അഹമ്മദാബാദ്: ടി20 ലോകകപ്പിൽ ഇന്ത്യയെ കിരീടവിജയത്തിലേക്ക് നയിച്ച സഞ്ജു സാംസണിന്റെ അവിശ്വസനീയമായ പ്രകടനത്തെ പ്രശംസിച്ചുകൊണ്ട് ഇതിഹാസ താരം വിരാട് കോഹ്ലി. ടൂർണമെന്റിലെ താരമായി തിരഞ്ഞെടുക്കപ്പെട്ട സഞ്ജുവിനെ അഭിനന്ദിച്ച് ഇൻസ്റ്റാഗ്രാം സ്റ്റോറിയിലൂടെയാണ് കോഹ്ലി തന്റെ സന്തോഷം പങ്കുവെച്ചത്. “ഏറ്റവും നിർണ്ണായകമായ സമയത്ത് നീ മികച്ച പ്രകടനം പുറത്തെടുത്തു, നിന്നെക്കുറിച്ച് ഓർത്ത് വലിയ സന്തോഷം തോന്നുന്നു ചേട്ടാ” എന്നായിരുന്നു കോഹ്ലിയുടെ വാക്കുകൾ. പുരസ്കാരം ഏറ്റവും അർഹിച്ച കൈകളിലേക്ക് തന്നെയാണ് എത്തിയതെന്നും കോഹ്ലി കുറിച്ചു.
അഹമ്മദാബാദിൽ നടന്ന ആവേശകരമായ ഫൈനലിൽ ന്യൂസിലൻഡിനെ 96 റൺസിന് തകർത്താണ് ഇന്ത്യ തങ്ങളുടെ മൂന്നാം ടി20 ലോകകപ്പ് കിരീടം സ്വന്തമാക്കിയത്. ടൂർണമെന്റിൽ വെറും അഞ്ച് മത്സരങ്ങൾ മാത്രം കളിച്ച സഞ്ജു, 80.25 ശരാശരിയിലും 199.37 എന്ന തകർപ്പൻ സ്ട്രൈക്ക് റേറ്റിലും 321 റൺസ് അടിച്ചുകൂട്ടിയാണ് ‘പ്ലെയർ ഓഫ് ദി ടൂർണമെന്റ്’ പുരസ്കാരം നേടിയത്. ഇതോടെ വിരാട് കോഹ്ലി (2014, 2016), ജസ്പ്രീത് ബുംറ (2024) എന്നിവർക്ക് ശേഷം ഈ നേട്ടം കൈവരിക്കുന്ന മൂന്നാമത്തെ ഇന്ത്യൻ താരമെന്ന റെക്കോർഡും സഞ്ജു സ്വന്തം പേരിൽ കുറിച്ചു.
Also Read:ലോകകപ്പ് ഫൈനലിൽ തകർത്തടിച്ച് സഞ്ജു; പുതിയ ചരിത്രം കുറിച്ച് മലയാളി താരം
തുടക്കത്തിൽ പ്ലേയിങ് ഇലവനിൽ ഇല്ലാതിരുന്ന സഞ്ജു, നാടകീയമായ സാഹചര്യങ്ങളിലാണ് ടീമിലേക്ക് തിരിച്ചെത്തിയത്. അഭിഷേക് ശർമ്മയുടെ ആരോഗ്യപ്രശ്നങ്ങളും ഓഫ് സ്പിന്നർമാരെ നേരിടാനുള്ള ടീമിന്റെ തന്ത്രപരമായ നീക്കവുമാണ് സഞ്ജുവിന് വഴിതുറന്നത്. വെസ്റ്റ് ഇൻഡീസിനെതിരായ മത്സരത്തിൽ പുറത്താകാതെ 97 റൺസ് നേടി വരവറിയിച്ച താരം, സെമി ഫൈനലിൽ ഇംഗ്ലണ്ടിനെതിരെയും (42 പന്തിൽ 89) ഫൈനലിൽ ന്യൂസിലൻഡിനെതിരെയും (46 പന്തിൽ 89) തകർപ്പൻ ഇന്നിംഗ്സുകൾ കാഴ്ചവെച്ചു. ഒരേ ലോകകപ്പ് എഡിഷനിലെ സെമിയിലും ഫൈനലിലും അർദ്ധസെഞ്ച്വറി നേടുന്ന മൂന്നാമത്തെ ബാറ്റർ എന്ന അപൂർവ്വ നേട്ടവും ഈ ടൂർണമെന്റിലൂടെ സഞ്ജുവിന് ലഭിച്ചു.
The post സഞ്ജുവിന് വിരാട് കോഹ്ലിയുടെ ബിഗ് സല്യൂട്ട്; “നിന്നെയോർത്ത് അഭിമാനം ചേട്ടാ”! ലോകകപ്പിലെ താരമായി മലയാളി കരുത്ത് appeared first on Express Kerala.
