നിയമസഭാ പോരാട്ടത്തിന് ഇന്ന് അന്തിമ പട്ടിക; പത്രിക പിൻവലിക്കാനുള്ള സമയം ഇന്ന് അവസാനിക്കും

തിരുവനന്തപുരം: കേരള നിയമസഭാ തിരഞ്ഞെടുപ്പിലെ സ്ഥാനാർത്ഥി പട്ടികയ്ക്ക് ഇന്ന് അന്തിമ രൂപമാകും. നാമനിർദ്ദേശ പത്രിക പിൻവലിക്കാനുള്ള അവസാന തീയതി ഇന്ന് അവസാനിക്കുന്നതോടെ മത്സരരംഗത്ത് ആരൊക്കെയുണ്ടാകുമെന്ന കാര്യത്തിൽ വ്യക്തമായ ചിത്രം ലഭിക്കും. സൂക്ഷ്മ പരിശോധനയ്ക്ക് ശേഷം നിലവിൽ 985 സ്ഥാനാർത്ഥികളാണ് സംസ്ഥാനത്താകെ മത്സരരംഗത്തുള്ളത്. ആകെ 1254 പേർ പത്രിക സമർപ്പിച്ചിരുന്നെങ്കിലും വിവിധ കാരണങ്ങളാൽ 269 പേരുടെ പത്രികകൾ തള്ളിയിരുന്നു. പ്രധാന മുന്നണികളുടെ സ്ഥാനാർത്ഥികളുടെയെല്ലാം പത്രികകൾ അംഗീകരിക്കപ്പെട്ടത് രാഷ്ട്രീയ കേന്ദ്രങ്ങൾക്ക് ആശ്വാസമായിട്ടുണ്ട്.

പത്രിക പിൻവലിക്കാനുള്ള സമയം കഴിയുന്നതോടെ വിമതർ എത്രപേർ മത്സരരംഗത്ത് ഉറച്ചുനിൽക്കുമെന്നും അപരന്മാരുടെ ഭീഷണി എവിടെയൊക്കെ ഉണ്ടാവുമെന്നും വൈകുന്നേരത്തോടെ അറിയാൻ സാധിക്കും. ഡമ്മി സ്ഥാനാർത്ഥികൾ പത്രിക പിൻവലിച്ചു തുടങ്ങിയിട്ടുണ്ട്. ഇന്ന് വൈകുന്നേരം അഞ്ചു മണിയോടെ ഓരോ മണ്ഡലത്തിലെയും അന്തിമ സ്ഥാനാർത്ഥി പട്ടിക തിരഞ്ഞെടുപ്പ് കമ്മീഷൻ ഔദ്യോഗികമായി പുറത്തുവിടും. ഇതോടെ വോട്ടഭ്യർത്ഥനയുമായി മുന്നണികൾ രണ്ടാംഘട്ട പ്രചാരണത്തിലേക്ക് കടക്കും.

Also Read:കേരളത്തിൽ മാറ്റം ഉറപ്പ്; പോരാട്ടം യുഡിഎഫും എൽഡിഎഫും തമ്മിലെന്ന് ശശി തരൂർ

അതേസമയം, തിരഞ്ഞെടുപ്പ് പ്രചാരണം കൊഴുക്കുന്നതിനിടെ രാഷ്ട്രീയ ആരോപണങ്ങളും ശക്തമായിട്ടുണ്ട്. കേരളത്തിൽ സി.പി.ഐ.എം – ബി.ജെ.പി അന്തർധാരയുണ്ടെന്ന് ലോക്സഭാ പ്രതിപക്ഷ നേതാവ് രാഹുൽ ഗാന്ധി ആവർത്തിച്ചു. കോഴിക്കോട് നടന്ന യു.ഡി.എഫിന്റെ മഹാറാലിയിൽ സംസാരിക്കുകയായിരുന്നു അദ്ദേഹം. രാജ്യത്തെ മറ്റ് പ്രതിപക്ഷ നേതാക്കളെ വേട്ടയാടുന്ന കേന്ദ്ര ഏജൻസികൾ കേരള മുഖ്യമന്ത്രി പിണറായി വിജയനെ തൊടാത്തത് എന്തുകൊണ്ടാണെന്ന് രാഹുൽ ചോദിച്ചു. ഇത് ബി.ജെ.പിയുടെ രാഷ്ട്രീയ സംരക്ഷണമാണെന്നും അദ്ദേഹം ആരോപിച്ചു. റാലിയിൽ കോൺഗ്രസിന്റെ ‘ഇന്ദിരാ ഗ്യാരന്റി’ പദ്ധതികളും അദ്ദേഹം പ്രഖ്യാപിച്ചു.

The post നിയമസഭാ പോരാട്ടത്തിന് ഇന്ന് അന്തിമ പട്ടിക; പത്രിക പിൻവലിക്കാനുള്ള സമയം ഇന്ന് അവസാനിക്കും appeared first on Express Kerala.