തുടർച്ചയായ ബോക്സ് ഓഫീസ് പരാജയങ്ങൾക്ക് ശേഷം തെന്നിന്ത്യൻ താരം സൂര്യയുടെ ശക്തമായ തിരിച്ചുവരവിനായി കാത്തിരിക്കുകയാണ് ആരാധകർ. വെങ്കി അറ്റ്ലൂരി സംവിധാനം ചെയ്യുന്ന സൂര്യയുടെ പുതിയ ചിത്രത്തിന്റെ ടൈറ്റിൽ പോസ്റ്റർ അണിയറപ്രവർത്തകർ പുറത്തുവിട്ടു. ‘വിശ്വനാഥ് ആൻഡ് സൺസ്’ എന്ന് പേരിട്ടിരിക്കുന്ന ചിത്രത്തിന്റെ പോസ്റ്ററിൽ ഒരു കുഞ്ഞുമായി നിൽക്കുന്ന സൂര്യയുടെ ഹൃദ്യമായ ചിത്രമാണുള്ളത്. ‘ലക്കി ഭാസ്കർ’ എന്ന സൂപ്പർ ഹിറ്റിന് ശേഷം വെങ്കി അറ്റ്ലൂരി ഒരുക്കുന്ന ഈ ചിത്രം ഒരു കംപ്ലീറ്റ് ഫാമിലി എന്റർടൈനർ ആയിരിക്കുമെന്നാണ് റിപ്പോർട്ടുകൾ. ചിത്രം ഈ വർഷം ജൂലൈയിൽ തീയേറ്ററുകളിലെത്തും.
വൻ ബിസിനസ്സ് സാധ്യതകളാണ് ചിത്രത്തെ ചുറ്റിപ്പറ്റി കേൾക്കുന്നത്. സിനിമയുടെ ചിത്രീകരണം പൂർത്തിയാകുന്നതിന് മുൻപേ 85 കോടി രൂപയ്ക്ക് നെറ്റ്ഫ്ലിക്സ് ഡിജിറ്റൽ അവകാശം സ്വന്തമാക്കിയെന്നാണ് വിവരം. ഈ ചിത്രത്തിനായി സൂര്യ 50 കോടി രൂപ പ്രതിഫലം വാങ്ങിയതായും റിപ്പോർട്ടുകളുണ്ട്. മമിത ബൈജു നായികയാകുന്ന ചിത്രത്തിൽ രാധിക ശരത്കുമാർ, രവീണ ടണ്ഠൻ എന്നിവരും പ്രധാന വേഷങ്ങളിലെത്തുന്നു. അല്ലു അർജുന്റെ സൂപ്പർഹിറ്റ് ചിത്രം ‘അങ്ങ് വൈകുണ്ഠപുരത്ത്’ പോലെ പ്രേക്ഷകരെ രസിപ്പിക്കുന്ന ഒരു സിനിമയായിരിക്കും ഇതെന്ന് സംഗീത സംവിധായകൻ ജി.വി. പ്രകാശ് കുമാർ നേരത്തെ സൂചിപ്പിച്ചിരുന്നു.
Also Read: ‘ഫ്രീഡ സോമനാകാൻ 6 മാസം, 15 കിലോ’; മസ്തിഷ്ക മരണത്തിലെ മാറ്റത്തെക്കുറിച്ച് രജിഷ വിജയൻ
‘വിശ്വനാഥ് ആൻഡ് സൺസ്’ കൂടാതെ മറ്റ് ആവേശകരമായ പ്രോജക്റ്റുകളും സൂര്യയുടേതായി അണിയറയിൽ ഒരുങ്ങുന്നുണ്ട്. ‘ആവേശം’ എന്ന ചിത്രത്തിന് ശേഷം ജിത്തു മാധവൻ സംവിധാനം ചെയ്യുന്ന പുതിയ തമിഴ് ചിത്രത്തിൽ സൂര്യ പോലീസ് വേഷത്തിലാണ് എത്തുന്നത്. നസ്രിയ നായികയാകുന്ന ഈ ചിത്രത്തിൽ നസ്ലെൻ, സുഷിൻ ശ്യാം എന്നിവരും അണിനിരക്കുന്നുണ്ട്. കൂടാതെ ആർ.ജെ. ബാലാജി സംവിധാനം ചെയ്യുന്ന ‘കറുപ്പും’ റിലീസിന് തയ്യാറെടുക്കുകയാണ്. വമ്പൻ റിലീസുകളുമായി 2026 സൂര്യയുടെ വർഷമായി മാറുമെന്ന ആത്മവിശ്വാസത്തിലാണ് ആരാധകർ.
The post പരാജയങ്ങൾ വഴിമാറുന്നു! പുത്തൻ പ്രതീക്ഷയുമായി സൂര്യ, ‘വിശ്വനാഥ് ആൻഡ് സൺസ്’ ടൈറ്റിൽ പോസ്റ്റർ പുറത്ത് appeared first on Express Kerala.