‘സഞ്ജുവിന് ബിഗ് സല്യൂട്ട്, ഇന്ത്യ കപ്പ് അർഹിച്ചിരുന്നു’; ഇന്ത്യൻ ടീമിനെ പ്രശംസകൊണ്ട് മൂടി ഷാഹിദ് അഫ്രീദി

ടി20 ലോകകപ്പിൽ കിരീടം ചൂടിയ ഇന്ത്യൻ ടീമിനെ വാനോളം പുകഴ്ത്തി പാകിസ്ഥാൻ മുൻ ക്യാപ്റ്റനും ഇതിഹാസ താരവുമായ ഷാഹിദ് അഫ്രീദി. ഈ ലോകകപ്പ് നേട്ടം ഇന്ത്യ പൂർണ്ണമായും അർഹിച്ചിരുന്നുവെന്നും സമാനതകളില്ലാത്ത പ്രകടനമാണ് ടീം കാഴ്ചവെച്ചതെന്നും അദ്ദേഹം പറഞ്ഞു. മലയാളി താരം സഞ്ജു സാംസണിന്റെ പ്രകടനത്തെയും ബാറ്റിംഗിലെ പക്വതയെയും അഫ്രീദി പ്രത്യേകം അഭിനന്ദിച്ചു.

ഇന്ത്യയുടെ പക്കൽ ലോകത്തിലെ ഏറ്റവും മികച്ച ടീം കോമ്പിനേഷനും കരുത്തുറ്റ ബെഞ്ച് സ്ട്രെങ്തും ഉണ്ടെന്ന് അഫ്രീദി നിരീക്ഷിച്ചു. “പുറത്തിരിക്കുന്ന താരങ്ങൾ പോലും പ്ലെയിങ് ഇലവനിലുള്ളവരെപ്പോലെ തന്നെ മികച്ചവരാണ്. സഞ്ജു സാംസൺ അസാധാരണ പ്രകടനമാണ് നടത്തിയത്. തനിക്ക് ലഭിച്ച അവസരങ്ങൾ അദ്ദേഹം കൃത്യമായി വിനിയോഗിച്ചു. ഇന്നിംഗ്‌സ് കെട്ടിപ്പടുക്കാനുള്ള അദ്ദേഹത്തിന്റെ കഴിവും പക്വതയാർന്ന ബാറ്റിംഗും എടുത്തു പറയേണ്ടതാണ്,” അഫ്രീദി തന്റെ എക്‌സ് അക്കൗണ്ടിൽ പങ്കുവെച്ച വീഡിയോയിൽ പറഞ്ഞു.

Also Read:കിരീടത്തിനൊപ്പം കോടികളും; ഇന്ത്യൻ ടീമിന് 131 കോടി! സപ്പോർട്ട് സ്റ്റാഫിനും വലിയ വിഹിതം

യുവതാരങ്ങളായ അഭിഷേക് ശർമ്മയെയും ഇഷാൻ കിഷനെയും പ്രശംസിച്ച അദ്ദേഹം, ഇന്ത്യൻ ബൗളിംഗിന്റെ കരുത്ത് ജസ്പ്രീത് ബുമ്രയാണെന്നും കൂട്ടിച്ചേർത്തു. പുതിയ പന്തിലും പഴയ പന്തിലും കൃത്യതയോടെ യോർക്കറുകൾ എറിയുന്നതിൽ ബുമ്ര ലോകത്തിലെ ഏറ്റവും മികച്ച ബൗളറാണെന്നും അഫ്രീദി അഭിപ്രായപ്പെട്ടു.

The post ‘സഞ്ജുവിന് ബിഗ് സല്യൂട്ട്, ഇന്ത്യ കപ്പ് അർഹിച്ചിരുന്നു’; ഇന്ത്യൻ ടീമിനെ പ്രശംസകൊണ്ട് മൂടി ഷാഹിദ് അഫ്രീദി appeared first on Express Kerala.