മൂന്നുവർഷ ബിരുദം പടിയിറങ്ങുന്നു! ഇനി നാലുവർഷ ബിരുദകാലം; ഏകീകൃത അക്കാദമിക് കലണ്ടർ പുറത്തിറക്കി

തിരുവനന്തപുരം: സംസ്ഥാനത്തെ ഉന്നതവിദ്യാഭ്യാസ പരിഷ്‌കാരങ്ങളുടെ ഭാഗമായി നിലവിലുണ്ടായിരുന്ന മൂന്നുവർഷ ബിരുദ കോഴ്‌സുകൾക്ക് ഈ മാസം തിരശ്ശീല വീഴുന്നു. രണ്ട് വർഷം മുൻപ് കേരളത്തിലെ മുഴുവൻ സർവകലാശാലകളിലും നാലുവർഷ ബിരുദ കോഴ്‌സുകൾ ആരംഭിച്ചിരുന്നു. മൂന്നുവർഷ ബിരുദത്തിന് അവസാനം പ്രവേശനം നേടിയ വിദ്യാർഥികളുടെ കാലാവധി ഈ മാർച്ചിൽ പൂർത്തിയാകുന്നതോടെയാണ് ഈ പഠനരീതി സംസ്ഥാനത്ത് ചരിത്രമാകുന്നത്.

ഏകീകൃത അക്കാദമിക് കലണ്ടർ നിലവിൽ വന്നു

നാലുവർഷ ബിരുദ കോഴ്‌സുകളുടെ അടുത്ത അധ്യയനവർഷത്തേക്കുള്ള ഏകീകൃത അക്കാദമിക് കലണ്ടർ സർക്കാർ തിങ്കളാഴ്ച പുറത്തിറക്കി. വിവിധ സർവകലാശാലകൾക്കിടയിലുള്ള വിദ്യാർഥികളുടെ മാറ്റം സുഗമമാക്കുന്നതിനാണ് എല്ലാ സർവകലാശാലകളും ഒരേ കലണ്ടർ പിന്തുടരണമെന്ന് അധികൃതർ നിർദ്ദേശിച്ചിരിക്കുന്നത്. ഓണം, ക്രിസ്മസ് അവധി ദിനങ്ങളും ഈ പുതിയ കലണ്ടറിന്റെ ഭാഗമായി ക്രമീകരിച്ചിട്ടുണ്ട്.

Also Read:SSC GD 2026 അഡ്മിറ്റ് കാർഡ് ഉടൻ പ്രഖ്യപിക്കും

മൂല്യനിർണ്ണയത്തിൽ പുതിയ മാറ്റങ്ങൾ

പുതിയ പരിഷ്‌കാരമനുസരിച്ച് ഒന്ന്, മൂന്ന്, അഞ്ച് സെമസ്റ്ററുകളുടെ പരീക്ഷാ മൂല്യനിർണ്ണയം അതത് ക്യാമ്പസുകളിൽ തന്നെ പൂർത്തിയാക്കാനാണ് നിർദ്ദേശം നൽകിയിരിക്കുന്നത്. പരീക്ഷാ നടപടികൾ വേഗത്തിലാക്കാനും ഫലപ്രഖ്യാപനം കൃത്യസമയത്ത് നടത്താനും ഈ നീക്കം സഹായിക്കും. പരീക്ഷകൾ പൂർത്തിയാക്കി വിദ്യാർഥികൾ പുറത്തിറങ്ങുന്നതോടെ മൂന്നുവർഷ ബിരുദം എന്ന ഘടന സംസ്ഥാനത്തെ ഉന്നതവിദ്യാഭ്യാസ രംഗത്ത് നിന്ന് പൂർണ്ണമായും ഒഴിവാക്കപ്പെടും.

The post മൂന്നുവർഷ ബിരുദം പടിയിറങ്ങുന്നു! ഇനി നാലുവർഷ ബിരുദകാലം; ഏകീകൃത അക്കാദമിക് കലണ്ടർ പുറത്തിറക്കി appeared first on Express Kerala.