‘തിരിച്ചു പോണം’! മലയാളത്തിലെ ആദ്യ മ്യൂസിക്കൽ ഹൊറർ കോമഡി ‘കറക്ക’ത്തിലെ ഗാനം പുറത്ത്

മലയാള സിനിമയിൽ പുതിയൊരു പരീക്ഷണത്തിനൊരുങ്ങുന്ന ‘കറക്ക’ത്തിലെ ആദ്യ വീഡിയോ ഗാനം പുറത്തിറങ്ങി. മലയാളത്തിലെ ആദ്യത്തെ മ്യൂസിക്കൽ ഹൊറർ കോമഡി എന്ന വിശേഷണത്തോടെ എത്തുന്ന ചിത്രത്തിലെ ‘തിരിച്ചു പോണം’ എന്ന ഗാനമാണ് പ്രമുഖ സംഗീത ലേബലായ ടി-സീരീസിലൂടെ റിലീസ് ചെയ്തത്. ഹൊറർ പശ്ചാത്തലവും ക്രിയേറ്റീവ് ആയ ദൃശ്യാവിഷ്കാരവും ഒത്തുചേരുന്ന ഈ ഗാനം ഇതിനോടകം തന്നെ സംഗീതപ്രേമികൾക്കിടയിൽ ചർച്ചയായിക്കഴിഞ്ഞു.

സംഗീത സംവിധായകൻ സാം സി.എസ്. ഈണം നൽകിയ ഗാനം പതിവ് ശൈലികളിൽ നിന്ന് മാറി നിൽക്കുന്ന ഒന്നാണ്. അൻവർ അലി എഴുതിയ നിഗൂഢതയാർന്ന വരികൾക്ക് രശ്മി സതീഷ് തന്റെ തനതായ ശബ്ദത്തിലൂടെ ജീവൻ നൽകിയിരിക്കുന്നു. സംഗീതത്തെയും ഹൊററിനെയും കോർത്തിണക്കാനുള്ള ചിത്രത്തിന്റെ ധീരമായ ശ്രമം ഈ ഗാനത്തിലൂടെ വ്യക്തമാകുന്നുണ്ട്. സാധാരണ കേട്ടുപരിചയിച്ച ഗാനങ്ങളിൽ നിന്ന് തികച്ചും വ്യത്യസ്തമായ ഒന്നാണ് ‘തിരിച്ചു പോണം’ എന്ന് ഗായിക രശ്മി സതീഷ് അഭിപ്രായപ്പെട്ടു. ക്രൗൺ സ്റ്റാർസ് എന്റർടൈൻമെന്റിന്റെയും ബ്ലാക്ക് ടർട്ടിൽ പ്രൊഡക്ഷൻസിന്റെയും ബാനറിലാണ് ചിത്രം ഒരുങ്ങുന്നത്. ചിത്രത്തിന്റെ സംഗീതാവകാശം ടി-സീരീസിനാണ്.

The post ‘തിരിച്ചു പോണം’! മലയാളത്തിലെ ആദ്യ മ്യൂസിക്കൽ ഹൊറർ കോമഡി ‘കറക്ക’ത്തിലെ ഗാനം പുറത്ത് appeared first on Express Kerala.