ചന്ദ്രനിൽ മനുഷ്യന്റെ സ്ഥിരതാമസമെന്ന സ്വപ്നത്തിന് കരുത്തേകി ചാന്ദ്രമണ്ണിൽ നിന്ന് ഓക്സിജൻ വേർതിരിച്ചെടുക്കുന്ന പരീക്ഷണം നാസ വിജയകരമായി പൂർത്തിയാക്കി. ‘കാർബോതെർമൽ റിഡക്ഷൻ ഡെമോൺസ്ട്രേഷൻ’ എന്ന നൂതന പദ്ധതിയിലൂടെ സൗരോർജം ഉപയോഗിച്ചാണ് ഈ നേട്ടം കൈവരിച്ചത്. ചന്ദ്രന്റെ ഉപരിതലത്തിലുള്ള മണ്ണിൽ ഓക്സിജൻ സ്വതന്ത്ര രൂപത്തിലല്ല, മറിച്ച് ധാതുക്കളുമായി ശക്തമായ ബോണ്ടുകളാൽ ബന്ധിക്കപ്പെട്ട നിലയിലാണ് കാണപ്പെടുന്നത്. ഈ ബോണ്ടുകളെ തകർത്ത് ഓക്സിജൻ വേർതിരിച്ചെടുക്കുന്ന പ്രോട്ടോടൈപ്പ് സംവിധാനമാണ് ഇപ്പോൾ ഫലം കണ്ടിരിക്കുന്നത്.
സൂര്യപ്രകാശത്തെ വലിയ കണ്ണാടികൾ ഉപയോഗിച്ച് കേന്ദ്രീകരിച്ച് റിയാക്ടറിനുള്ളിൽ അതിശക്തമായ ചൂട് സൃഷ്ടിച്ചാണ് ഈ പ്രക്രിയ നടക്കുന്നത്. റിയാക്ടറിലെ ചാന്ദ്രമണ്ണിലേക്ക് കാർബൺ കൂടി ചേർത്താണ് ഓക്സിജൻ വേർതിരിക്കുന്നത്. ഈ പരീക്ഷണത്തിലൂടെ കാർബൺ മോണോക്സൈഡ് ഉൽപാദിപ്പിക്കാമെന്നും അതിനെ പിന്നീട് ശുദ്ധമായ ഓക്സിജനായി മാറ്റാമെന്നും നാസ തെളിയിച്ചു കഴിഞ്ഞു. ഭാവിയിലെ ചാന്ദ്ര ദൗത്യങ്ങൾക്ക് ആവശ്യമായ ശ്വസനവായുവും ഇന്ധനവും ചന്ദ്രനിൽ തന്നെ നിർമ്മിക്കാൻ ഈ സാങ്കേതികവിദ്യ വഴിതുറക്കുമെന്നാണ് കരുതപ്പെടുന്നത്.
Also Read:വാട്ട്സ്ആപ്പിൽ ഇനി ‘സിം ബൈൻഡിംഗ്’ നിർബന്ധം! ഇന്ത്യയിൽ പുതിയ നിയമം പ്രാബല്യത്തിൽ
നാസയ്ക്ക് പുറമെ യൂറോപ്യൻ ബഹിരാകാശ ഏജൻസിയും സമാനമായ പരീക്ഷണങ്ങളുമായി രംഗത്തുണ്ട്. ചാന്ദ്രമണ്ണിന്റെ ഭാരത്തിന്റെ 40 മുതൽ 45 ശതമാനം വരെ ഓക്സിജനാണെന്നാണ് ഇവരുടെ കണ്ടെത്തൽ. ഉരുകിയ ലവണങ്ങൾ ഉപയോഗിച്ച് ചാന്ദ്രമണ്ണ് ചൂടാക്കി വൈദ്യുതിയുടെ സഹായത്തോടെ ഓക്സിജൻ വേർതിരിക്കുന്ന ഉപകരണത്തിന് ഇഎസ്എ രൂപം നൽകിയിട്ടുണ്ട്. പ്രതിദിനം 50 മുതൽ 100 ഗ്രാം വരെ ഓക്സിജൻ ഉൽപാദിപ്പിക്കുകയാണ് ഇവരുടെ ലക്ഷ്യം. ഓസ്ട്രേലിയൻ ബഹിരാകാശ ഏജൻസിയുമായി ചേർന്ന് ചന്ദ്രനിൽ നിന്ന് മണ്ണ് ശേഖരിക്കാനുള്ള റോവർ വിക്ഷേപിക്കാനും നാസ പദ്ധതിയിടുന്നുണ്ട്.
ബഹിരാകാശ രംഗത്തെ സ്വകാര്യ സംരംഭങ്ങളും ഈ ഓക്സിജൻ വേട്ടയിൽ സജീവമാണ്. ജെഫ് ബെസോസിന്റെ ‘ബ്ലൂ ഒറിജിൻ’ വികസിപ്പിച്ച ‘ബ്ലൂ ആൽക്കമിസ്റ്റ്’ സംവിധാനം സൗരോർജം ഉപയോഗിച്ച് മണ്ണ് ഉരുക്കി ഇലക്ട്രോളിസിസ് വഴി ഓക്സിജൻ പുറത്തെടുക്കാൻ ലക്ഷ്യമിടുന്നു. വിവിധ രാജ്യങ്ങളുടെയും സ്വകാര്യ കമ്പനികളുടെയും ഇത്തരം കൂട്ടായ പരിശ്രമങ്ങൾ ചന്ദ്രനിൽ മനുഷ്യന്റെ സ്വയംപര്യാപ്തമായ വാസസ്ഥലം യാഥാർത്ഥ്യമാക്കുന്നതിൽ നിർണ്ണായക ചുവടുവെപ്പായി മാറും.
The post ചാന്ദ്രമണ്ണിൽ നിന്ന് പ്രാണവായു; ബഹിരാകാശ പര്യവേക്ഷണത്തിൽ നാസയുടെ വിപ്ലവകരമായ കുതിപ്പ്! appeared first on Express Kerala.