ഇറാൻ സുരക്ഷാ കൗൺസിൽ സെക്രട്ടറി അലി ലാരിജാനിയുടെ മുന്നറിയിപ്പുകളെ പൂർണ്ണമായും തള്ളിക്കൊണ്ട് അമേരിക്കൻ പ്രസിഡന്റ് ഡൊണൾഡ് ട്രംപ് രംഗത്തെത്തി. യുദ്ധത്തിന് വലിയ വില നൽകേണ്ടി വരുമെന്ന ഇറാന്റെ ഭീഷണികൾക്ക് യാതൊരു വിലയും നൽകുന്നില്ലെന്ന് സിബിഎസ് ന്യൂസിന് നൽകിയ അഭിമുഖത്തിൽ ട്രംപ് വ്യക്തമാക്കി. ഫെബ്രുവരി 28-ന് ആയത്തുള്ള അലി ഖമേനി കൊല്ലപ്പെട്ടതിന് പിന്നാലെ ഇറാന്റെ സുപ്രധാന നേതാവായി ഉയർന്നുവന്ന ലാരിജാനി ഒരു പരാജയമാണെന്നും ട്രംപ് പരിഹസിച്ചു. ഇറാന്റെ ‘നിരുപാധിക കീഴടങ്ങൽ’ എന്ന തന്റെ ആവശ്യത്തിൽ വിട്ടുവീഴ്ചയില്ലെന്നും സൈനിക നടപടികൾ തുടരുമെന്നും അദ്ദേഹം ആവർത്തിച്ചു.
ഇറാൻ ഭരണകൂടം ഇപ്പോൾ ചരിത്രത്തിലെ ഏറ്റവും ദുർബലമായ അവസ്ഥയിലാണെന്നാണ് വൈറ്റ് ഹൗസിന്റെ വിലയിരുത്തൽ. മിഡിൽ ഈസ്റ്റിൽ സ്വാധീനം ഉറപ്പിക്കാൻ ശ്രമിച്ച ഇറാൻ, അമേരിക്കയുടെ ശക്തമായ ഇടപെടലുകളെത്തുടർന്ന് അയൽരാജ്യങ്ങൾക്ക് മുന്നിൽപ്പോലും പതറുന്ന അവസ്ഥയിലാണെന്ന് ട്രംപ് അവകാശപ്പെട്ടു. ഇറാന്റെ പതനം പൂർണ്ണമാണെന്നും ഇനി അവർക്ക് ഒരു തിരിച്ചുവരവ് അസാധ്യമാണെന്നുമുള്ള കർക്കശമായ നിലപാടാണ് ട്രംപ് സ്വീകരിച്ചിരിക്കുന്നത്. സഖ്യകക്ഷികളുടെ പിന്തുണയെക്കുറിച്ചുള്ള ചോദ്യങ്ങൾക്ക്, കൂറുള്ളവർ കൂടെ നിൽക്കട്ടെ എന്നും അല്ലാത്തവർക്ക് അവർക്ക് ഇഷ്ടമുള്ളത് ചെയ്യാമെന്നുമാണ് ട്രംപ് മറുപടി നൽകിയത്.
Also Read: പശ്ചിമേഷ്യയിൽ യുദ്ധഭീതി ശക്തമാകുന്നു; ബഹ്റൈനിലും കുവൈത്തിലും ഡ്രോൺ – മിസൈൽ ആക്രമണങ്ങൾ
അതേസമയം, ഇറാൻ നേതൃത്വത്തിനുള്ളിലെ കടുത്ത ആശയക്കുഴപ്പങ്ങൾ പുറത്തുവരുന്ന സംഭവങ്ങളാണ് ഇപ്പോൾ നടക്കുന്നത്. ഗൾഫ് രാജ്യങ്ങൾക്ക് നേരെയുണ്ടായ ആക്രമണങ്ങളിൽ ഇറാൻ പ്രസിഡന്റ് മസൂദ് പെസെഷ്കിയൻ ഖേദം പ്രകടിപ്പിച്ചത് നയതന്ത്രപരമായ അയവായി വിലയിരുത്തപ്പെട്ടെങ്കിലും, തൊട്ടുപിന്നാലെ അദ്ദേഹത്തിന്റെ ഓഫീസ് അത് തിരുത്തി രംഗത്തെത്തി. മേഖലയിലെ അമേരിക്കൻ കേന്ദ്രങ്ങൾക്ക് നേരെയുള്ള ആക്രമണങ്ങൾ തുടരുമെന്ന് ഇറാന്റെ ഔദ്യോഗിക വക്താക്കൾ പ്രഖ്യാപിച്ചതോടെ സ്ഥിതിഗതികൾ കൂടുതൽ വഷളായിരിക്കുകയാണ്. ഭരണകൂടത്തിനകത്തെ ഈ ഭിന്നത ഇറാനെ കൂടുതൽ പ്രതിസന്ധിയിലാക്കുന്നുണ്ട്.
The post ഇറാന്റെ ഭീഷണികളെ പുച്ഛിച്ചുതള്ളി ട്രംപ്; ‘നിരുപാധിക കീഴടങ്ങൽ’ അല്ലാതെ മറ്റ് പോംവഴികളില്ലെന്ന് അമേരിക്ക appeared first on Express Kerala.
