പശ്ചിമേഷ്യയിലെ സംഘർഷം പുതിയ തലത്തിലേക്ക്. ഇറാൻ ഭരണകൂടത്തിനെതിരെയുള്ള അമേരിക്കൻ-ഇസ്രയേൽ സൈനിക നീക്കത്തിൽ സജീവ പങ്കാളികളാകാൻ പ്രമുഖ അറബ് രാജ്യങ്ങൾ താല്പര്യം പ്രകടിപ്പിച്ചതായി അമേരിക്കൻ പ്രസിഡന്റ് ഡോണൾഡ് ട്രംപ് വെളിപ്പെടുത്തി. സിഎൻഎന്നിന് നൽകിയ പ്രത്യേക അഭിമുഖത്തിലാണ് ട്രംപ് നിർണ്ണായകമായ ഈ വിവരം പങ്കുവെച്ചത്.
തുടക്കത്തിൽ സൈനിക നീക്കത്തോട് വിമുഖത കാണിച്ചിരുന്ന അറബ് രാഷ്ട്രങ്ങൾ, ഇറാൻ തങ്ങളുടെ മണ്ണിൽ നേരിട്ട് മിസൈൽ ആക്രമണം നടത്തിയതോടെയാണ് നിലപാട് മാറ്റിയത്. ബഹ്റൈൻ, ജോർദാൻ, കുവൈത്ത്, സൗദി അറേബ്യ, ഖത്തർ, യുഎഇ എന്നീ രാജ്യങ്ങളിലെ സിവിലിയൻ കേന്ദ്രങ്ങളെ ലക്ഷ്യമിട്ട് ഇറാൻ മിസൈൽ വർഷിച്ചതാണ് അവരെ പ്രകോപിപ്പിച്ചത്. “നിങ്ങൾ ഇതിൽ ഇടപെടേണ്ടതില്ല എന്ന് ഞങ്ങൾ നേരത്തെ അവരോട് പറഞ്ഞിരുന്നു, എന്നാൽ ഇപ്പോൾ അവർക്ക് യുദ്ധം ചെയ്യണം, അവർ സജീവമായി രംഗത്തുണ്ട്,” ട്രംപ് പറഞ്ഞു.
അമേരിക്കയും ആറ് അറബ് രാജ്യങ്ങളും (ബഹ്റൈൻ, ജോർദാൻ, കുവൈത്ത്, ഖത്തർ, സൗദി അറേബ്യ, യുഎഇ) ചേർന്ന് സംയുക്ത പ്രസ്താവന പുറത്തിറക്കിയിരുന്നു. ഇറാന്റെ നടപടി അന്താരാഷ്ട്ര നിയമങ്ങളുടെ നഗ്നമായ ലംഘനമാണെന്നും ഭീകരമായ പ്രത്യാഘാതങ്ങൾ ഉണ്ടാക്കുമെന്നും പ്രസ്താവന മുന്നറിയിപ്പ് നൽകുന്നു. സിവിലിയൻ കേന്ദ്രങ്ങളെ ലക്ഷ്യമിട്ടുള്ള ഇറാന്റെ നീക്കം മേഖലയിലെ സമാധാനം പൂർണ്ണമായും തകർക്കുന്നതാണെന്ന് സഖ്യകക്ഷികൾ കുറ്റപ്പെടുത്തി.
‘വലിയ ആക്രമണം വരാനിരിക്കുന്നു’
ഇറാന് മേലുള്ള ഏറ്റവും വലിയ ആക്രമണം ഇനിയും വരാനിരിക്കുന്നതേയുള്ളൂവെന്ന് ട്രംപ് മുന്നറിയിപ്പ് നൽകി. നിലവിലെ സൈനിക നീക്കങ്ങൾ മുൻകൂട്ടി നിശ്ചയിച്ചതിലും വേഗത്തിലാണ് പുരോഗമിക്കുന്നത്. ഇറാൻ ആണവായുധം നിർമ്മിക്കുന്നത് ലോകത്തിന് ഭീഷണിയാണെന്നും മുന്നറിയിപ്പുകളെല്ലാം ഇറാൻ അവഗണിച്ച സാഹചര്യത്തിലാണ് സൈനിക നടപടിയെന്നും ട്രംപ് വ്യക്തമാക്കി.
The post അമേരിക്ക-ഇസ്രയേൽ സഖ്യത്തിനൊപ്പം അറബ് രാജ്യങ്ങളും; ട്രംപിന്റെ വെളിപ്പെടുത്തൽ appeared first on Express Kerala.