അഭിഷേക് ശർമയുടെ ബാറ്റിംഗ് ശൈലിയെ ഗവാസ്കർ രൂക്ഷമായി വിമർശിച്ചു. ശരീരത്തിലേക്ക് എത്തുന്ന പന്തുകളിൽ തുടർച്ചയായി വിക്കറ്റ് നഷ്ടപ്പെടുത്തുന്ന താരം തന്റെ പിഴവുകളിൽ നിന്ന് പാഠം പഠിക്കുന്നില്ലെന്ന് അദ്ദേഹം കുറ്റപ്പെടുത്തി. ഈ ടൂർണമെന്റിൽ 12.71 എന്ന ദയനീയ ശരാശരിയിൽ വെറും 89 റൺസ് മാത്രമാണ് അഭിഷേകിന് നേടാനായത്. മൂന്ന് തവണ പൂജ്യത്തിന് പുറത്തായതും ഗവാസ്കർ ചൂണ്ടിക്കാട്ടി. ഒരു വലിയ ടൂർണമെന്റിന്റെ നിർണ്ണായക ഘട്ടത്തിൽ ഒരേ തെറ്റ് ആവർത്തിക്കുന്നത് അംഗീകരിക്കാനാവില്ലെന്ന് അദ്ദേഹം ഇന്ത്യ ടുഡേയോട് പ്രതികരിച്ചു.
ബാറ്റിംഗ് നിരയിൽ സഞ്ജു-ഇഷാൻ സഖ്യം വരണം
അഭിഷേകിനെ മാറ്റിനിർത്തി മലയാളി താരം സഞ്ജു സാംസണിനൊപ്പം ഇഷാൻ കിഷൻ ഇന്നിംഗ്സ് ഓപ്പൺ ചെയ്യണമെന്നാണ് ഗവാസ്കറുടെ നിർദ്ദേശം. ഇതോടൊപ്പം മധ്യനിരയിൽ റിങ്കു സിംഗിനെ ഉൾപ്പെടുത്തുന്നതിലൂടെ ടീമിന് കൂടുതൽ ആത്മവിശ്വാസം ലഭിക്കുമെന്നും അദ്ദേഹം പറഞ്ഞു. സമ്മർദ്ദ ഘട്ടങ്ങളിൽ കരുത്താർന്ന പ്രകടനം കാഴ്ചവെക്കാൻ റിങ്കുവിന് കഴിയുമെന്നാണ് ഗവാസ്കറുടെ വിശ്വാസം.
Also Read:‘പുതിയ ഡയലോഗ് വല്ലതും ഉണ്ടോ?’; സാന്റ്നറുടെ വെല്ലുവിളിക്ക് സൂര്യകുമാറിന്റെ മാസ് മറുപടി
വരുണിന് പകരം കുൽദീപ് യാദവ് എത്തണം
ബൗളിംഗ് നിരയിലും മാറ്റങ്ങൾ വേണമെന്ന് ഗവാസ്കർ ആവശ്യപ്പെടുന്നു. സെമി ഫൈനലിൽ ഇംഗ്ലണ്ടിനെതിരെ വൻതോതിൽ റൺസ് വഴങ്ങിയ വരുൺ ചക്രവർത്തിയുടെ ആത്മവിശ്വാസം തകർന്ന നിലയിലാണെന്ന് അദ്ദേഹം നിരീക്ഷിച്ചു. അഹമ്മദാബാദിലെ വലിയ ബൗണ്ടറികളുള്ള പിച്ചിൽ പന്ത് നന്നായി തിരിക്കാൻ കഴിവുള്ള കുൽദീപ് യാദവ് ആയിരിക്കും മികച്ച ഓപ്ഷൻ. വലിയ സ്റ്റേഡിയങ്ങളിൽ അനുഭവസമ്പത്തുള്ള കുൽദീപിനെപ്പോലൊരു താരം വരുന്നത് ടീമിന് കൂടുതൽ കരുത്ത് പകരുമെന്നും അദ്ദേഹം കൂട്ടിച്ചേർത്തു.
The post തെറ്റുകളിൽ നിന്ന് പഠിക്കാത്ത താരം; വിമർശനവുമായി ഗവാസ്കർ appeared first on Express Kerala.
