അമേരിക്കൻ പ്രസിഡന്റ് ഡോണാൾഡ് ട്രംപിന്റെ ഭീഷണികൾക്ക് ശക്തമായ ഭാഷയിൽ മറുപടി നൽകി ഇറാന്റെ സുപ്രീം നാഷണൽ സെക്യൂരിറ്റി കൗൺസിൽ സെക്രട്ടറി അലി ലാരിജാനി. ഇറാൻ എന്ന ധീര രാഷ്ട്രം ഇത്തരം പൊള്ളയായ ഭീഷണികളെ ഭയപ്പെടുന്നില്ലെന്നും അഷുറയുടെ പഠിപ്പിക്കലുകളിൽ നിന്ന് ഊർജ്ജം ഉൾക്കൊള്ളുന്ന ജനതയാണിതെന്നും അദ്ദേഹം വ്യക്തമാക്കി. ചൊവ്വാഴ്ച തന്റെ എക്സ് അക്കൗണ്ടിലൂടെയായിരുന്നു ലാരിജാനിയുടെ പ്രതികരണം.
“നിങ്ങളെക്കാൾ വലിയവർ പോലും ഇറാനിയൻ രാഷ്ട്രത്തെ ഇല്ലാതാക്കാൻ ശ്രമിച്ചു പരാജയപ്പെട്ടു. സ്വയം ഇല്ലാതാകാതിരിക്കാൻ ശ്രദ്ധിക്കുക” എന്ന് ലാരിജാനി ട്രംപിന് മുന്നറിയിപ്പ് നൽകി. ഹോർമുസ് കടലിടുക്കിലൂടെയുള്ള എണ്ണപ്രവാഹം തടയാൻ ശ്രമിച്ചാൽ ഇറാൻ എന്ന രാഷ്ട്രത്തെ പുനർനിർമ്മിക്കാൻ കഴിയാത്ത വിധം തകർക്കുമെന്നും “മരണവും തീയും ക്രോധവും” ഇറാന് മേൽ വർഷിക്കുമെന്നും ട്രംപ് ട്രൂത്ത് സോഷ്യലിൽ കുറിച്ചിരുന്നു. ഇതിന് പിന്നാലെയാണ് ഇറാന്റെ ഭാഗത്തുനിന്നുള്ള കടുത്ത പ്രതികരണം.
Also Read:ഇസ്രയേൽ മന്ത്രി ബെൻ ഗ്വിറും നെതന്യാഹുവിന്റെ സഹോദരനും കൊല്ലപ്പെട്ടോ? വാർത്തകളുടെ സത്യമെന്ത്
ഫെബ്രുവരി 28-ന് ഇസ്ലാമിക വിപ്ലവ നേതാവ് ആയത്തുള്ള അലി ഖമേനിയും മുതിർന്ന സൈനിക ഉദ്യോഗസ്ഥരും കൊല്ലപ്പെട്ടതിനെത്തുടർന്ന് പശ്ചിമേഷ്യയിൽ യുദ്ധം രൂക്ഷമായിരിക്കുകയാണ്. അമേരിക്കയും ഇസ്രയേലും സംയുക്തമായി ഇറാനിലെ സൈനിക-സിവിലിയൻ കേന്ദ്രങ്ങളിൽ വൻതോതിൽ വ്യോമാക്രമണം നടത്തിയിരുന്നു. ഇതിന് തിരിച്ചടിയായി ഇസ്രായേലിലെയും അമേരിക്കയുടെയും തന്ത്രപ്രധാന കേന്ദ്രങ്ങളിലേക്ക് ഇറാൻ മിസൈലുകളും ഡ്രോണുകളും ഉപയോഗിച്ച് വ്യാപകമായ ആക്രമണമാണ് അഴിച്ചുവിടുന്നത്.
The post ‘സ്വയം ഇല്ലാതാകാതിരിക്കാൻ നോക്ക്’! ട്രംപിന് ഇറാന്റെ കടുത്ത മുന്നറിയിപ്പ്; പശ്ചിമേഷ്യയിൽ പോര് മുറുകുന്നു appeared first on Express Kerala.
