ടി20 ലോകകപ്പിൽ സഞ്ജു സാംസൺ നടത്തുന്ന അവിശ്വസനീയ പ്രകടനങ്ങൾക്ക് പിന്നിൽ ഇന്ത്യൻ ഹെഡ് കോച്ച് ഗൗതം ഗംഭീറിന്റെ ഉറച്ച നിലപാടാണെന്ന് മുൻ പാകിസ്ഥാൻ താരം ഷൊയ്ബ് അക്തർ. സഞ്ജുവിനെ ടീമിൽ ഉൾപ്പെടുത്താൻ ഗംഭീർ മാനേജ്മെന്റിനോട് പൊരുതിയെന്നും, ആ വിശ്വാസത്തിനുള്ള പ്രതിഫലമാണ് സഞ്ജു ഇപ്പോൾ മൈതാനത്ത് നൽകുന്നതെന്നും അക്തർ അഭിപ്രായപ്പെട്ടു. 2014 മുതൽ ഇന്ത്യൻ ക്രിക്കറ്റ് സർക്യൂട്ടിലുള്ള സഞ്ജുവിനെക്കുറിച്ച് 2015-ൽ തന്നെ വലിയ ചർച്ചകൾ ഉണ്ടായിരുന്നുവെന്നും, ധോണിയെയും ദിനേഷ് കാർത്തിക്കിനെയും പോലുള്ള വിക്കറ്റ് കീപ്പർമാരുടെ സാന്നിധ്യം കാരണം അദ്ദേഹത്തിന് അവസരങ്ങൾക്കായി ഏറെക്കാലം കാത്തിരിക്കേണ്ടി വന്നുവെന്നും അക്തർ ചൂണ്ടിക്കാട്ടി. കടുത്ത പരിശോധനകൾക്കൊടുവിൽ ഗംഭീർ നടത്തിയ ‘നിർബന്ധപൂർവ്വമായ സെലക്ഷൻ’ ആണ് സഞ്ജുവിനെ ടീമിലെത്തിച്ചതെന്ന് അദ്ദേഹം കൂട്ടിച്ചേർത്തു.
Also Read: ക്യാപ്റ്റനെ കൊണ്ട് തലകുനിപ്പിച്ച മലയാളി; സഞ്ജുവിന്റെ ബാറ്റിംഗ് മികവിനെ പ്രശംസിച്ച് സദഗോപ്പൻ രമേശ്
ഈ ലോകകപ്പിൽ റെക്കോർഡുകൾ തകർത്തുകൊണ്ടാണ് സഞ്ജു സാംസണിന്റെ കുതിപ്പ്. സൂപ്പർ എട്ടിലെ നിർണ്ണായക പോരാട്ടത്തിൽ വെസ്റ്റ് ഇൻഡീസിനെതിരെ 97 റൺസ് നേടിയ താരം, സെമി ഫൈനലിൽ ഇംഗ്ലണ്ടിനെതിരെ 42 പന്തിൽ 89 റൺസ് അടിച്ചുകൂട്ടിയാണ് ഇന്ത്യയെ ഫൈനലിൽ എത്തിച്ചത്. ടൂർണമെന്റിൽ ഇതുവരെ കളിച്ച നാല് മത്സരങ്ങളിൽ നിന്ന് 77.33 ശരാശരിയിലും 201.73 സ്ട്രൈക്ക് റേറ്റിലും 232 റൺസാണ് സഞ്ജു സമ്പാദിച്ചത്. ഇംഗ്ലണ്ടിനെതിരായ 89 റൺസ് പ്രകടനത്തിലൂടെ, ടി20 ലോകകപ്പ് നോക്കൗട്ട് മത്സരങ്ങളിൽ ഒരു ഇന്ത്യൻ താരം നേടുന്ന ഏറ്റവും ഉയർന്ന സ്കോർ എന്ന വിരാട് കോലിയുടെ (89*) റെക്കോർഡിനൊപ്പവും സഞ്ജു എത്തിയിരിക്കുകയാണ്.
സിക്സറുകളുടെ എണ്ണത്തിലും സഞ്ജു പുതിയ ചരിത്രം കുറിച്ചു. ഈ ലോകകപ്പ് എഡിഷനിൽ മാത്രം 16 സിക്സറുകൾ പറത്തിയ മലയാളി താരം, ഒരു ടി20 ലോകകപ്പിൽ ഏറ്റവും കൂടുതൽ സിക്സറുകൾ നേടുന്ന ഇന്ത്യൻ താരം എന്ന രോഹിത് ശർമ്മയുടെ (15 സിക്സറുകൾ) റെക്കോർഡും മറികടന്നു. പവർ ഹിറ്റിംഗിലും സ്ഥിരതയിലും സഞ്ജു പുലർത്തുന്ന ഈ മികവ് ഫൈനലിലും ഇന്ത്യക്ക് വലിയ പ്രതീക്ഷയാണ് നൽകുന്നത്. കിരീടപ്പോരാട്ടത്തിൽ കിവീസ് ബൗളർമാരെ നേരിടാൻ സഞ്ജുവിന്റെ ഈ ബാറ്റിംഗ് വെടിക്കെട്ട് ഇന്ത്യക്ക് കരുത്താകുമെന്ന് ഉറപ്പാണ്.
The post സഞ്ജുവിനായി ഗംഭീർ പൊരുതി, ഫലം റെക്കോർഡുകളുടെ പെരുമഴ! മലയാളി താരത്തെ വാനോളം പുകഴ്ത്തി ഷൊയ്ബ് അക്തർ appeared first on Express Kerala.
