കൊച്ചി: കേരളത്തിന്റെയും തമിഴ്നാടിന്റെയും വികസന ചരിത്രത്തിൽ പുതിയ അധ്യായം കുറിച്ചുകൊണ്ട് പ്രധാനമന്ത്രി നരേന്ദ്ര മോദി ഇന്ന് കൊച്ചിയിലെത്തുന്നു. രാവിലെ 11 മണിയോടെ കൊച്ചി അന്താരാഷ്ട്ര വിമാനത്താവളത്തിൽ എത്തുന്ന പ്രധാനമന്ത്രി, ഉച്ചയോടെ എറണാകുളം കേന്ദ്രീകരിച്ച് 10,800 കോടിയുടെ വിവിധ വികസന പദ്ധതികൾ നാടിന് സമർപ്പിക്കും. മലയാളത്തിൽ തന്റെ സോഷ്യൽ മീഡിയ അക്കൗണ്ടിലൂടെ കേരളത്തോടുള്ള സ്നേഹം പങ്കുവെച്ച അദ്ദേഹം, സംസ്ഥാനത്തെ വികസന കുതിപ്പിനെ ഏറെ പ്രതീക്ഷയോടെയാണ് കാണുന്നതെന്ന് വ്യക്തമാക്കി.
കൊച്ചിയിലെത്തുന്ന പ്രധാനമന്ത്രിയുടെ ആദ്യ ഔദ്യോഗിക പരിപാടി ‘അഖില കേരള ധീവരസഭ’യുടെ സുവർണ്ണ ജൂബിലി ആഘോഷങ്ങളാണ്. മറൈൻ ഡ്രൈവിൽ നടക്കുന്ന ഈ ചടങ്ങ് കേരളത്തിലെ മത്സ്യത്തൊഴിലാളി സമൂഹത്തിനായുള്ള ഒരു വലിയ കേന്ദ്രതല ഇടപെടലായാണ് വിലയിരുത്തപ്പെടുന്നത്. മത്സ്യത്തൊഴിലാളികളുടെ ക്ഷേമത്തിനായി ഈ സംഘടന നടത്തുന്ന പ്രവർത്തനങ്ങൾ ശ്രദ്ധേയമാണെന്ന് പ്രധാനമന്ത്രി തന്റെ പോസ്റ്റിൽ പ്രത്യേകം സൂചിപ്പിച്ചിരുന്നു.
Also Read: കേരളത്തിൽ കനത്ത വേനൽ; ചൂടിനെ നേരിടാൻ ഓരോ ജില്ലയ്ക്കും ഒരു കോടി രൂപ വീതം അനുവദിച്ചു
പെട്രോളിയം-കെമിക്കൽ മേഖലയിലെ വിപ്ലവകരമായ മാറ്റത്തിന് തുടക്കമിട്ട് കൊച്ചി ബിപിസിഎൽ റിഫൈനറിയിൽ 5,500 കോടി ചെലവിൽ നിർമ്മിക്കുന്ന പോളിപ്രൊഫൈലിൻ യൂണിറ്റിന് പ്രധാനമന്ത്രി ഇന്ന് തറക്കല്ലിടും. പാക്കേജിംഗ്, മെഡിക്കൽ ഉപകരണങ്ങൾ, ടെക്സ്റ്റൈൽസ് തുടങ്ങിയ മേഖലകളിൽ വലിയ മുന്നേറ്റം നൽകാൻ ഈ യൂണിറ്റിന് സാധിക്കും. പ്രതിവർഷം 400 കിലോ ടൺ ഉൽപ്പാദന ശേഷിയുള്ള ഈ പദ്ധതി വഴി കേരളത്തിൽ നിരവധി പുതിയ തൊഴിലവസരങ്ങൾ സൃഷ്ടിക്കപ്പെടും.
കേരളത്തിലെ ഗതാഗത കുരുക്കിന് വലിയ പരിഹാരമാകുന്ന രണ്ട് മെഗാ ഹൈവേ പ്രോജക്റ്റുകളാണ് ഇന്ന് ഉദ്ഘാടനം ചെയ്യപ്പെടുന്നത്. 2,650 കോടി ചെലവിൽ പൂർത്തിയാക്കിയ NH 66-ലെ തലപ്പാടി – ചെങ്കള സെക്ഷനും, 2,140 കോടി ചെലവിൽ നിർമ്മിച്ച വെങ്കലം – രാമനാട്ടുകര കോഴിക്കോട് ബൈപാസും ഇന്ന് ജനങ്ങൾക്കായി തുറന്നുകൊടുക്കും. .
കൂടാതെ വികസന പരിപാടികൾക്ക് പുറമെ, കൊച്ചിയിൽ നടക്കുന്ന എൻഡിഎ തിരഞ്ഞെടുപ്പ് കൺവെൻഷനിലും പ്രധാനമന്ത്രി സംസാരിക്കും. തൃശൂർ, എറണാകുളം ജില്ലകളിൽ നിന്നുള്ള ആയിരക്കണക്കിന് പാർട്ടി പ്രവർത്തകരെ അദ്ദേഹം അഭിസംബോധന ചെയ്യും. കേരളത്തിലെ സന്ദർശനത്തിന് ശേഷം വൈകുന്നേരം അദ്ദേഹം തമിഴ്നാട്ടിലെ തിരുച്ചിറപ്പള്ളിയിലേക്ക് തിരിക്കും.
The post പ്രധാനമന്ത്രി ഇന്ന് കൊച്ചിയിൽ; എൻ.എച്ച് 66 റീച്ചുകളടക്കം 10,800 കോടിയുടെ പദ്ധതികൾ സമർപ്പിക്കും appeared first on Express Kerala.
