കുഞ്ഞുവായിൽ ‘വലിയ’ വർത്തമാനം; മോശം വാക്കുകൾ കുട്ടി പഠിക്കുന്നത് എവിടെ നിന്ന്? പരിഹാരമിതാ!

കുട്ടികൾ മുതിർന്നവരുടെ സംസാരവും പെരുമാറ്റവും അനുകരിക്കുന്നത് മാതാപിതാക്കൾക്ക് എന്നും കൗതുകമുള്ള കാഴ്ചയാണ്. എന്നാൽ മുതിർന്നവർ പറയുന്ന കാര്യങ്ങൾ അതേപടി പകർത്തുമ്പോൾ അതിൽ മോശം വാക്കുകളോ അശ്ലീല ചുവയുള്ള പദങ്ങളോ കടന്നുവരുന്നത് പലപ്പോഴും രക്ഷിതാക്കളെ വലിയ രീതിയിൽ അസ്വസ്ഥരാക്കാറുണ്ട്. കുട്ടികൾ ഇത്തരം വാക്കുകൾ എവിടെ നിന്ന് പഠിക്കുന്നുവെന്നും അവ എങ്ങനെ ഫലപ്രദമായി തിരുത്താമെന്നും വ്യക്തമാക്കുകയാണ് കൗൺസിലറും പേഴ്സണാലിറ്റി ഡെവലപ്മെന്റ് സ്കിൽ ട്രെയിനറുമായ ശാരിക സന്ദീപ്.

കുട്ടികൾ ഇത്തരം വാക്കുകൾ പ്രധാനമായും പഠിക്കുന്നത് തങ്ങളുടെ ചുറ്റുപാടുകളിൽ നിന്നുതന്നെയാണ്. വീട്ടിലുള്ളവരോ അയൽപക്കത്തുള്ളവരോ സംസാരിക്കുമ്പോൾ ഉപയോഗിക്കുന്ന പ്രത്യേക ശബ്ദ വ്യതിയാനങ്ങളും മുഖഭാവങ്ങളും കുട്ടികളെ പെട്ടെന്ന് ആകർഷിക്കുന്നു. ദേഷ്യപ്പെടുമ്പോഴോ തമാശ പറയുമ്പോഴോ ഇത്തരം വാക്കുകൾക്ക് ലഭിക്കുന്ന അമിത പ്രാധാന്യം കുട്ടികൾ നിരീക്ഷിക്കുകയും അത് അനുകരിക്കാൻ ശ്രമിക്കുകയും ചെയ്യുന്നു. അതിനാൽ കുട്ടികൾക്ക് മുന്നിൽ സംസാരിക്കുമ്പോൾ മുതിർന്നവർ അതീവ ജാഗ്രത പാലിക്കേണ്ടതുണ്ട്. വീട്ടിൽ ആരെങ്കിലും മോശം വാക്കുകൾ ഉപയോഗിക്കുന്നുണ്ടെങ്കിൽ അത് കുട്ടികളുടെ സാന്നിധ്യത്തിൽ ഒഴിവാക്കാൻ കർശനമായി നിർദ്ദേശിക്കണം.

Also Read: ഉറങ്ങാത്ത ഇന്ത്യ; നമ്മളെ കാർന്നുതിന്നുന്ന ‘നിശബ്ദ പകർച്ചവ്യാധി’!

കുട്ടി ഒരു മോശം വാക്ക് ഉപയോഗിച്ചാൽ ഉടൻ തന്നെ അതിനെ പ്രതിരോധിക്കാനുള്ള ഏറ്റവും നല്ല മാർഗ്ഗം ആ വാക്കിന് പകരമായി സമാനമായതോ അല്ലെങ്കിൽ കേൾക്കാൻ രസകരമായതോ ആയ ഒരു നല്ല വാക്ക് ശീലിപ്പിക്കുക എന്നതാണ്. കുട്ടികൾക്ക് ചിരിയോ കൗതുകമോ തോന്നുന്ന വാക്കുകൾ തിരഞ്ഞെടുത്ത് അത് ആവർത്തിച്ചു പറയാൻ അവരെ പ്രേരിപ്പിക്കണം. ക്രമേണ മോശം വാക്കിന് പകരം ആ നല്ല വാക്ക് കുട്ടിയുടെ സംസാരത്തിന്റെ ഭാഗമായി മാറും. കുട്ടികൾ നല്ല രീതിയിൽ സംസാരിക്കുമ്പോൾ അവരെ അഭിനന്ദിക്കാനും ചെറിയ സമ്മാനങ്ങളോ അവർക്കിഷ്ടപ്പെട്ട ഭക്ഷണങ്ങളോ നൽകി പ്രോത്സാഹിപ്പിക്കാനും ശ്രദ്ധിക്കണം. ഇത് നല്ല രീതിയിൽ സംസാരിക്കാൻ അവർക്ക് വലിയ പ്രചോദനമാകും.

കുട്ടികൾ മോശം വാക്കുകൾ പറയുമ്പോൾ അവരെ ക്രൂരമായി ശിക്ഷിക്കുന്നതിനോ വഴക്ക് പറയുന്നതിനോ പകരം സ്നേഹത്തോടെ കാര്യങ്ങൾ പറഞ്ഞു മനസ്സിലാക്കുകയാണ് വേണ്ടത്. എന്നിട്ടും കുട്ടി ആ വാക്ക് ആവർത്തിക്കുകയാണെങ്കിൽ ആ സംസാരത്തെ പൂർണ്ണമായും അവഗണിക്കുക എന്നതാണ് മറ്റൊരു തന്ത്രം. താൻ പറയുന്ന കാര്യത്തിന് വീട്ടുകാരിൽ നിന്ന് യാതൊരു പ്രതികരണവും ലഭിക്കുന്നില്ലെന്ന് കാണുമ്പോൾ കുട്ടി സ്വഭാവികമായും ആ വാക്ക് ഉപയോഗിക്കുന്നത് നിർത്തും. ശ്രദ്ധ കിട്ടാൻ വേണ്ടിയാണ് പലപ്പോഴും കുട്ടികൾ ഇത്തരം പ്രവർത്തികൾ ചെയ്യുന്നത് എന്നതിനാൽ, മോശം കാര്യങ്ങൾ ചെയ്യുമ്പോൾ അവഗണിക്കുന്നതും നല്ല കാര്യങ്ങൾ ചെയ്യുമ്പോൾ അമിതമായി പ്രോത്സാഹിപ്പിക്കുന്നതും വഴി ഇത്തരം ശീലങ്ങൾ പൂർണ്ണമായും മാറ്റിയെടുക്കാൻ സാധിക്കുമെന്ന് ശാരിക സന്ദീപ് ചൂണ്ടിക്കാട്ടുന്നു.

NB: ഈ വാർത്തയിൽ ഉപയോഗിച്ചിരിക്കുന്ന ചിത്രം പ്രതീകാത്മകമാണ്. (Generated by AI)

The post കുഞ്ഞുവായിൽ ‘വലിയ’ വർത്തമാനം; മോശം വാക്കുകൾ കുട്ടി പഠിക്കുന്നത് എവിടെ നിന്ന്? പരിഹാരമിതാ! appeared first on Express Kerala.