മുംബൈ ഇന്ത്യൻസ് ആരാധകർക്ക് ആവേശം നൽകുന്ന വാർത്തകളാണ് പുറത്തുവരുന്നത്. 2019-ലും 2020-ലും ഐപിഎൽ കിരീടങ്ങൾ തൂത്തുവാരിയ ആ കരുത്തുറ്റ മുംബൈ നിരയെ ഓർമ്മിപ്പിക്കുന്ന തരത്തിലുള്ള ഒരു വമ്പൻ സ്ക്വാഡിനെയാണ് 2026 സീസണിലേക്ക് മുംബൈ ഇന്ത്യൻസ് അണിനിരത്തുന്നത്. അഞ്ച് വർഷത്തെ കാത്തിരിപ്പിന് ശേഷം ആറാം കിരീടം മുംബൈയിൽ എത്തിക്കാനുറച്ചാണ് ടീമിന്റെ നീക്കം.
പഴയ പോരാളികൾ തിരിച്ചെത്തുന്നു
2019, 2020 സീസണുകളിൽ മുംബൈയുടെ വിജയശില്പികളായിരുന്ന എട്ട് പ്രധാന താരങ്ങൾ ഇത്തവണത്തെ 25 അംഗ സ്ക്വാഡിലുണ്ട്. രോഹിത് ശർമ്മ, സൂര്യകുമാർ യാദവ്, ഹാർദിക് പാണ്ഡ്യ, ജസ്പ്രീത് ബുമ്ര എന്നീ കോർ ടീമിനൊപ്പം ക്വിന്റൺ ഡി കോക്ക്, ട്രെന്റ് ബോൾട്ട്, മായങ്ക് മാർഖണ്ഡെ, ഷെർഫെയ്ൻ റുഥർഫോർഡ് എന്നിവർ കൂടി ചേരുമ്പോൾ മുംബൈയുടെ ബെഞ്ച് സ്ട്രെങ്ത് കൂടുന്നു. വിരമിക്കലിൽ നിന്ന് മടങ്ങിയെത്തിയ ഡി കോക്കിനെ കേവലം ഒരു കോടി രൂപയ്ക്ക് സ്വന്തമാക്കാൻ കഴിഞ്ഞത് ലേലത്തിലെ മുംബൈയുടെ മാസ്റ്റർ സ്ട്രോക്കായി കരുതപ്പെടുന്നു.
Also Read: ഗില്ലിന് പരിക്ക്, സഞ്ജു വീണ്ടും ഓപ്പണറായേക്കും! ദക്ഷിണാഫ്രിക്കക്കെതിരെ പരമ്പര നേടാൻ ഇന്ത്യ നാളെ ഇറങ്ങും
ആരെ കളിപ്പിക്കും? മുംബൈയുടെ ‘മധുരമുള്ള’ തലവേദന
ടീമിലെ ഓരോ സ്ഥാനത്തേക്കും ലോകോത്തര താരങ്ങൾ തമ്മിലുള്ള മത്സരമാണ് നടക്കുന്നത്.
ഓപ്പണിംഗ്: രോഹിതിനൊപ്പം ഡി കോക്കോ അതോ കഴിഞ്ഞ സീസണിലെ കണ്ടെത്തലായ റിയാൻ റിക്കൽട്ടണോ ഇറങ്ങുക എന്നത് ഫോമിനെ ആശ്രയിച്ചിരിക്കും.
ബാറ്റിംഗ് കരുത്ത്: സൂര്യകുമാർ, തിലക് വർമ്മ, ഹാർദിക് പാണ്ഡ്യ എന്നിവർ അടങ്ങുന്ന മധ്യനിര ഏത് ബൗളിംഗ് നിരയെയും തകർക്കാൻ കെൽപ്പുള്ളവരാണ്.
ഓൾറൗണ്ട് ഡെപ്ത്: മിച്ചൽ സാന്റ്നർ, കോർബിൻ ബോഷ്, ഷാർദൂൽ താക്കൂർ, ദീപക് ചഹർ എന്നിവരുടെ സാന്നിധ്യം ടീമിന്റെ ബാറ്റിംഗ് ഡെപ്ത് വർദ്ധിപ്പിക്കുന്നു. വിൽ ജാക്സ് എന്ന ഇംഗ്ലണ്ട് താരം കൂടി എത്തുന്നതോടെ ഇലവൻ തിരഞ്ഞെടുക്കുക എന്നത് മാനേജ്മെന്റിന് വലിയ വെല്ലുവിളിയാകും.
സ്പിൻ-പേസ് കൂട്ടുകെട്ട്
ബുമ്രയ്ക്കും ബോൾട്ടിനുമൊപ്പം അർഷ്ദീപിന് പകരം ദീപക് ചഹറോ ശാർദൂലോ എത്തുമ്പോൾ പേസ് നിര ശക്തം. സ്പിൻ വിഭാഗത്തിൽ കുൽദീപ് യാദവിന് പകരം മാർഖണ്ഡെയും ഗസൻഫാറും സാന്റ്നറും ചേരുന്നതോടെ എതിരാളികളെ കറക്കിവീഴ്ത്താൻ മുംബൈ സജ്ജം. പേപ്പറിൽ നോക്കിയാൽ നിലവിലെ ചാമ്പ്യന്മാരായ ആർസിബിയേക്കാൾ ഒരുപടി മുന്നിലാണ് മുംബൈ ഇന്ത്യൻസ്. ദൈവത്തിന്റെ പോരാളികൾ ആറാം സ്വർണ്ണക്കപ്പിനായി പടയൊരുക്കം പൂർത്തിയാക്കിക്കഴിഞ്ഞു.
The post എതിരാളികൾക്ക് നെഞ്ചിടിപ്പ്! 2020-ലെ ആ മാരക ഫോമിലേക്ക് മുംബൈ ഇന്ത്യൻസ്; ആറാം കിരീടം ഉറപ്പ് appeared first on Express Kerala.