അമേരിക്ക-ഇസ്രായേൽ സഖ്യത്തിന്റെ നീക്കങ്ങൾക്ക് മറുപടിയായി ഇറാൻ പശ്ചിമേഷ്യയിൽ ആസൂത്രിത മിസൈൽ ആക്രമണം തുടരുന്നു. കുവൈത്ത് വ്യോമാതിർത്തി ലക്ഷ്യമിട്ടെത്തിയ മിസൈലുകളെ തങ്ങളുടെ വ്യോമ പ്രതിരോധ സംവിധാനങ്ങൾ വിജയകരമായി തടഞ്ഞതായി കുവൈത്ത് സായുധ സേനയുടെ ജനറൽ കമാൻഡ് അറിയിച്ചു. രാജ്യത്തിന്റെ സുരക്ഷ ഉറപ്പാക്കുന്നതിനായി സേന സജ്ജമാണെന്നും ഔദ്യോഗിക സ്രോതസ്സുകളിൽ നിന്നുള്ള വിവരങ്ങൾ മാത്രം ജനങ്ങൾ വിശ്വസിക്കണമെന്നും അധികൃതർ നിർദ്ദേശിച്ചു. കിംവദന്തികൾ പ്രചരിപ്പിക്കരുതെന്നും സൈന്യം കർശന മുന്നറിയിപ്പ് നൽകിയിട്ടുണ്ട്.
സംഘർഷം രൂക്ഷമായ സാഹചര്യത്തിൽ കുവൈത്തിലെ വ്യോമപാത താൽക്കാലികമായി അടച്ചതായി ഡയറക്ടറേറ്റ് ജനറൽ ഓഫ് സിവിൽ ഏവിയേഷൻ പ്രഖ്യാപിച്ചു. വിമാന കമ്പനികളുടെയും യാത്രക്കാരുടെയും സുരക്ഷ കണക്കിലെടുത്താണ് ഈ അടിയന്തര തീരുമാനം. അന്താരാഷ്ട്ര ഏജൻസികളുമായി സഹകരിച്ച് സ്ഥിതിഗതികൾ 24 മണിക്കൂറും നിരീക്ഷിച്ചുവരികയാണെന്നും വിമാനത്താവളത്തിന്റെ പ്രവർത്തനം പുനരാരംഭിക്കുന്നത് സംബന്ധിച്ച വിവരങ്ങൾ പിന്നീട് അറിയിക്കുമെന്നും വക്താവ് അബ്ദുല്ല രഹ്ജി വ്യക്തമാക്കി.
Also Read: യുദ്ധഭീതിയിൽ പശ്ചിമേഷ്യ: കുവൈത്ത് വ്യോമപാത അടച്ചു; രാജ്യത്തെങ്ങും അപായ സൈറണുകൾ
ഗൾഫ് മേഖലയിലെ അമേരിക്കൻ സൈനിക താവളങ്ങളെ ലക്ഷ്യമിട്ടുള്ള ഇറാന്റെ പ്രത്യാക്രമണം അയൽരാജ്യങ്ങളെയും സാരമായി ബാധിച്ചിട്ടുണ്ട്. യുഎഇ തലസ്ഥാനമായ അബുദാബിയിൽ മിസൈൽ അവശിഷ്ടങ്ങൾ പതിച്ച് ഒരാൾ കൊല്ലപ്പെട്ടത് വലിയ നടുക്കമാണ് സൃഷ്ടിച്ചത്. പ്രതിരോധ സംവിധാനങ്ങൾ തകർത്ത മിസൈലുകളുടെ ഭാഗങ്ങൾ സിവിലിയൻ കേന്ദ്രങ്ങളിൽ വീണതാണ് അപകടത്തിന് കാരണമായത്. ഇതോടെ പ്രവാസി ലോകം ഉൾപ്പെടെയുള്ളവർ വലിയ ആശങ്കയിലാണ്. മേഖലയിലെ സുരക്ഷാ ക്രമീകരണങ്ങൾ രാജ്യങ്ങൾ കൂടുതൽ ശക്തമാക്കിയിട്ടുണ്ട്.
The post ഇറാന്റെ മിസൈലുകളെ പ്രതിരോധിച്ച് കുവൈത്ത്! വ്യോമാതിർത്തി അടച്ചു, ഗൾഫ് മേഖലയിൽ അതീവ ജാഗ്രത appeared first on Express Kerala.