മലയാളികളുടെ പ്രിയതാരം ഉർവശി സിനിമാ സെറ്റിലെ രസകരമായ ഒരു പഴയ ഓർമ്മ പങ്കുവെച്ചത് സോഷ്യൽ മീഡിയയിൽ ശ്രദ്ധ നേടുന്നു. തനിക്ക് കഴിക്കാൻ ദോശ വാങ്ങാനായി പോയ നായകൻ തിരിച്ചുവരാത്തതിനെത്തുടർന്ന് ഒരു സിനിമയുടെ ഷൂട്ടിംഗ് തന്നെ മുടങ്ങിപ്പോയ കഥയാണ് ഉർവശി ഒരു അഭിമുഖത്തിൽ വെളിപ്പെടുത്തിയത്. അന്തരിച്ച നടൻ രതീഷ് ആയിരുന്നു ആ നായകൻ. ഒരേസമയം നിരവധി സിനിമകളിൽ അഭിനയിച്ചിരുന്ന രതീഷ്, തിരക്കുകളിൽ നിന്ന് രക്ഷപ്പെടാൻ കണ്ടെത്തിയ രസകരമായ വഴികളിലൊന്നായിരുന്നു ഈ ‘ദോശ വാങ്ങൽ’ എന്ന് താരം ചിരിയോടെ ഓർത്തെടുത്തു.
സംവിധായകൻ സാജന്റെ സിനിമയുടെ സെറ്റിലായിരുന്നു ഈ രസകരമായ സംഭവം നടന്നത്. ഷൂട്ടിംഗിനിടെ സെറ്റിലെ ദോശ ഉണങ്ങിപ്പോയെന്നും കഴിക്കാൻ പറ്റുന്നില്ലെന്നും ഉർവശി പരാതിപ്പെട്ടപ്പോൾ, ‘മോളെ, ചേട്ടൻ പോയി നല്ല ദോശ വാങ്ങി വരാം’ എന്ന് പറഞ്ഞ് രതീഷ് വണ്ടിയെടുത്ത് പോവുകയായിരുന്നു. എന്നാൽ മിനിറ്റുകൾ കഴിഞ്ഞിട്ടും രതീഷിനെ കാണാതായതോടെ സംവിധായകൻ അന്വേഷിച്ചു വന്നു. ദോശ വാങ്ങാൻ പോയതാണെന്ന് ഉർവശി മറുപടി നൽകിയെങ്കിലും, സെറ്റിന് തൊട്ടടുത്ത് തന്നെ തട്ടുകട ഉണ്ടായിരുന്നിട്ടും ഹെയർപിൻ വളവുകൾ ഇറങ്ങി രതീഷിന്റെ കാർ ദൂരേക്ക് പോകുന്നത് കണ്ട് എല്ലാവരും അമ്പരന്നു.
യഥാർത്ഥത്തിൽ മറ്റ് സിനിമകളുടെ തിരക്കുകൾ കാരണം അവിടെ നിന്ന് മുങ്ങാൻ രതീഷ് കണ്ടെത്തിയ ഒരു തന്ത്രമായിരുന്നു അതെന്ന് ഉർവശി പറയുന്നു. രതീഷിന്റെ കാർ മലയിറങ്ങിപ്പോയതോടെ അന്നത്തെ ഷൂട്ടിംഗും അതോടൊപ്പം ആ സിനിമയും തന്നെ അവിടെ വെച്ച് നിലച്ചുപോയി. ‘രതീഷേട്ടന്റെ കാര്യങ്ങൾ കേട്ടാൽ ചിരിച്ചു മണ്ണുകപ്പും’ എന്ന് പറഞ്ഞുകൊണ്ടാണ് തെന്നിന്ത്യൻ സിനിമാ ലോകത്തെ അക്കാലത്തെ തിരക്കുകളെക്കുറിച്ചും രസകരമായ സെറ്റ് അനുഭവങ്ങളെക്കുറിച്ചും ഉർവശി മനസ്സ് തുറന്നത്.
The post “നായകൻ എനിക്ക് ദോശ വാങ്ങാൻ പോയി, അതോടെ ആ സിനിമയും നിന്നു”; പഴയ ഓർമ്മകൾ പങ്കുവെച്ച് ഉർവശി! appeared first on Express Kerala.