തമിഴ്‌നാട്ടിൽ കസ്റ്റഡി മരണം; യുവാവ് മരിച്ചതിൽ പോലീസ് മർദ്ദനമെന്ന് കുടുംബത്തിന്റെ ആരോപണം

തമിഴ്‌നാട്ടിലെ ശിവഗംഗ ജില്ലയിൽ പോലീസ് കസ്റ്റഡിയിലായിരുന്ന ആകാശ് ഡെനിസൺ (26) എന്ന യുവാവ് ചികിത്സയിലിരിക്കെ മരിച്ചു. മാർച്ച് ആറിന് ഒരു തർക്കവുമായി ബന്ധപ്പെട്ട പരാതിയിലാണ് ബിരുദധാരിയായ ആകാശിനെ പോലീസ് കസ്റ്റഡിയിലെടുത്തത്. കോടതി മാർച്ച് 18 വരെ റിമാൻഡ് ചെയ്ത യുവാവിന്റെ മരണം ഞായറാഴ്ചയായിരുന്നു സംഭവിച്ചത്. മകൻ കടുത്ത പോലീസ് മർദ്ദനത്തിന് ഇരയായെന്നും കാലുകൾ കല്ലുകൾക്കിടയിൽ വെച്ച് പോലീസ് തല്ലിയതായി ആകാശ് തങ്ങളോട് വെളിപ്പെടുത്തിയിരുന്നതായും കുടുംബം ഗുരുതരമായ ആരോപണം ഉന്നയിച്ചു.

എന്നാൽ കുടുംബത്തിന്റെ ആരോപണങ്ങൾ പോലീസ് നിഷേധിച്ചു. കസ്റ്റഡിയിലെടുക്കുമ്പോൾ തന്നെ ആകാശിന് പരിക്കുകളുണ്ടായിരുന്നുവെന്നും ശ്വാസതടസ്സം അനുഭവപ്പെട്ടതിനെത്തുടർന്ന് ആശുപത്രിയിൽ പ്രവേശിപ്പിക്കുകയായിരുന്നു എന്നുമാണ് പോലീസിന്റെ വിശദീകരണം. ശിവഗംഗ മെഡിക്കൽ കോളേജിൽ നിന്നും ആരോഗ്യനില വഷളായതിനെത്തുടർന്ന് മധുരയിലെ രാജാജി ആശുപത്രിയിലേക്ക് മാറ്റിയെങ്കിലും ജീവൻ രക്ഷിക്കാനായില്ല. സംഭവത്തിൽ മജിസ്‌ട്രേറ്റ് തല അന്വേഷണത്തിന് ഉത്തരവിട്ടിട്ടുണ്ട്.

Also Read: ലോക്‌സഭയിൽ ഇന്ന് സ്പീക്കർക്കെതിരെ അവിശ്വാസ പ്രമേയം!

ശിവഗംഗ ജില്ലയിൽ ഒരു വർഷത്തിനിടെ റിപ്പോർട്ട് ചെയ്യപ്പെടുന്ന രണ്ടാമത്തെ കസ്റ്റഡി മരണമാണിത്. നേരത്തെ അജിത് കുമാർ എന്ന യുവാവ് സമാന സാഹചര്യത്തിൽ മരിച്ച സംഭവം തമിഴ്‌നാട്ടിൽ വലിയ പ്രതിഷേധങ്ങൾക്ക് വഴിവെച്ചിരുന്നു. അജിത് കുമാറിന്റെ മരണത്തിൽ അഞ്ച് പോലീസുകാരെ അറസ്റ്റ് ചെയ്യുകയും നിലവിൽ സിബിഐ അന്വേഷണം നടന്നു വരികയുമാണ്. ഈ സാഹചര്യത്തിൽ ആകാശിന്റെ മരണവും സംസ്ഥാനത്ത് വലിയ രാഷ്ട്രീയ-സാമൂഹിക ചർച്ചകൾക്ക് തുടക്കമിട്ടിരിക്കുകയാണ്.

The post തമിഴ്‌നാട്ടിൽ കസ്റ്റഡി മരണം; യുവാവ് മരിച്ചതിൽ പോലീസ് മർദ്ദനമെന്ന് കുടുംബത്തിന്റെ ആരോപണം appeared first on Express Kerala.