നിയമസഭാ തിരഞ്ഞെടുപ്പിൽ മത്സരിക്കാനില്ലെന്ന മുൻ നിലപാട് തിരുത്തി മുൻ ഡിജിപി ആർ. ശ്രീലേഖ തിരഞ്ഞെടുപ്പ് രാഷ്ട്രീയത്തിലേക്ക് സജീവമായി ഇറങ്ങുന്നു. “ഇനി കേരളം ബിജെപി ഭരിക്കണം, എങ്കിൽ മാത്രമേ ജനങ്ങൾക്ക് പൂർണ്ണമായി നീതി ലഭിക്കൂ” എന്ന തലക്കെട്ടോടെ പങ്കുവെച്ച പുതിയ വീഡിയോയിലൂടെയാണ് താൻ നിലപാട് മാറ്റിയെന്ന സൂചന ശ്രീലേഖ നൽകിയത്. വിരമിച്ച ഒരു ഡിജിപിയോട് പോലും പോലീസ് ഇത്തരത്തിലാണ് പെരുമാറുന്നതെങ്കിൽ സാധാരണക്കാരുടെ അവസ്ഥ എന്താകുമെന്ന് ചോദിച്ച അവർ, ബിജെപി നേതൃത്വം ആവശ്യപ്പെട്ടാൽ തിരഞ്ഞെടുപ്പിൽ മത്സരിക്കാൻ തയ്യാറാണെന്നും വ്യക്തമാക്കി.
ഇരയുടെ പേര് വെളിപ്പെടുത്തി എന്നാരോപിച്ച് തനിക്കെതിരെ പോക്സോ കേസെടുത്തതിൽ ശ്രീലേഖ കടുത്ത അതൃപ്തി രേഖപ്പെടുത്തി. പത്ത് വർഷം മുൻപുള്ള വ്ലോഗിന്റെയും 2020-ലെ വീഡിയോയുടെയും പേരിൽ ഇപ്പോൾ കേസെടുത്തത് മനപ്പൂർവ്വം വ്യക്തിഹത്യ ചെയ്യാനാണെന്നാണ് അവരുടെ ആരോപണം. മൂന്ന് വർഷത്തിൽ താഴെ ശിക്ഷ ലഭിക്കാവുന്ന കുറ്റങ്ങളിൽ ഭാരതീയ ന്യായ സംഹിത സെക്ഷൻ 514 പ്രകാരം മൂന്ന് വർഷത്തിനകം കേസെടുക്കണമെന്ന നിയമം നിലവിലുണ്ടായിരിക്കെ, ചട്ടങ്ങൾ ലംഘിച്ചാണ് തനിക്കെതിരെ എഫ്ഐആർ ഇട്ടതെന്നും ഇതിനെതിരെ ഹൈക്കോടതിയെ സമീപിക്കുമെന്നും അവർ പറഞ്ഞു.
Also Read: ഗണേഷ് കുമാർ ലോക ചതിയൻ: മന്ത്രിയുടെ ചതിപ്രയോഗത്തിന് രൂക്ഷ മറുപടിയുമായി വെള്ളാപ്പള്ളി നടേശൻ
ആദ്യം രാഷ്ട്രീയത്തിലേക്കില്ലെന്ന് പ്രഖ്യാപിച്ചിരുന്നെങ്കിലും നിലവിലെ സാഹചര്യങ്ങളും തന്നെ പിന്തുണയ്ക്കുന്നവരുടെ അഭ്യർത്ഥനയുമാണ് തീരുമാനത്തിൽ മാറ്റമുണ്ടാക്കിയതെന്ന് അവർ സൂചിപ്പിച്ചു. വിരമിച്ച ഉന്നത ഉദ്യോഗസ്ഥ എന്ന നിലയിൽ താൻ നേരിടുന്ന നീതികേട് കേരളത്തിലെ രാഷ്ട്രീയ ഭരണസംവിധാനത്തിലെ പോരായ്മയാണെന്നാണ് ശ്രീലേഖയുടെ പക്ഷം. അതുകൊണ്ട് തന്നെ വരാനിരിക്കുന്ന നിയമസഭാ തിരഞ്ഞെടുപ്പിൽ ബിജെപി സ്ഥാനാർത്ഥിയായി ആർ. ശ്രീലേഖ മത്സരിക്കാനുള്ള സാധ്യതകൾക്ക് ഇതോടെ വലിയ പ്രാധാന്യമാണ് കൈവന്നിരിക്കുന്നത്.
The post നിലപാട് തിരുത്തി ആർ. ശ്രീലേഖ; ബിജെപി ആവശ്യപ്പെട്ടാൽ നിയമസഭയിലേക്ക് മത്സരിക്കും appeared first on Express Kerala.