ടി20 ലോകകപ്പിലെ നിർണ്ണായക സൂപ്പർ 8 പോരാട്ടത്തിൽ വെസ്റ്റ് ഇൻഡീസിനെതിരെ തകർപ്പൻ പ്രകടനം കാഴ്ചവെച്ച മലയാളി താരം സഞ്ജു സാംസണെതിരെയുണ്ടായ വംശീയ അധിക്ഷേപത്തിൽ പ്രതിഷേധം ശക്തമാകുന്നു. 50 പന്തിൽ 97 റൺസുമായി ഇന്ത്യയെ സെമിയിലെത്തിച്ച സഞ്ജുവിനെ അഭിനന്ദിച്ചുകൊണ്ട് സോഷ്യൽ മീഡിയ പ്ലാറ്റ്ഫോമായ എക്സിൽ (X) പ്രത്യക്ഷപ്പെട്ട പോസ്റ്റാണ് വിവാദമായത്. സഞ്ജുവിന്റെയും വെസ്റ്റ് ഇൻഡീസ് താരങ്ങളുടെയും നിറത്തെ അധിക്ഷേപിക്കുന്ന തരത്തിലുള്ള പരാമർശത്തിനെതിരെ ആരാധകരും കായിക പ്രേമികളും വലിയ രീതിയിൽ രംഗത്തെത്തിയിട്ടുണ്ട്.
സംഭവത്തിൽ കർശന നടപടി ആവശ്യപ്പെട്ട് കേരളത്തിലെ കോൺഗ്രസ് നേതൃത്വം കേന്ദ്ര ഐടി മന്ത്രി അശ്വിനി വൈഷ്ണവിന് പരാതി നൽകി. ഇത്തരം വംശീയ അധിക്ഷേപങ്ങൾക്ക് ഇന്ത്യയിൽ സ്ഥാനമില്ലെന്നും കേരളത്തിന്റെ അഭിമാനമായ താരത്തെ അധിക്ഷേപിച്ച അക്കൗണ്ടിനെതിരെ അടിയന്തര നടപടി വേണമെന്നും കോൺഗ്രസ് ഔദ്യോഗികമായി ആവശ്യപ്പെട്ടു. മന്ത്രിയെ ടാഗ് ചെയ്തുകൊണ്ടാണ് എക്സിലൂടെ കോൺഗ്രസ് നേതൃത്വം തങ്ങളുടെ പ്രതിഷേധം അറിയിച്ചത്.
Also Read: കൈകൾ കൂപ്പി കുരിശുവരച്ച് സഞ്ജു; ഫോൺ സ്വിച്ച് ഓഫ് ചെയ്ത് താരം നടത്തിയ മാസ് തിരിച്ചുവരവ്!
അതേസമയം, ബാഹ്യമായ വിമർശനങ്ങളോ അധിക്ഷേപങ്ങളോ തന്റെ പ്രകടനത്തെ ബാധിക്കാതിരിക്കാൻ താൻ നിലവിൽ സോഷ്യൽ മീഡിയയിൽ നിന്നും ഫോണിൽ നിന്നും വിട്ടുനിൽക്കുകയാണെന്ന് സഞ്ജു സാംസൺ വ്യക്തമാക്കി. തന്റെ കഴിവിൽ വിശ്വസിച്ച് കളിയിൽ മാത്രം ശ്രദ്ധ കേന്ദ്രീകരിച്ചതാണ് ഈ മികച്ച പ്രകടനത്തിന് പിന്നിലെന്ന് താരം വെളിപ്പെടുത്തി. സഞ്ജുവിന്റെ ഈ പക്വതയാർന്ന നിലപാടിനെ ആരാധകർ പ്രശംസിക്കുമ്പോഴും, സൈബർ ഇടങ്ങളിലെ ഇത്തരം മ്ലേച്ഛമായ പ്രവണതകൾക്കെതിരെ ശക്തമായ നിയമനടപടി വേണമെന്ന ആവശ്യം ഉയരുകയാണ്.
The post സഞ്ജുവിനെതിരെ വംശീയ അധിക്ഷേപം; കേന്ദ്രമന്ത്രി അശ്വിനി വൈഷ്ണവിന് പരാതി നൽകി കോൺഗ്രസ് appeared first on Express Kerala.