ഇറാനിലെ പരമോന്നത ഭരണാധികാര കേന്ദ്രങ്ങളിൽ നിർണ്ണായകമായ മാറ്റം സംഭവിച്ചിരിക്കുന്നു. നിലവിലെ പരമോന്നത നേതാവ് ആയത്തുള്ള അലി ഖമേനിയുടെ പിൻഗാമിയായി അദ്ദേഹത്തിന്റെ രണ്ടാമത്തെ മകൻ മൊജ്തബ ഖമേനിയെ തിരഞ്ഞെടുത്തു. രാജ്യത്തെ പരമോന്നത നേതാവിനെ നിശ്ചയിക്കാൻ അധികാരമുള്ള 88 അംഗ വിദഗ്ദ്ധ സമിതിയാണ് ഈ സുപ്രധാന പ്രഖ്യാപനം നടത്തിയത്. ഈ തീരുമാനത്തോടെ രാജ്യത്തെ രാഷ്ട്രീയവും മതപരവുമായ എല്ലാ വിഷയങ്ങളിലും അന്തിമ തീരുമാനമെടുക്കാനുള്ള പരമാധികാരം 56-കാരനായ മൊജ്തബ ഖമേനിയിലേക്ക് എത്തിച്ചേർന്നിരിക്കുകയാണ്. പുതിയ നേതാവിനെ സംബന്ധിച്ച ചർച്ചകൾ വിദഗ്ദ്ധ സമിതിക്കിടയിൽ കഴിഞ്ഞ കുറച്ചുദിവസങ്ങളായി സജീവമാണെന്ന റിപ്പോർട്ടുകൾക്ക് പിന്നാലെയാണ് ഔദ്യോഗിക പ്രഖ്യാപനം ഉണ്ടായിരിക്കുന്നത്.
ആയത്തുള്ള അലി ഖമേനിയുടെ ആറ് മക്കളിൽ രണ്ടാമനായ മൊജ്തബ ഖമനേയി ദീർഘകാലമായി ഇറാൻ ഭരണകൂടത്തിന്റെ ആന്തരിക വൃത്തങ്ങളിൽ ശക്തമായ സ്വാധീനമുള്ള വ്യക്തിയാണ്. 17-ാം വയസ്സിൽ ഇറാൻ സൈന്യമായ ഇസ്ലാമിക് റെവല്യൂഷണറി ഗാർഡ് കോറിൽ (ഐആർജിസി) ചേർന്ന അദ്ദേഹം ഇറാൻ-ഇറാഖ് യുദ്ധത്തിൽ നേരിട്ട് പങ്കെടുത്തിട്ടുണ്ട്. ഐആർജിസിയിലെ ഹബീബ് ബറ്റാലിയന്റെ ഭാഗമായി പ്രവർത്തിച്ച മൊജ്തബയെ പലരും നേരത്തെ തന്നെ ഖമേനിയുടെ പിൻഗാമിയായി പ്രതീക്ഷിച്ചിരുന്നു. ഇറാനിയൻ ഭരണഘടന പ്രകാരം രാജ്യത്തെ ഏറ്റവും ഉയർന്ന പദവിയാണ് പരമോന്നത നേതാവിന്റേത്. സൈന്യത്തിന് മേലുള്ള അധികാരം മുതൽ വിദേശനയം വരെയുള്ള എല്ലാ നിർണ്ണായക മേഖലകളിലും അന്തിമ വാക്ക് ഇനി മൊജ്തബയുടേതായിരിക്കും.
Also Read:ഹോർമുസ് കടലിടുക്ക് വഴി ഇന്ധന നീക്കം ഉടൻ; ഇറാൻ ഭീഷണി നിലനിൽക്കെ നീക്കവുമായി അമേരിക്ക
അതേസമയം, ഇറാനിലെ ഈ അധികാര കൈമാറ്റം വലിയ രാജ്യാന്തര വെല്ലുവിളികൾക്കും ഭീഷണികൾക്കും ഇടയിലാണ് നടക്കുന്നത്. ഇറാനിലെ അടുത്ത നേതാവിനെ തിരഞ്ഞെടുക്കുന്ന പ്രക്രിയയിൽ തനിക്ക് പങ്കുണ്ടാകണമെന്ന് അമേരിക്കൻ പ്രസിഡന്റ് ഡോണൾഡ് ട്രംപ് നേരത്തെ തന്നെ അവകാശപ്പെട്ടിരുന്നു. മൊജ്തബ ഖമേനി അസ്വീകാര്യനാണെന്നും അദ്ദേഹം ഒരു ദുർബലനായ നേതാവാണെന്നുമാണ് ട്രംപിന്റെ വിമർശനം. ഇതിനുപുറമെ, ഖമേനിയുടെ പിൻഗാമിയായി വരുന്നവരെയും അവരെ തിരഞ്ഞെടുക്കുന്ന സമിതിയിലെ അംഗങ്ങളെയും വേട്ടയാടുമെന്ന് ഇസ്രയേൽ സൈന്യം പരസ്യമായി ഭീഷണി മുഴക്കിയിട്ടുണ്ട്. പിൻഗാമിയെ നിശ്ചയിക്കുന്ന യോഗത്തിൽ പങ്കെടുക്കുന്നവരെ ലക്ഷ്യം വയ്ക്കുമെന്ന മുന്നറിയിപ്പ് പേർഷ്യൻ ഭാഷയിൽ എക്സിലൂടെ ഇസ്രയേൽ നൽകിയിരുന്നു.
The post ഇറാൻ രാഷ്ട്രീയത്തിൽ വൻ മാറ്റം; ആയത്തുള്ള അലി ഖമേനിയുടെ പിൻഗാമിയായി മൊജ്തബ ഖമനേയിയെ തിരഞ്ഞെടുത്തു appeared first on Express Kerala.
