ഇന്ത്യൻ സിനിമയിലെ കഴിഞ്ഞ വർഷത്തെ ഏറ്റവും വലിയ വിജയങ്ങളിലൊന്നായ ‘ധുരന്ധർ’ എന്ന ചിത്രത്തിന്റെ രണ്ടാം ഭാഗം ബോക്സ് ഓഫീസിൽ വമ്പൻ കുതിപ്പിന് ഒരുങ്ങുന്നു. ആദിത്യ ധർ സംവിധാനം ചെയ്ത ചിത്രത്തിന്റെ പ്രിവ്യൂ ഷോകൾക്കായി മാത്രം രണ്ട് ദിവസം കൊണ്ട് 12 കോടി രൂപയുടെ ടിക്കറ്റുകൾ വിറ്റുപോയെന്നാണ് റിപ്പോർട്ടുകൾ. ആദ്യ ഭാഗം ആഗോളതലത്തിൽ 1300 കോടി രൂപയോളം കളക്ഷൻ നേടി ചരിത്രം കുറിച്ചിരുന്നു. ഈ വിജയത്തുടർച്ച രണ്ടാം ഭാഗവും ആവർത്തിക്കുമെന്ന പ്രതീക്ഷയിലാണ് സിനിമാ ലോകവും ആരാധകരും.
രൺവീർ സിംഗ് ഇരട്ട വേഷങ്ങളിലെത്തുന്ന ഈ മെഗാ മാസ്സ് ആക്ഷൻ സ്പൈ ത്രില്ലർ, ചരിത്രത്തിൽ അറിയപ്പെടാത്ത ചില കഥാപാത്രങ്ങളുടെ ജീവിതത്തിലെ സംഘർഷഭരിതമായ കഥയാണ് പറയുന്നത്. വടക്കേ അമേരിക്ക, കാനഡ, ബ്രിട്ടൻ, ഓസ്ട്രേലിയ തുടങ്ങിയ അന്താരാഷ്ട്ര വിപണികളിലും ആദ്യ ഭാഗം വലിയ തരംഗം സൃഷ്ടിച്ചിരുന്നു. ബി62 സ്റ്റുഡിയോ നിർമ്മിച്ച് ജിയോ സ്റ്റുഡിയോ അവതരിപ്പിക്കുന്ന ഈ ചിത്രം, പ്രേക്ഷകരെ മുൾമുനയിൽ നിർത്തുന്ന ഒരു പ്രതികാര കഥയായാണ് രണ്ടാം ഭാഗത്തിൽ ഒരുക്കിയിരിക്കുന്നത്.
Also Read: ലൈംഗികാതിക്രമ പരാതി; സംവിധായകൻ ചിദംബരത്തിന് മുൻകൂർ ജാമ്യം അനുവദിച്ചു
മാർച്ച് 19-ന് ചിത്രം ആഗോളതലത്തിൽ തിയേറ്ററുകളിൽ എത്തും. ഹിന്ദി, തമിഴ്, തെലുങ്ക്, കന്നഡ എന്നിവയ്ക്കൊപ്പം മലയാളത്തിലും ചിത്രം റിലീസ് ചെയ്യുന്നുണ്ട്. ഗുഡി പഡ്വ, ഉഗാദി തുടങ്ങിയ ഉത്സവ സീസണുകളും ഈദിന് മുന്നോടിയായുള്ള റിലീസും ചിത്രത്തിന് വലിയ രീതിയിൽ ഗുണകരമാകുമെന്നാണ് വിപണി വിദഗ്ധരുടെ വിലയിരുത്തൽ. ജ്യോതി ദേശ്പാണ്ഡെ, ലോകേഷ് ധർ, ആദിത്യ ധർ എന്നിവർ ചേർന്നാണ് ഈ ബിഗ് ബജറ്റ് ചിത്രം നിർമ്മിച്ചിരിക്കുന്നത്.
The post ബോക്സ് ഓഫീസിൽ വീണ്ടും രൺവീർ സിംഗ് തരംഗം; ‘ധുരന്ധർ 2’ അഡ്വാൻസ് ബുക്കിംഗിൽ റെക്കോർഡ് നേട്ടം appeared first on Express Kerala.
