ട്വന്റി20 ലോകകപ്പിലെ തകർപ്പൻ കുതിപ്പ് തുടർന്ന് ദക്ഷിണാഫ്രിക്ക സെമിഫൈനലിൽ പ്രവേശിച്ചു. നിർണ്ണായക മത്സരത്തിൽ സിംബാബ്വെയെ അഞ്ച് വിക്കറ്റിന് പരാജയപ്പെടുത്തിയാണ് എയ്ഡൻ മാർക്രം നയിക്കുന്ന പ്രോട്ടീസ് പട അവസാന നാലിൽ ഇടംപിടിച്ചത്. ഗ്രൂപ്പ് ഘട്ടത്തിൽ കരുത്തരായ ഓസ്ട്രേലിയയെയും ശ്രീലങ്കയെയും വീഴ്ത്തി ഗ്രൂപ്പ് ചാമ്പ്യന്മാരായി എത്തിയ സിംബാബ്വെയ്ക്ക് സൂപ്പർ 8 ഘട്ടം കടുത്ത തിരിച്ചടിയായി മാറി. കളിച്ച എല്ലാ മത്സരങ്ങളിലും പരാജയപ്പെട്ടാണ് അവർ ടൂർണമെന്റിൽ നിന്ന് മടങ്ങുന്നത്. ജൂൺ നാലിന് നടക്കുന്ന സെമിഫൈനലിൽ ന്യൂസിലൻഡാണ് ദക്ഷിണാഫ്രിക്കയുടെ എതിരാളി.
ടോസ് നേടി ബാറ്റിംഗ് തിരഞ്ഞെടുത്ത സിംബാബ്വെയ്ക്ക് തുടക്കത്തിൽ തന്നെ തകർച്ച നേരിട്ടെങ്കിലും ക്യാപ്റ്റൻ സിക്കന്ദർ റാസയുടെ തകർപ്പൻ ബാറ്റിംഗ് ടീമിനെ മാന്യമായ സ്കോറിലെത്തിച്ചു. വെറും 29 പന്തിൽ അർദ്ധ സെഞ്ച്വറി തികച്ച റാസ, 43 പന്തിൽ 73 റൺസാണ് അടിച്ചുകൂട്ടിയത്. ക്വേന മഫാക നയിച്ച ദക്ഷിണാഫ്രിക്കൻ ബൗളിംഗ് നിരയ്ക്കെതിരെ എട്ട് ഫോറുകളും നാല് സിക്സറുകളും സഹിതമായിരുന്നു റാസയുടെ പടയോട്ടം. ഒടുവിൽ ക്ലൈവ് മദാൻഡെയുടെ (26) ബാറ്റിംഗ് കരുത്തിൽ സിംബാബ്വെ 20 ഓവറിൽ 7 വിക്കറ്റ് നഷ്ടത്തിൽ 153 റൺസെടുത്തു.
Also Read: ശ്രീ ചരണിക്ക് നാണക്കേടിന്റെ റെക്കോർഡ്; ഭുവനേശ്വർ കുമാറിനൊപ്പം, ഇന്ത്യക്ക് 185 റൺസിന്റെ കനത്ത തോൽവി
മറുപടി ബാറ്റിംഗിനിറങ്ങിയ ദക്ഷിണാഫ്രിക്കയെ ബൗളിംഗിലും സിക്കന്ദർ റാസ വിറപ്പിച്ചു. ക്വിന്റൺ ഡി കോക്കിനെയും എയ്ഡൻ മാർക്രമിനെയും തുടക്കത്തിലേ പുറത്താക്കിയ റാസ, അപകടകാരിയായ ഡെവാൾഡ് ബ്രെവിസിനെയും വീഴ്ത്തി 3 വിക്കറ്റുകൾ സ്വന്തമാക്കി. എന്നാൽ മറ്റ് സിംബാബ്വെ ബൗളർമാർക്ക് ഈ ആധിപത്യം തുടരാനായില്ല. ആറാം വിക്കറ്റിൽ ട്രിസ്റ്റൻ സ്റ്റബ്സും (21*) ജോർജ്ജ് ലിൻഡെയും (30*) ചേർന്ന പടുത്തുയർത്തിയ 53 റൺസിന്റെ അപരാജിത കൂട്ടുകെട്ട് 13 പന്തുകൾ ബാക്കിനിൽക്കെ ദക്ഷിണാഫ്രിക്കയെ വിജയത്തിലെത്തിക്കുകയായിരുന്നു.
The post സിംബാബ്വെയെ തകർത്ത് ദക്ഷിണാഫ്രിക്ക സെമിയിൽ; റാസയുടെ പോരാട്ടം വിഫലം appeared first on Express Kerala.