മഴക്കെടുതിയെ നേരിടാൻദുബായ്; 1,300 ജീവനക്കാരും നൂതന നിരീക്ഷണ സംവിധാനങ്ങളും രംഗത്ത്

ദുബായ്: യുഎഇയിൽ വരും ദിവസങ്ങളിലും പ്രതികൂല കാലാവസ്ഥ തുടരുമെന്ന പ്രവചനത്തിന്റെ പശ്ചാത്തലത്തിൽ, നഗരത്തിലെ വെള്ളക്കെട്ട് ഒഴിവാക്കാനും ഗതാഗത സുരക്ഷ ഉറപ്പാക്കാനും വിപുലമായ സജ്ജീകരണങ്ങളുമായി ദുബായ് റോഡ്‌സ് ആൻഡ് ട്രാൻസ്‌പോർട്ട് അതോറിറ്റി. 500-ലേറെ ടാങ്കറുകൾ, 380 പമ്പിങ് യൂണിറ്റുകൾ, 100 അടിയന്തര വാഹനങ്ങൾ എന്നിവയ്‌ക്കൊപ്പം 1,300-ഓളം സാങ്കേതിക വിദഗ്ധരെയാണ് ഏത് സാഹചര്യത്തെയും നേരിടാൻ സജ്ജമാക്കിയിരിക്കുന്നത്.

2024 ഏപ്രിലിൽ രാജ്യം സാക്ഷ്യം വഹിച്ച റെക്കോർഡ് മഴയുടെ അനുഭവങ്ങൾ മുൻനിർത്തിയാണ് ആർ.ടി.എ. ഇത്തവണ ദീർഘകാല പ്രതിരോധ പദ്ധതികൾ ആവിഷ്കരിച്ചിരിക്കുന്നത്. അന്ന് 24 മണിക്കൂറിനുള്ളിൽ പെയ്തിറങ്ങിയ 250 മില്ലിമീറ്റർ മഴ നഗരജീവിതത്തെ സാരമായി ബാധിച്ചിരുന്നു. മെട്രോ സ്റ്റേഷനുകളിലടക്കം ഉണ്ടായ തടസ്സങ്ങൾ കണക്കിലെടുത്ത്, ഇത്തവണ കൂടുതൽ കാര്യക്ഷമമായ നിരീക്ഷണ സംവിധാനങ്ങളാണ് ഒരുക്കിയിട്ടുള്ളത്.

Also Read: ലോകത്തെ വിസ്മയിപ്പിച്ച് മലയാളി ഫോട്ടോഗ്രാഫർ; ആപ്പിളിന്റെ ഔദ്യോഗിക ‘പാർട്ണർ’ പദവിയിൽ ആദ്യ ഇന്ത്യക്കാരനായി റാഷിദ് ഷെരീഫ്

നൂതന സാങ്കേതികവിദ്യയുടെ സഹായത്തോടെ പ്രവർത്തിക്കുന്ന ‘ജോയിന്റ് വെതർ കണ്ടീഷൻസ് കമാൻഡ് റൂം’ വഴിയാണ് പ്രവർത്തനങ്ങൾ ഏകോപിപ്പിക്കുന്നത്. ആർ.ടി.എ.യുടെ ഏകീകൃത ആശയവിനിമയ പ്ലാറ്റ്‌ഫോം വഴി നഗരത്തിലെ 30 പ്രധാന സേവന കേന്ദ്രങ്ങളിലെ സ്ഥിതിഗതികൾ തത്സമയം വിലയിരുത്താൻ സാധിക്കും. 2040-ഓടെ ഏകദേശം 30 ലക്ഷം താമസക്കാർക്ക് പ്രയോജനപ്പെടുന്ന രീതിയിലാണ് ഈ പ്ലാറ്റ്‌ഫോം വികസിപ്പിച്ചിരിക്കുന്നത്. ദുബായ് പോലീസ്, സിവിൽ ഡിഫൻസ്, ആംബുലൻസ് വിഭാഗം എന്നിവരുമായി ചേർന്ന് സംയുക്തമായാണ് അതോറിറ്റി പ്രവർത്തനങ്ങൾ നടത്തുന്നത്.

കാലാവസ്ഥാ വ്യതിയാനങ്ങൾ നിരീക്ഷിക്കാനും അടിയന്തര ഘട്ടങ്ങളിൽ വേഗത്തിൽ തീരുമാനങ്ങൾ എടുക്കാനും ഈ കൺട്രോൾ റൂം സംവിധാനം സഹായിക്കുന്നുണ്ട്. വരും ദിവസങ്ങളിൽ യാത്ര ചെയ്യുന്നവർ അതീവ ജാഗ്രത പാലിക്കണമെന്ന് ആർ.ടി.എ. ഉദ്യോഗസ്ഥനായ അൽ അലി അറിയിച്ചു. യാത്രകൾ മുൻകൂട്ടി പ്ലാൻ ചെയ്യണമെന്നും റോഡിലെ സാഹചര്യങ്ങൾക്കനുസരിച്ച് ഡ്രൈവിങ്ങിൽ മാറ്റം വരുത്തണമെന്നും അധികൃതർ കർശന നിർദ്ദേശം നൽകിയിട്ടുണ്ട്.

NB: ഈ വാർത്തയിൽ ഉപയോഗിച്ചിരിക്കുന്ന ചിത്രം പ്രതീകാത്മകമാണ്. (Generated by AI)

The post മഴക്കെടുതിയെ നേരിടാൻദുബായ്; 1,300 ജീവനക്കാരും നൂതന നിരീക്ഷണ സംവിധാനങ്ങളും രംഗത്ത് appeared first on Express Kerala.