാൻ ശ്രമിക്കുന്നത് ലോകത്തിനും അമേരിക്കയ്ക്കും ഒരുപോലെ ഭീഷണിയാണെന്ന് ട്രംപ് കുറ്റപ്പെടുത്തി. ഒരു ഭീകര ശക്തിയെയും ആണവായുധം നേടാൻ അനുവദിക്കില്ലെന്നും അദ്ദേഹം വ്യക്തമാക്കി. സമാധാന കരാറിനായി അമേരിക്ക നടത്തിയ എല്ലാ ശ്രമങ്ങളും ഇറാൻ നിരാകരിച്ച സാഹചര്യത്തിൽ, രാജ്യത്തിന്റെ സ്വയം രക്ഷയ്ക്കായി ഈ നടപടി അനിവാര്യമാണെന്ന് അദ്ദേഹം പറഞ്ഞു. ഈ പോരാട്ടത്തിൽ അമേരിക്കൻ സൈനികർ കൊല്ലപ്പെട്ടിരിക്കാൻ സാധ്യതയുണ്ടെന്നും ട്രംപ് കൂട്ടിച്ചേർത്തു.
The post സൈനിക നീക്കം നീണ്ടുനിൽക്കും; ഇറാൻ ജനതയുടെ സ്വാതന്ത്ര്യമാണ് ലക്ഷ്യമെന്ന് ഡോണൾഡ് ട്രംപ് appeared first on Express Kerala.