മഹേഷ് നാരായണൻ സംവിധാനം ചെയ്യുന്ന ബ്രഹ്മാണ്ഡ ചിത്രം ‘പേട്രിയറ്റി’ന്റെ ഡബ്ബിങ് സ്റ്റുഡിയോയിൽ നിന്നുള്ള ചിത്രമാണ് മമ്മൂട്ടി തന്റെ സോഷ്യൽ മീഡിയ പേജുകളിലൂടെ പങ്കുവെച്ചത്. നടി ലിസിയുടെ ഉടമസ്ഥതയിലുള്ള ‘ലെ മാജിക് ലാന്റേൺ’ സ്റ്റുഡിയോയിലാണ് ചിത്രത്തിന്റെ ഡബ്ബിങ് പുരോഗമിക്കുന്നത്. മൈക്കിന് മുന്നിൽ അതീവ ഗൗരവത്തോടെ നിൽക്കുന്ന മമ്മൂട്ടിയുടെ ചിത്രം ഇതിനോടകം ആരാധകർ ഏറ്റെടുത്തു കഴിഞ്ഞു. ചിത്രത്തിൽ മോഹൻലാൽ നേരത്തെ തന്നെ തന്റെ ഭാഗങ്ങൾ ഡബ്ബ് ചെയ്ത് പൂർത്തിയാക്കിയിരുന്നു. സിങ്ക് സൗണ്ട് അല്ലാത്തതിനാൽ മമ്മൂട്ടിയുടെ ഘനഗാംഭീര്യമുള്ള ശബ്ദം തിയേറ്ററിൽ ആസ്വദിക്കാമെന്ന പ്രതീക്ഷയിലാണ് ആരാധകർ.
അതേസമയം, തന്റെ വളർത്തുമൃഗമായ ‘സിംബ’ എന്ന നായയ്ക്കൊപ്പമുള്ള ഹൃദ്യമായ ചിത്രമാണ് മോഹൻലാൽ പങ്കുവെച്ചത്. തരുൺ മൂർത്തി സംവിധാനം ചെയ്യുന്ന ‘L366’ എന്ന ചിത്രത്തിലെ ലുക്കിലാണ് മോഹൻലാൽ ചിത്രത്തിലുള്ളത്. “സിംബ പേരിനൊത്ത് ജീവിക്കുക മാത്രമല്ല, അതിനെ നിർവചിക്കുക കൂടിയാണ്” എന്ന അടിക്കുറിപ്പോടെയാണ് താരം ചിത്രം പങ്കുവെച്ചത്. ലാലിന്റെ വളർത്തുമൃഗങ്ങളോടുള്ള സ്നേഹം ഇതിനോടകം തന്നെ സിനിമാ ലോകത്ത് പ്രശസ്തമാണ്.
Also Read:ഷാജി പാപ്പനും സംഘവും വീണ്ടും; ബോക്സ് ഓഫീസിൽ തരംഗമായി ‘ആട് 3’ അഡ്വാൻസ് ബുക്കിങ്
മമ്മൂട്ടി, മോഹൻലാൽ, ഫഹദ് ഫാസിൽ, കുഞ്ചാക്കോ ബോബൻ, നയൻതാര തുടങ്ങി വൻ താരനിര അണിനിരക്കുന്ന ‘പേട്രിയറ്റ്’ ഏപ്രിൽ 23-ന് തിയേറ്ററുകളിലെത്തും. ആന്റോ ജോസഫ് ഫിലിം കമ്പനിയും കിച്ചപ്പു ഫിലിംസും ചേർന്നാണ് ചിത്രം നിർമ്മിക്കുന്നത്.
The post ‘പേട്രിയറ്റ്’ ഡബ്ബിങ്ങിൽ മമ്മൂട്ടി; സിംബയ്ക്കൊപ്പം മോഹൻലാൽ! സോഷ്യൽ മീഡിയയിൽ തരംഗമായി ചിത്രങ്ങൾ appeared first on Express Kerala.
