കോൺഗ്രസിന്റെ തകർച്ചയ്ക്ക് ഈ സ്ഥാനാർത്ഥി നിർണ്ണയം തുടക്കമാകും; എം.വി. ഗോവിന്ദൻ

തിരുവനന്തപുരം: കോൺഗ്രസിനുള്ളിലെ സ്ഥാനാർത്ഥി നിർണ്ണയ തർക്കങ്ങളിൽ രൂക്ഷമായ പരിഹാസവുമായി സിപിഎം സംസ്ഥാന സെക്രട്ടറി എം.വി. ഗോവിന്ദൻ രംഗത്ത്. വലിയ ആത്മവിശ്വാസത്തോടെയും എൽഡിഎഫുമായി ശക്തമായ ബലാബലം നടക്കുമെന്ന പ്രതീക്ഷയോടെയുമാണ് യുഡിഎഫ് തിരഞ്ഞെടുപ്പിനെ നേരിടാൻ ഒരുങ്ങിയതെങ്കിലും, ഇപ്പോൾ കോൺഗ്രസ് ഒരു പടപാളയമായി മാറിയിരിക്കുകയാണെന്ന് അദ്ദേഹം പറഞ്ഞു. കോൺഗ്രസിന്റെ വലിയ രീതിയിലുള്ള തകർച്ചയ്ക്ക് ഈ സ്ഥാനാർത്ഥി നിർണ്ണയം തുടക്കം കുറിക്കുമെന്നും അദ്ദേഹം കൂട്ടിച്ചേർത്തു.

സ്ഥാനാർത്ഥി പ്രഖ്യാപനം നീണ്ടുപോകുന്നതിനെ ചൂണ്ടിക്കാട്ടിയ എം.വി. ഗോവിന്ദൻ, കോൺഗ്രസ് എംപിമാർക്കിടയിലെ മത്സരമോഹത്തെയും കെ. സുധാകരന്റെ നിലപാടുകളിലെ അവ്യക്തതയെയും വിമർശിച്ചു. എൽഡിഎഫിൽ പ്രഖ്യാപിക്കാൻ ബാക്കിയുള്ള സ്ഥാനാർത്ഥികളെ ഉടൻ പ്രഖ്യാപിക്കുമെന്നും അദ്ദേഹം അറിയിച്ചു. അബ്ദുറഹ്മാൻ സ്വതന്ത്രനാണെന്നും എവിടെ മത്സരിക്കണം എന്നത് അദ്ദേഹം തന്നെ തീരുമാനിക്കട്ടെ എന്നും ചോദ്യങ്ങൾക്ക് മറുപടിയായി ഗോവിന്ദൻ വ്യക്തമാക്കി.

Also Read:സിപിഐഎമ്മിൽ രാഷ്ട്രീയ പരാജയം; കോൺഗ്രസിനെ പ്രകീർത്തിച്ച് ജി. സുധാകരന്റെ ഫേസ്ബുക്ക് പോസ്റ്റ്

അതേസമയം, കണ്ണൂരിലെ വിമതൻ ടി.കെ. ഗോവിന്ദനെക്കുറിച്ചുള്ള ചോദ്യങ്ങളിൽ നിന്ന് അദ്ദേഹം ഒഴിഞ്ഞുമാറി. ഇടതുപക്ഷത്തും ചില പ്രശ്നങ്ങൾ ശ്രദ്ധയിൽപ്പെട്ടിട്ടുണ്ടെന്നും അവ ഗൗരവത്തോടെ പരിശോധിച്ച് പരിഹരിക്കുമെന്നും അദ്ദേഹം പറഞ്ഞു. മൂന്നാം ടേം എന്നത് ആർക്കെങ്കിലും മുഖ്യമന്ത്രിയോ മന്ത്രിയോ ആകാനല്ല, മറിച്ച് വികസന പ്രവർത്തനങ്ങൾ തടസ്സമില്ലാതെ മുന്നോട്ട് കൊണ്ടുപോകാനാണെന്നും അദ്ദേഹം വ്യക്തമാക്കി.

The post കോൺഗ്രസിന്റെ തകർച്ചയ്ക്ക് ഈ സ്ഥാനാർത്ഥി നിർണ്ണയം തുടക്കമാകും; എം.വി. ഗോവിന്ദൻ appeared first on Express Kerala.