പശ്ചിമേഷ്യയിൽ സംഘർഷം രൂക്ഷമായതിനെത്തുടർന്ന് മാർച്ച് ഒന്നിന് നിശ്ചയിച്ചിരുന്ന 28 അന്താരാഷ്ട്ര വിമാന സർവീസുകൾ എയർ ഇന്ത്യ റദ്ദാക്കി. യൂറോപ്പ്, അമേരിക്ക, കാനഡ എന്നിവിടങ്ങളിലെ വിവിധ നഗരങ്ങളെ ബന്ധിപ്പിക്കുന്ന വിമാനങ്ങളാണ് റദ്ദാക്കിയത്. യുദ്ധസാഹചര്യത്തിൽ മിഡിൽ ഈസ്റ്റിലെ ഒന്നിലധികം രാജ്യങ്ങൾ വ്യോമാതിർത്തികൾ അടച്ചതോടെ പടിഞ്ഞാറൻ രാജ്യങ്ങളിലേക്ക് സുരക്ഷിതമായ ഇതര റൂട്ടുകൾ കണ്ടെത്താൻ കഴിയാത്തതാണ് സർവീസുകൾ നിർത്തിവെക്കാൻ വിമാനക്കമ്പനിയെ പ്രേരിപ്പിച്ചത്.
യാത്രക്കാരുടെയും ജീവനക്കാരുടെയും സുരക്ഷയ്ക്കാണ് തങ്ങൾ മുൻഗണന നൽകുന്നതെന്ന് എയർ ഇന്ത്യ എക്സിലൂടെ അറിയിച്ചു. ഡൽഹി, മുംബൈ എന്നിവിടങ്ങളിൽ നിന്ന് ലണ്ടൻ, ന്യൂയോർക്ക്, പാരീസ്, ഫ്രാങ്ക്ഫർട്ട്, ഷിക്കാഗോ എന്നീ നഗരങ്ങളിലേക്കുള്ള സർവീസുകളും അമൃത്സറിൽ നിന്ന് ലണ്ടനിലേക്കുള്ള വിമാനവുമാണ് പ്രധാനമായും റദ്ദാക്കിയിരിക്കുന്നത്. കൂടാതെ ഡൽഹി-ടൊറന്റോ, മുംബൈ-ന്യൂവാർക്ക് സർവീസുകളും റദ്ദാക്കിയവയിൽ ഉൾപ്പെടുന്നു. ഈ നഗരങ്ങളിൽ നിന്ന് തിരിച്ചുള്ള വിമാനങ്ങളും മാർച്ച് ഒന്നിന് സർവീസ് നടത്തില്ല.
മേഖലയിലെ മാറിക്കൊണ്ടിരിക്കുന്ന സാഹചര്യങ്ങൾ സൂക്ഷ്മമായി നിരീക്ഷിച്ചു വരികയാണെന്നും സുരക്ഷാ വിലയിരുത്തലുകൾക്ക് ശേഷം കൂടുതൽ വിവരങ്ങൾ അറിയിക്കുമെന്നും എയർലൈൻ അധികൃതർ വ്യക്തമാക്കി. പ്രധാനപ്പെട്ട വ്യോമപാതകൾ അടഞ്ഞതോടെ ലോകമെമ്പാടുമുള്ള വിമാന ഗതാഗതം കടുത്ത പ്രതിസന്ധിയിലാണ്. വിമാനങ്ങൾ റദ്ദാക്കിയതോടെ ആയിരക്കണക്കിന് യാത്രക്കാരുടെ യാത്രാപദ്ധതികൾ അവതാളത്തിലായിട്ടുണ്ട്.
The post പശ്ചിമേഷ്യൻ പ്രതിസന്ധി! അമേരിക്ക, കാനഡ, യൂറോപ്പ് സർവീസുകൾ റദ്ദാക്കി എയർ ഇന്ത്യ; യാത്രക്കാർ വലയും appeared first on Express Kerala.