അത്യാധുനിക സാങ്കേതികവിദ്യകൾ ഉപയോഗിച്ച് അന്താരാഷ്ട്ര തലത്തിൽ ലഹരിമരുന്ന് ശൃംഖല നടത്തിയിരുന്ന ‘ടീം കൽക്കി’യെ നാർക്കോട്ടിക് കൺട്രോൾ ബ്യൂറോ തകർത്തു. മൂന്ന് മാസം നീണ്ട അതീവ രഹസ്യമായ നീക്കത്തിനൊടുവിൽ സംഘത്തലവൻ അനുരാഗ് താക്കൂർ, സഹായി വികാസ് റാത്തി എന്നിവരെ ഡൽഹിയിൽ നിന്നാണ് പിടികൂടിയത്. നെതർലാൻഡ്സ്, ജർമ്മനി, പോളണ്ട് തുടങ്ങിയ രാജ്യങ്ങളിൽ നിന്ന് ലഹരിമരുന്ന് എത്തിച്ച് ഇന്ത്യയിലെ വിവിധ സംസ്ഥാനങ്ങളിൽ വിതരണം ചെയ്യുന്നതായിരുന്നു ഇവരുടെ രീതി. എൽഎസ്ഡി സ്റ്റാമ്പുകൾ, എംഡിഎംഎ, ചരസ് തുടങ്ങിയ മാരക ലഹരിവസ്തുക്കളുടെ വൻ ശേഖരവും ഇവരിൽ നിന്ന് ഉദ്യോഗസ്ഥർ കണ്ടെടുത്തു.
തിഹാർ ജയിലിൽ വെച്ചുണ്ടായ പരിചയമാണ് ഇരുവരെയും ലഹരി വ്യാപാരത്തിലേക്ക് നയിച്ചത്. ജയിൽ മോചിതരായ ശേഷം ‘ടീം കൽക്കി’ എന്ന പേരിൽ തുടങ്ങിയ ഈ സംഘത്തിന് ഡാർക്ക് വെബ് ഫോറങ്ങളിൽ ഉയർന്ന റേറ്റിംഗ് ഉണ്ടായിരുന്നു. ‘സെഷൻ’ എന്ന എൻക്രിപ്റ്റഡ് ആപ്പ് വഴിയായിരുന്നു ഇവരുടെ ആശയവിനിമയം. ഉപഭോക്താക്കളുമായി നേരിട്ട് ബന്ധപ്പെടാതെ ലഹരിമരുന്ന് ഒരു പ്രത്യേക സ്ഥലത്ത് വെച്ച് അതിന്റെ ലൊക്കേഷൻ അയച്ചുനൽകുന്ന ‘ഡെഡ് ഡ്രോപ്പ്’ രീതിയാണ് ഇവർ പിന്തുടർന്നിരുന്നത്. സ്പീഡ് പോസ്റ്റ് വഴിയും സ്വകാര്യ കൊറിയറുകൾ വഴിയും കേരളം, കർണാടക, തമിഴ്നാട് തുടങ്ങിയ സംസ്ഥാനങ്ങളിലെ പ്രധാന നഗരങ്ങളിലേക്ക് ഇവർ ലഹരി എത്തിച്ചിരുന്നു.
Also Read:രാഷ്ട്രപതിയെ അപമാനിച്ച തൃണമൂൽ കോൺഗ്രസിന് ജനങ്ങൾ മറുപടി നൽകും; രൂക്ഷവിമർശനവുമായി പ്രധാനമന്ത്രി
പിടിക്കപ്പെടാതിരിക്കാൻ അതീവ ജാഗ്രത പുലർത്തിയിരുന്ന ഇവർ മൊനീറോ, യുഎസ്ഡിറ്റി തുടങ്ങിയ ക്രിപ്റ്റോ കറൻസികൾ വഴിയാണ് പണമിടപാടുകൾ നടത്തിയിരുന്നത്. 2025 ജനുവരി മുതൽ ഏകദേശം ആയിരത്തിലധികം പാഴ്സലുകൾ ഇവർ വിതരണം ചെയ്തതായാണ് എൻസിബിയുടെ കണ്ടെത്തൽ. 2338 എൽഎസ്ഡി സ്റ്റാമ്പുകൾ, 3.6 കിലോഗ്രാം ലിക്വിഡ് എംഡിഎംഎ ഉൾപ്പെടെയുള്ളവ പിടിച്ചെടുത്ത സംഘം, ഈ ശൃംഖലയിലെ കൂടുതൽ കണ്ണികളെ കണ്ടെത്താനുള്ള അന്വേഷണം ഊർജിതമാക്കിയിട്ടുണ്ട്. ലഹരിമരുന്ന് കടത്തിനെതിരെയുള്ള വിവരങ്ങൾ നൽകാൻ 1933 എന്ന ടോൾ ഫ്രീ നമ്പറിൽ ബന്ധപ്പെടാമെന്ന് അധികൃതർ അറിയിച്ചു.
The post ഡാർക്ക് വെബ്ബിലെ ‘ടീം കൽക്കി’ കുടുങ്ങി; ലഹരി ഒഴുക്കിയ വൻസംഘത്തെ പിടികൂടി appeared first on Express Kerala.
