കുവൈത്തിലെ തുറമുഖങ്ങൾക്ക് നേരെ ഡ്രോൺ ആക്രമണം; ആളപായമില്ല, സുരക്ഷ ശക്തമാക്കി

കുവൈത്ത് : കുവൈത്തിലെ പ്രധാന തുറമുഖങ്ങളെ ലക്ഷ്യമിട്ട് വെള്ളിയാഴ്ച പുലർച്ചെ ഡ്രോൺ ആക്രമണമുണ്ടായതായി അധികൃതർ സ്ഥിരീകരിച്ചു. രാജ്യത്തെ ഷുവൈഖ്, മുബാറക് അൽ-കബീർ എന്നീ തുറമുഖങ്ങൾക്ക് നേരെയാണ് ആക്രമണം നടന്നത്. സംഭവത്തിൽ ആളപായമൊന്നും റിപ്പോർട്ട് ചെയ്തിട്ടില്ലെങ്കിലും വസ്തുവകകൾക്ക് നാശനഷ്ടങ്ങൾ സംഭവിച്ചിട്ടുണ്ട്.

ഷുവൈഖ് തുറമുഖത്തെ ലക്ഷ്യമിട്ട് പുലർച്ചെയോടെ ശത്രു ഡ്രോണുകൾ എത്തിയതായി കുവൈത്ത് പോർട്സ് അതോറിറ്റി അറിയിച്ചു. ആക്രമണത്തെത്തുടർന്ന് സർക്കാർ കമ്മ്യൂണിക്കേഷൻ സെന്‍റർ പുറത്തിറക്കിയ പ്രസ്താവനയിൽ, അടിയന്തര പ്രതികരണ സംവിധാനങ്ങൾ ഉടനടി സജീവമാക്കിയതായും സ്ഥിതിഗതികൾ നിയന്ത്രണവിധേയമാണെന്നും വ്യക്തമാക്കി. നാശനഷ്ടങ്ങളുടെ വ്യാപ്തി കണക്കാക്കുന്നതിനായി വിവിധ സർക്കാർ ഏജൻസികളുടെ ഏകോപനത്തോടെ പരിശോധനകൾ നടന്നുവരികയാണ്.

Also Read: മഴക്കെടുതിയെ നേരിടാൻദുബായ്; 1,300 ജീവനക്കാരും നൂതന നിരീക്ഷണ സംവിധാനങ്ങളും രംഗത്ത്

സമാനമായ രീതിയിൽ മുബാറക് അൽ-കബീർ തുറമുഖത്തിന് നേരെയും ആക്രമണമുണ്ടായി. ലോയിറ്ററിംഗ് മ്യൂനിഷനുകളും ഡ്രോണുകളും ഉപയോഗിച്ചുള്ള ഇരട്ട ആക്രമണമാണ് ഇവിടെ നടന്നതെന്ന് പൊതുമരാമത്ത് മന്ത്രാലയം അറിയിച്ചു. തുറമുഖത്തെ അടിസ്ഥാന സൗകര്യങ്ങൾക്ക് കേടുപാടുകൾ സംഭവിച്ചിട്ടുണ്ട്. രക്ഷാപ്രവർത്തന സംഘങ്ങൾ സ്ഥലത്തെത്തി സ്ഥിതിഗതികൾ വിലയിരുത്തി വരികയാണ്.

ആക്രമണങ്ങളുടെ പശ്ചാത്തലത്തിൽ രാജ്യത്തുടനീളം അതീവ ജാഗ്രതാ നിർദ്ദേശം നൽകിയിട്ടുണ്ട്. ആഭ്യന്തര മന്ത്രാലയ അണ്ടർസെക്രട്ടറി മേജർ ജനറൽ അബ്ദുൽ വഹാബ് അൽ-വഹീബ് വിവിധ സുരക്ഷാ ചെക്ക്‌പോസ്റ്റുകൾ നേരിട്ട് സന്ദർശിച്ച് സ്ഥിതിഗതികൾ വിലയിരുത്തി. സുരക്ഷാ വിന്യാസവും നിലവിലെ മുൻകരുതൽ നടപടികളും അവലോകനം ചെയ്ത അദ്ദേഹം, രാജ്യത്തിന്‍റെ സ്ഥിരത ഉറപ്പാക്കുന്നതിൽ സുരക്ഷാ സേനയുടെ പങ്ക് നിർണ്ണായകമാണെന്ന് ഓർമ്മിപ്പിച്ചു. ഉന്നത ഉദ്യോഗസ്ഥരും സന്ദർശന വേളയിൽ അദ്ദേഹത്തോടൊപ്പമുണ്ടായിരുന്നു.

The post കുവൈത്തിലെ തുറമുഖങ്ങൾക്ക് നേരെ ഡ്രോൺ ആക്രമണം; ആളപായമില്ല, സുരക്ഷ ശക്തമാക്കി appeared first on Express Kerala.