ടി20 ലോകകപ്പിൽ സെമി ഫൈനൽ ബെർത്ത് നിശ്ചയിക്കുന്ന നിർണ്ണായകമായ വെസ്റ്റ് ഇൻഡീസ് പോരാട്ടത്തിന് മുന്നോടിയായി ഇന്ത്യൻ ടീമിന് ഉപദേശവുമായി മുൻ താരം ആകാശ് ചോപ്ര. ഈഡൻ ഗാർഡൻസിൽ നടക്കുന്ന മത്സരത്തിൽ ടീം ഇലവനിൽ മാറ്റങ്ങൾ വരുത്തരുതെന്നും സിംബാബ്വെയെ തകർത്ത അതേ ടീമിനെ തന്നെ നിലനിർത്തണമെന്നും അദ്ദേഹം തന്റെ യൂട്യൂബ് ചാനലിലൂടെ നിർദ്ദേശിച്ചു. വാഷിംഗ്ടൺ സുന്ദറിനെയോ കുൽദീപ് യാദവിനെയോ ടീമിലേക്ക് കൊണ്ടുവരുന്നതിനെക്കുറിച്ച് മാനേജ്മെന്റ് ഇപ്പോൾ ചിന്തിക്കരുത്. നോക്കൗട്ട് സ്വഭാവമുള്ള മത്സരമായതിനാൽ നിലവിലെ മികച്ച ഫോമിലുള്ള ടീമിൽ മാറ്റം വരുത്തുന്നത് തിരിച്ചടിയാകുമെന്നാണ് ചോപ്രയുടെ വിലയിരുത്തൽ.
Also Read: ആവേശപ്പോര്! സെമി ലക്ഷ്യമിട്ട് ഇന്ത്യ; പ്ലെയിംഗ് ഇലവനിൽ മാറ്റമില്ലാതെ നീലപ്പട
സഞ്ജു സാംസണും അഭിഷേക് ശർമ്മയും തന്നെ ഓപ്പണർമാരായി തുടരണമെന്നും മൂന്നാം നമ്പറിൽ ഇഷാൻ കിഷനും നാലാമനായി ക്യാപ്റ്റൻ സൂര്യകുമാർ യാദവും വരണമെന്നും അദ്ദേഹം പറഞ്ഞു. എന്നാൽ ടീം നേരിടുന്ന ‘ആറാം ബൗളർ’ പ്രതിസന്ധിയെക്കുറിച്ച് ചോപ്ര ആശങ്ക പ്രകടിപ്പിച്ചു. ശിവം ദുബെ റൺസ് വിട്ടുകൊടുക്കുന്നത് പ്രശ്നമാണെന്നും അതിനാൽ ഹാർദിക് പാണ്ഡ്യയെക്കൊണ്ട് പുതിയ പന്തിൽ പവർപ്ലേയിൽ തന്നെ ബൗൾ ചെയ്യിക്കണമെന്നും അദ്ദേഹം നിർദ്ദേശിച്ചു. അർഷ്ദീപിനും ബുംറയ്ക്കുമൊപ്പം ഹാർദിക് തുടക്കത്തിൽ പന്തെറിഞ്ഞില്ലെങ്കിൽ പിന്നീട് റൺസ് നിയന്ത്രിക്കുക പ്രയാസകരമാകുമെന്നും ചോപ്ര ഓർമ്മിപ്പിച്ചു. ഫിനിഷർ റോളിൽ റിങ്കു സിംഗിനെ ഒഴിവാക്കി തിലക് വർമ്മയെയാണ് ചോപ്ര ഇത്തവണയും തന്റെ ഇലവനിൽ ഉൾപ്പെടുത്തിയത്.
ആകാശ് ചോപ്ര തിരഞ്ഞെടുത്ത ഇന്ത്യൻ ഇലവൻ: സഞ്ജു സാംസൺ, അഭിഷേക് ശർമ്മ, ഇഷാൻ കിഷൻ, സൂര്യകുമാർ യാദവ്, ഹാർദിക് പാണ്ഡ്യ, തിലക് വർമ്മ, ശിവം ദുബെ, അക്സർ പട്ടേൽ, വരുൺ ചക്രവർത്തി, ജസ്പ്രീത് ബുമ്ര, അർഷ്ദീപ് സിംഗ്. വെസ്റ്റ് ഇൻഡീസിന്റെ കരുത്തുറ്റ ബാറ്റിംഗ് നിരയെ നേരിടാൻ ഈ സന്തുലിതമായ ടീമിന് കഴിയുമെന്നാണ് ആരാധകരും പ്രതീക്ഷിക്കുന്നത്.
The post ‘പരീക്ഷണങ്ങൾ വേണ്ട, വിന്നിംഗ് കോമ്പിനേഷൻ തുടരണം’; വിൻഡീസിനെതിരായ ഇന്ത്യയുടെ പ്ലേയിംഗ് ഇലവൻ പ്രഖ്യാപിച്ച് ആകാശ് ചോപ്ര! appeared first on Express Kerala.