സീറ്റ് ചർച്ചകളിൽ അതൃപ്തി; ഡൽഹിയിൽ നിന്ന് മടങ്ങി കെ. സുധാകരൻ

നിയമസഭാ തിരഞ്ഞെടുപ്പിലെ സ്ഥാനാർത്ഥി നിർണ്ണയത്തെച്ചൊല്ലിയുള്ള തർക്കത്തെത്തുടർന്ന് കെ. സുധാകരൻ എം.പി കടുത്ത അതൃപ്തിയോടെ ഡൽഹിയിൽ നിന്ന് കേരളത്തിലേക്ക് മടങ്ങി. കണ്ണൂർ മണ്ഡലത്തിൽ മത്സരിക്കാനുള്ള താല്പര്യം സുധാകരൻ മുന്നോട്ടുവെച്ചെങ്കിലും, സിറ്റിംഗ് എം.പിമാർ നിയമസഭയിലേക്ക് മത്സരിക്കേണ്ടതില്ലെന്ന സംസ്ഥാന നേതൃത്വത്തിന്റെ നിലപാടാണ് അദ്ദേഹത്തെ ചൊടിപ്പിച്ചത്. ഹൈക്കമാൻഡ് വിഷയത്തിൽ വ്യക്തമായ പച്ചക്കൊടി കാട്ടാത്ത സാഹചര്യത്തിൽ, ഇന്നത്തെ നിർണ്ണായക ചർച്ചകളിൽ പങ്കെടുക്കാതെയാണ് അദ്ദേഹം മടങ്ങിയത്.

കെപിസിസി പ്രസിഡന്റ് സണ്ണി ജോസഫ്, പ്രതിപക്ഷ നേതാവ് വി.ഡി. സതീശൻ തുടങ്ങിയ പ്രമുഖ നേതാക്കൾ ഡൽഹിയിൽ ക്യാമ്പ് ചെയ്ത് അനുനയ ചർച്ചകൾ നടത്തിയെങ്കിലും ഫലമുണ്ടായില്ല. സുധാകരനെ കൂടാതെ അടൂർ പ്രകാശ് ഉൾപ്പെടെയുള്ള മറ്റ് ചില എം.പിമാരും മത്സരരംഗത്തിറങ്ങാൻ സമ്മർദ്ദം ചെലുത്തുന്നുണ്ടെന്നാണ് സൂചനകൾ. പ്രതിഷേധത്തിന്റെ ഭാഗമായാണോ മടങ്ങുന്നത് എന്ന മാധ്യമങ്ങളുടെ ചോദ്യത്തിന് പ്രതികരിക്കാൻ സുധാകരൻ തയ്യാറായില്ല. നിലവിലെ സാഹചര്യം കേരളത്തിലെ കോൺഗ്രസ് നേതൃത്വത്തിന് വലിയ തലവേദനയാണ് സൃഷ്ടിക്കുന്നത്.

The post സീറ്റ് ചർച്ചകളിൽ അതൃപ്തി; ഡൽഹിയിൽ നിന്ന് മടങ്ങി കെ. സുധാകരൻ appeared first on Express Kerala.