അമേരിക്ക-ഇസ്രയേൽ സഖ്യവുമായി ഇറാൻ നടത്തുന്ന സൈനിക സംഘർഷം കടുക്കുന്ന പശ്ചാത്തലത്തിൽ, വരാനിരിക്കുന്ന ഫുട്ബോൾ ലോകകപ്പിൽ ഇറാന്റെ പങ്കാളിത്തം വലിയ അനിശ്ചിതത്വത്തിലായിരിക്കുകയാണ്. ആക്രമണം ആരംഭിച്ച് നാല് ദിവസം പിന്നിട്ടിട്ടും യുദ്ധത്തിന് അയവ് വരാത്ത സാഹചര്യത്തിൽ, ലോകകപ്പിന് ആതിഥേയത്വം വഹിക്കുന്ന അമേരിക്കയിലേക്ക് ടീമിനെ അയക്കുന്ന കാര്യത്തിൽ ഇറാൻ ഫുട്ബോൾ അധികൃതർക്ക് ഇതുവരെ വ്യക്തതയില്ല. അമേരിക്കൻ പൗരന്മാരല്ലാത്ത ഇറാൻകാർക്ക് നിലവിൽ അമേരിക്കയിൽ യാത്രാവിലക്ക് നിലനിൽക്കുന്നുണ്ട്. കായികതാരങ്ങൾക്ക് സാധാരണയായി ഇളവുകൾ നൽകാറുണ്ടെങ്കിലും, നിലവിലെ യുദ്ധസാഹചര്യത്തിൽ അമേരിക്ക കടുത്ത തീരുമാനങ്ങൾ എടുത്തേക്കുമെന്ന ആശങ്ക ശക്തമാണ്.
ലോകകപ്പിൽ ബെൽജിയം, ഈജിപ്ത്, ന്യൂസിലൻഡ് എന്നിവരടങ്ങുന്ന ഗ്രൂപ്പ് ജിയിലാണ് ഇറാൻ ഉൾപ്പെട്ടിരിക്കുന്നത്. ഈ ഗ്രൂപ്പിലെ മത്സരങ്ങൾ നടക്കുന്നത് അമേരിക്കയിലെ വിവിധ വേദികളിലാണെന്നത് ഇറാന് വലിയ വെല്ലുവിളിയാണ്. ഇതിനിടെ, ഇറാനിലെ ആഭ്യന്തര രാഷ്ട്രീയ പ്രതിഷേധങ്ങൾ കായികരംഗത്തും പ്രതിഫലിക്കുന്നുണ്ട്. കഴിഞ്ഞ ദിവസം നടന്ന ഏഷ്യൻ കപ്പ് മത്സരത്തിൽ ദക്ഷിണകൊറിയക്കെതിരെ കളത്തിലിറങ്ങുന്നതിന് മുൻപ് ഇറാൻ വനിതാ താരങ്ങൾ ദേശീയഗാനം ആലപിക്കാൻ തയ്യാറാകാതിരുന്നത് വലിയ ചർച്ചയായിരുന്നു. കൂടാതെ, അമേരിക്കയുടെ ആക്രമണത്തെക്കുറിച്ചോ ഇറാൻ പരമോന്നത നേതാവ് ഖമിനേയിയുടെ മരണത്തെക്കുറിച്ചോ പ്രതികരിക്കാൻ ടീം പരിശീലകനും തയ്യാറായിട്ടില്ല.
Also Read:സഞ്ജുവിന് സെമി നഷ്ടമാകുമോ? ഹെൽമറ്റ് ഊരിയെറിഞ്ഞുള്ള വിജയാഘോഷം വിനയാകുന്നു; നടപടിക്ക് സാധ്യത
അമേരിക്കയുടെ ദേശീയ സുരക്ഷ മുൻനിർത്തി പ്രസിഡന്റ് ഡോണൾഡ് ട്രംപ് ഏർപ്പെടുത്തിയ യാത്രാവിലക്ക് നിലവിൽ ഇറാൻ ഉൾപ്പെടെ 12 രാജ്യങ്ങളിലെ പൗരന്മാർക്കുണ്ട്. അതിനാൽ തന്നെ ഇറാൻ പൗരന്മാർക്ക് അമേരിക്കയിൽ നേരിട്ടെത്തി കളി കാണാൻ സാധിക്കുമോ എന്ന കാര്യവും സംശയത്തിലാണ്. യുഎസ്എ, കാനഡ, മെക്സിക്കോ എന്നിവിടങ്ങളിലായി 16 വേദികളിലായാണ് ഇത്തവണത്തെ ലോകകപ്പ് നടക്കുന്നത്. 48 ടീമുകൾ അണിനിരക്കുന്ന ടൂർണമെന്റിലേക്ക് ഇതുവരെ 42 ടീമുകൾ യോഗ്യത നേടിക്കഴിഞ്ഞു. അവശേഷിക്കുന്ന ആറ് സ്ഥാനങ്ങൾക്കായുള്ള പ്ലേ ഓഫ് മത്സരങ്ങൾ മാർച്ച് 26 മുതൽ 31 വരെയാണ് നിശ്ചയിച്ചിരിക്കുന്നത്.
The post യാത്രാവിലക്കും യുദ്ധവും വില്ലനാകുന്നു; ഫുട്ബോൾ ലോകകപ്പിൽ ഇറാൻ കളിക്കുമോ? appeared first on Express Kerala.