അപ്രത്യക്ഷമാകുന്ന അത്ഭുതം; വംശനാശഭീഷണി നേരിട്ട് ലോകത്തിലെ ഏറ്റവും വലിയ മൂങ്ങ

രാത്രിയുടെ നിശബ്ദതയിൽ ജലാശയങ്ങൾക്ക് മുകളിൽ വട്ടമിട്ടു പറന്ന് മീനുകളെ വേട്ടയാടുന്ന അപൂർവ്വയിനം മൂങ്ങകൾ ഇന്ന് ലോകത്തിന്റെ ശ്രദ്ധാകേന്ദ്രമാവുകയാണ്. ലോകത്തിലെ ഏറ്റവും വലിയ മൂങ്ങ വർഗ്ഗമായ ‘ബ്ലാക്കിസ്റ്റോൺ ഫിഷ് ഔൾ’ അഥവാ ബൂബോ ബ്ലാക്കിസ്റ്റോണി എന്നറിയപ്പെടുന്ന ഈ പക്ഷികൾ പ്രകൃതിയിലെ അത്ഭുതകരമായ കാഴ്ചകളിൽ ഒന്നാണ്. 1883-ൽ ജപ്പാനിലെ ഹൊക്കെയ്ഡോയിൽ വെച്ച് ബ്രിട്ടിഷ് പ്രകൃതിശാസ്ത്രജ്ഞനായ തോമസ് ബ്ലാക്കിസ്റ്റോൺ ആണ് ഇവയെ ആദ്യമായി കണ്ടെത്തിയത്. ഇദ്ദേഹത്തോടുള്ള ആദരസൂചകമായാണ് ഈ പക്ഷികൾക്ക് ബ്ലാക്കിസ്റ്റോൺ എന്ന പേര് നൽകിയിരിക്കുന്നത്.

ശാരീരിക പ്രത്യേകതകൾ കൊണ്ട് ഏതൊരാളെയും അത്ഭുതപ്പെടുത്തുന്നവയാണ് ഈ മൂങ്ങകൾ. ഏകദേശം 75 സെന്റിമീറ്റർ നീളവും 4.6 കിലോയോളം ഭാരവുമുള്ള ഇവയുടെ ചിറകുവിരിവ് ഒരു മനുഷ്യന്റെ അത്രയും നീളമുള്ളതാണ്. മരങ്ങൾക്കിടയിൽ പെട്ടെന്ന് തിരിച്ചറിയാൻ കഴിയാത്ത വിധം തവിട്ടുനിറത്തിൽ കറുത്ത പുള്ളികളോടു കൂടിയ തൂവലുകളാണ് ഇവയ്ക്കുള്ളത്. മറ്റ് മൂങ്ങകളിൽ നിന്നും വ്യത്യസ്തമായി ജലാശയങ്ങളിലെ മീനുകളെയാണ് ഇവ പ്രധാനമായും ഭക്ഷണമാക്കുന്നത്. രാത്രികാലങ്ങളിൽ നദികളിലും അരുവികളിലും പതുങ്ങിയെത്തുന്ന ഇവ സാൽമൺ, ട്രൗട്ട്, കാറ്റ്ഫിഷ് തുടങ്ങിയ വലിയ മീനുകളെയും കൂടാതെ തവളകളെയും ഇരയാക്കുന്നു.

Also Read: ശരീരഭാരം കുറയ്ക്കാൻ പട്ടിണി കിടക്കണോ? വേണ്ട, ഈ പ്രോട്ടീൻ ഭക്ഷണങ്ങൾ ശീലമാക്കാം

നിലവിൽ ലോകത്താകമാനം വെറും 2000 മുതൽ 3000 വരെ ബ്ലാക്കിസ്റ്റോൺ മൂങ്ങകൾ മാത്രമേ അവശേഷിക്കുന്നുള്ളൂ എന്നാണ് കണക്കുകൾ സൂചിപ്പിക്കുന്നത്. കിഴക്കൻ റഷ്യ, ജപ്പാൻ, ഉത്തര കൊറിയ, ചൈനയുടെ ചില ഭാഗങ്ങൾ എന്നിവിടങ്ങളിൽ മാത്രമാണ് ഇവ കാണപ്പെടുന്നത്. കാലാവസ്ഥാ വ്യതിയാനവും മനുഷ്യന്റെ ഇടപെടലുകളും മൂലം ഇവയുടെ വാസസ്ഥലങ്ങൾ അതിവേഗം നശിച്ചുകൊണ്ടിരിക്കുകയാണ്. വംശനാശത്തിന്റെ വക്കിലെത്തിനിൽക്കുന്ന ഈ അപൂർവ്വ പക്ഷികളെ സംരക്ഷിക്കുന്നതിനായി വിവിധ രാജ്യങ്ങൾ ഇപ്പോൾ പ്രത്യേക പദ്ധതികൾ ആവിഷ്കരിച്ചു വരികയാണ്.

NB: ഈ വാർത്തയിൽ ഉപയോഗിച്ചിരിക്കുന്ന ചിത്രം പ്രതീകാത്മകമാണ്. (Generated by AI)

The post അപ്രത്യക്ഷമാകുന്ന അത്ഭുതം; വംശനാശഭീഷണി നേരിട്ട് ലോകത്തിലെ ഏറ്റവും വലിയ മൂങ്ങ appeared first on Express Kerala.