ഇറാന്റെ ഡ്രോണുകളെ വീഴ്ത്താൻ സഹായിക്കാം, പകരം പണം വേണം; വൊളോഡിമിർ സെലെൻസ്കി

ഇറാൻ നിർമ്മിത ഡ്രോണുകളെ പ്രതിരോധിക്കുന്നതിൽ തങ്ങൾ ആർജ്ജിച്ച വൈദഗ്ധ്യം പശ്ചിമേഷ്യൻ രാജ്യങ്ങളുമായി പങ്കുവെക്കാൻ തയ്യാറാണെന്ന് യുക്രെയ്ൻ പ്രസിഡന്റ് വൊളോഡിമിർ സെലെൻസ്കി. എന്നാൽ ഈ പ്രതിരോധ സഹായത്തിന് പകരമായി സാമ്പത്തിക പിന്തുണയും സാങ്കേതിക വിദ്യയും യുക്രെയ്നിന് നൽകണമെന്ന് അദ്ദേഹം ആവശ്യപ്പെട്ടു.

ഇറാന്റെ ഷാഹെദ് ഡ്രോണുകളെ പ്രതിരോധിക്കുന്നതിൽ യുക്രെയ്നിനുള്ള പരിചയസമ്പത്ത് ഉപയോഗപ്പെടുത്താൻ പല ഗൾഫ് രാജ്യങ്ങളും താൽപ്പര്യം പ്രകടിപ്പിച്ചിട്ടുണ്ട്. ഇതിന്റെ ഭാഗമായി ഡ്രോൺ ആക്രമണങ്ങളെ പ്രതിരോധിക്കുന്നതിനെക്കുറിച്ച് പഠിക്കാനും വിലയിരുത്താനുമായി യുക്രെയ്ൻ മൂന്ന് വിദഗ്ധ സംഘങ്ങളെ പശ്ചിമേഷ്യയിലേക്ക് അയച്ചു കഴിഞ്ഞു. നിലവിൽ ഇറാൻ ഡ്രോണുകളെ തകർക്കാൻ ഗൾഫ് രാജ്യങ്ങൾ വൻ വിലയുള്ള വ്യോമ പ്രതിരോധ മിസൈലുകളാണ് ഉപയോഗിക്കുന്നത്. ഇതിന് പകരമായി കുറഞ്ഞ ചെലവിൽ ഡ്രോണുകളെ നേരിടാനുള്ള യുക്രെയ്നിന്റെ സാങ്കേതിക വിദ്യയാണ് രാജ്യങ്ങൾ ലക്ഷ്യം വെക്കുന്നത്.

Also Read:ഇറാന്റെ സാമ്പത്തിക നട്ടെല്ലൊടിക്കാൻ ട്രംപ്; ഖാർഗ് ദ്വീപ് പിടിച്ചെടുക്കാൻ അമേരിക്കൻ സൈന്യം ഇറങ്ങിയേക്കും

“ഇറാനുമായി ഒരു യുദ്ധത്തിനല്ല ഞങ്ങൾ ലക്ഷ്യമിടുന്നത്. ഷാഹെദ് ഡ്രോണുകളെ എങ്ങനെ ഫലപ്രദമായി പ്രതിരോധിക്കാമെന്നതിൽ കൃത്യമായ വിലയിരുത്തലുകൾ നടത്തുകയാണ് ലക്ഷ്യം. നിലവിൽ യുക്രെയ്നിന് പണവും പുതിയ സാങ്കേതിക വിദ്യകളും അത്യന്താപേക്ഷിതമാണ്,” സെലെൻസ്കി വ്യക്തമാക്കി. റഷ്യയുമായുള്ള യുദ്ധത്തിൽ ഇറാൻ ഡ്രോണുകൾ വലിയ വെല്ലുവിളി ഉയർത്തുന്ന പശ്ചാത്തലത്തിലാണ് യുക്രെയ്ൻ ഈ രംഗത്ത് നൂതന പ്രതിരോധ മാർഗ്ഗങ്ങൾ വികസിപ്പിച്ചത്.

The post ഇറാന്റെ ഡ്രോണുകളെ വീഴ്ത്താൻ സഹായിക്കാം, പകരം പണം വേണം; വൊളോഡിമിർ സെലെൻസ്കി appeared first on Express Kerala.