തെരഞ്ഞെടുപ്പ് കമ്മീഷനെതിരെ വ്യാജ AI വീഡിയോ നീക്കം ചെയ്തില്ല! ‘എക്‌സി’നെതിരെ സൈബർ പോലീസ് കേസെടുത്തു

തെരഞ്ഞെടുപ്പ് കമ്മീഷനെ അധിക്ഷേപിക്കുന്ന തരത്തിലുള്ള എഐ നിർമ്മിത വീഡിയോ നീക്കം ചെയ്യാത്തതിനെത്തുടർന്ന് പ്രമുഖ സമൂഹമാധ്യമമായ എക്‌സിനെതിരെ സൈബർ പോലീസ് കേസെടുത്തു. സിന്തറ്റിക് രീതിയിൽ നിർമ്മിച്ച വ്യാജ വിവരങ്ങൾ രണ്ട് മണിക്കൂറിനുള്ളിൽ നീക്കം ചെയ്യണമെന്ന കർശന നിർദ്ദേശം പാലിക്കാത്തതിനെത്തുടർന്നാണ് നടപടി. വീഡിയോ പോസ്റ്റ് ചെയ്ത ലക്ഷ്മി എൻ. രാജു എന്ന അക്കൗണ്ട് ഉടമയെയും പ്രതിപ്പട്ടികയിൽ ഉൾപ്പെടുത്തിയിട്ടുണ്ട്. വീഡിയോ നീക്കം ചെയ്യാൻ കമ്മീഷൻ നിർദ്ദേശപ്രകാരം പോലീസ് നോട്ടീസ് നൽകിയിരുന്നെങ്കിലും, അത് നീക്കം ചെയ്യില്ലെന്ന നിലപാടാണ് എക്‌സ് അധികൃതർ സ്വീകരിച്ചത്.

തെരഞ്ഞെടുപ്പിനെ സ്വാധീനിക്കുന്നതോ കമ്മീഷനെ അധിക്ഷേപിക്കുന്നതോ ആയ ഉള്ളടക്കങ്ങൾ നീക്കം ചെയ്യുന്നതിന്റെ ഭാഗമായി വലിയ തോതിലുള്ള നടപടികളാണ് സൈബർ ഡിവിഷൻ സ്വീകരിച്ചു വരുന്നത്. ഇതിനോടകം ഫേസ്ബുക്കിലെ 320 പോസ്റ്റുകളും ഇൻസ്റ്റാഗ്രാമിലെ 59 പോസ്റ്റുകളും നീക്കം ചെയ്തിട്ടുണ്ട്. എക്‌സിലെ 270 പോസ്റ്റുകൾക്ക് നോട്ടീസ് നൽകിയതിൽ 40 എണ്ണം നീക്കം ചെയ്യപ്പെട്ടു. സൈബർ പട്രോളിംഗിലൂടെ കണ്ടെത്തുന്ന ഇത്തരം നിയമലംഘനങ്ങൾ അപ്പപ്പോൾ തന്നെ തെരഞ്ഞെടുപ്പ് കമ്മീഷനെ അറിയിക്കുന്നുണ്ടെന്നും കമ്മീഷന്റെ നിർദ്ദേശപ്രകാരമാണ് തുടർനടപടികൾ സ്വീകരിക്കുന്നതെന്നും പോലീസ് വ്യക്തമാക്കി.

The post തെരഞ്ഞെടുപ്പ് കമ്മീഷനെതിരെ വ്യാജ AI വീഡിയോ നീക്കം ചെയ്തില്ല! ‘എക്‌സി’നെതിരെ സൈബർ പോലീസ് കേസെടുത്തു appeared first on Express Kerala.