യുദ്ധം ഇറാന് വൻ നേട്ടമാകുന്നു, അമേരിക്കയുടെ താഡ് സംവിധാനങ്ങൾ പരക്കെ തകർന്നു, ചുങ്കം വഴിയും നേട്ടം

ലോകം കണ്ട ഏറ്റവും കരുത്തുറ്റ സുരക്ഷാ കവചത്തിന് വിള്ളൽ വീണോ എന്നും അമേരിക്കയുടെ അപ്രമാദിത്യം തകർന്നടിയുകയാണോ എന്നുമുള്ള ഗൗരവമേറിയ ചോദ്യങ്ങളാണ് ഇപ്പോൾ ആഗോളതലത്തിൽ ഉയരുന്നത്. വൻശക്തിയായ അമേരിക്കയുടെ വ്യോമ പ്രതിരോധ സംവിധാനങ്ങൾ വലിയ പ്രതിസന്ധി നേരിടുന്നു എന്ന തരത്തിലുള്ള ഞെട്ടിക്കുന്ന വിവരങ്ങളാണ് പുറത്തുവരുന്നത്. അമേരിക്കൻ കോൺഗ്രസിന്റെ ഏറ്റവും പുതിയ റിപ്പോർട്ട് പ്രകാരം അമേരിക്കൻ വ്യോമ പ്രതിരോധ സംവിധാനത്തിന്റെ മൂന്നിലൊന്ന് നിലംപൊത്തിയിരിക്കുന്നു എന്നാണ് പുതിയ വിവരങ്ങൾ. ഇറാനുമായുള്ള യുദ്ധത്തിൻ്റെ പശ്ചാത്തലത്തിൽ അമേരിക്കൻ സൈന്യത്തിന്റെ വ്യോമ പ്രതിരോധത്തിന്റെ അവസ്ഥയെക്കുറിച്ച് അമേരിക്കൻ കോൺഗ്രസ് അടുത്തിടെ പ്രസിദ്ധീകരിച്ച ഒരു സമഗ്ര റിപ്പോർട്ടിലാണ് ഈ ഞെട്ടിക്കുന്ന വിവരമുള്ളത്. ഈ റിപ്പോർട്ട് അനുസരിച്ച്, അമേരിക്കക്കാർക്ക് അവരുടെ വ്യോമ പ്രതിരോധ യുദ്ധോപകരണങ്ങളുടെ മൂന്നിലൊന്നാണ് നഷ്ടപ്പെട്ടിരിക്കുന്നത്. അതായത് THAAD – എന്നു പറയുന്ന ടെർമിനൽ ഹൈ ആൾട്ടിറ്റ്യൂഡ് ഏരിയ ഡിഫൻസ് സിസ്റ്റത്തിന് പുറമെ, നിരവധി THAAD റഡാർ സംവിധാനങ്ങളും നശിപ്പിക്കപ്പെട്ടിട്ടുണ്ട്, ഇങ്ങനെ നശിപ്പിക്കപ്പെട്ടത് മാറ്റിസ്ഥാപിക്കാൻ അമേരിക്കയ്ക്ക് കഴിയുന്നുമില്ലന്നതും വ്യക്തമായിയിട്ടുണ്ട്. ഇതിന് പ്രധാന കാരണം അത്തരം മാറ്റിസ്ഥാപിക്കലുകൾക്ക് നിരവധി വർഷങ്ങൾ ആവശ്യമാണ് എന്നുള്ളതാണ്.

ഈ ഒരു അവസ്ഥ, തെക്കൻ പേർഷ്യൻ ഗൾഫിലെ അമേരിക്കൻ സൈനിക താവളങ്ങൾക്ക് വലിയ സുരക്ഷാ ഭീഷണിയാണ് ഉയർത്തിയിരിക്കുന്നത്. നിലവിൽ ഇറാൻ്റെ മിസൈൽ ആക്രമണങ്ങളിൽ നിന്ന് രക്ഷപ്പെടാൻ പ്രതിരോധമില്ലാത്ത അവസ്ഥയിലാണുള്ളത്. ഇതൊരു വല്ലാത്ത അവസ്ഥ തന്നെയാണ്. ഇതിനിടെ, ഇസ്രയേലിലെ വ്യോമ പ്രതിരോധ സംവിധാനങ്ങൾ നിർവീര്യമാക്കിയ ഇറാൻ, ഇപ്പോൾ ശത്രുക്കളുടെ പ്രതിരോധ സംവിധാനങ്ങൾ, മിസൈലുകൾ, റഡാറുകൾ എന്നിവ നിർമ്മിക്കുന്ന ഫാക്ടറികൾ നശിപ്പിക്കുന്നതിലാണ് പ്രധാനമായും ശ്രദ്ധ കേന്ദ്രീകരിച്ചിരിക്കുന്നത്.

വ്യോമ പ്രതിരോധ സംവിധാനങ്ങൾ തകർന്നതോടെ കൂട്ടത്തോടെയാണ് ഇറാൻ്റെ മിസൈലുകൾ ഇപ്പോൾ ഇസ്രയേലിലും അമേരിക്കൻ താവളങ്ങളിലും വീണു കൊണ്ടിരിക്കുന്നത്. അമേരിക്ക പ്രഖ്യാപിച്ച വെടിനിർത്തലിനെ മുഖവിലയ്ക്ക് എടുക്കാതെയാണ് ഇറാൻ ആക്രമണം തുടരുന്നത് എന്നതും ശ്രദ്ധേയമാണ്. സമാധാന ചർച്ച നടക്കുമ്പോൾ തന്നെ, ഇറാൻ പരമോന്നത നേതാവിനെ വധിച്ചതാണ് ഇറാന് അമേരിക്കയിലുള്ള വിശ്വാസം നഷ്ടപ്പെടാൻ കാരണമായിരിക്കുന്നത്. അമേരിക്ക ഇനി കരയുദ്ധത്തിന് വന്നാൽ നേരിടാനായി, വലിയ ശവകുഴികളും, അമേരിക്കൻ സൈനികർക്കായി ഇറാൻ റെഡിയാക്കി നിർത്തിയിട്ടുമുണ്ട്.

അതേസമയം, ആക്രമണം ഒരു വശത്ത് നടക്കുമ്പോൾ തന്നെ, യുദ്ധ കെടുതിക്ക് നഷ്‌ടം ഈടാക്കാന്നുള്ള ശ്രമവും ഇറാൻ ഇപ്പോൾ തുടങ്ങിയിട്ടുണ്ട്. ലോക സമ്പദ്‌വ്യവസ്ഥയുടെ ഹൃദയത്തിൽ നാഡിപോലെ പ്രവർത്തിക്കുന്ന ഒരു കടൽപ്പാതയുണ്ട് ഹോർമൂസ് കടലിടുക്ക്. ലോകത്തിലെ എണ്ണ-വാതക വിതരണത്തിന്റെ ഏകദേശം 20 ശതമാനം കടന്നുപോകുന്ന ഈ ചെറുതായ കടലിടുക്ക്, ഒരു സാധാരണ ജലപാതമല്ല; അത് ആഗോള സാമ്പത്തിക ശക്തിസമവാക്യങ്ങളുടെ നിർണായക കേന്ദ്രമാണ്. ഇന്നത് വീണ്ടും ലോകത്തിന്റെ ശ്രദ്ധാകേന്ദ്രമായിരിക്കുന്നത്, അവിടെ ഉയർന്നുവരുന്ന സംഘർഷങ്ങളും നിയന്ത്രണങ്ങളും കൊണ്ടാണ്.

ഇറാൻ ഈ പാതയിൽ ഏർപ്പെടുത്തിയ നിയന്ത്രണങ്ങൾ, ഒരു താൽക്കാലിക സൈനിക നീക്കമെന്നതിലുപരി, ഒരു ദീർഘകാല ഭൗമരാഷ്ട്രീയ തന്ത്രത്തിന്റെ ഭാഗമായാണ് പല നിരീക്ഷകരും കാണുന്നത്. പാശ്ചാത്യ രാജ്യങ്ങളുടെ ഉപരോധങ്ങളും സമ്മർദ്ദങ്ങളും നേരിടുന്ന സാഹചര്യത്തിൽ, സ്വന്തം ഭൗമസ്ഥിതി ഒരു ആയുധമായി ഉപയോഗിക്കുന്ന രീതിയാണ് ഇറാൻ സ്വീകരിച്ചിരിക്കുന്നത്. കടലിടുക്കിലൂടെ കടന്നുപോകുന്ന കപ്പലുകളെ നിയന്ത്രിക്കുകയും, അവർക്കു സുരക്ഷ ഉറപ്പാക്കുന്നതിന്റെ പേരിൽ ഒരു തരത്തിലുള്ള “ടോൾ ബൂത്ത്” സംവിധാനം നടപ്പിലാക്കുകയും ചെയ്തതോടെ, ഈ പ്രദേശം ഒരു സാമ്പത്തിക സമ്മർദ്ദ കേന്ദ്രമായി മാറിയിരിക്കുന്നു.

ഈ സംവിധാനത്തിന്റെ പ്രവർത്തനം വളരെ കൃത്യവും സങ്കീർണ്ണവുമാണ്. കപ്പലുകൾക്ക് കടന്നുപോകാൻ മുൻകൂർ അനുമതി ആവശ്യമാണ്; അവരുടെ ചരക്ക്, യാത്രാമാർഗം, ജീവനക്കാരുടെ വിവരങ്ങൾ എന്നിവ പരിശോധിച്ച ശേഷമാണ് പ്രവേശനം അനുവദിക്കുന്നത്. ഈ പ്രക്രിയയിൽ ഇറാന്റെ ഇസ്ലാമിക് റവല്യൂഷണറി ഗാർഡ് കോർപസ് പ്രധാന പങ്കുവഹിക്കുന്നു. അനുമതി ലഭിച്ച കപ്പലുകൾക്ക് പ്രത്യേക കോഡുകളും നിർദ്ദിഷ്ട പാതകളും നൽകപ്പെടുന്നു, അതുവഴി അവയെ നിയന്ത്രിതമായി കടത്തിവിടുന്നു. ഈ നിയമങ്ങൾ പാലിക്കാത്ത കപ്പലുകൾക്ക് തടസ്സങ്ങളും തിരിച്ചയക്കലുകളും നേരിടേണ്ടി വരുന്നു.

ഇതിന്റെ ഫലമായി, ലോക വ്യാപാര വ്യവസ്ഥയിൽ വലിയ തിരിച്ചടിയാണ് ഉണ്ടായിരിക്കുന്നത്. ഹോർമുസ് വഴിയുള്ള ഗതാഗതം തടസ്സപ്പെട്ടതോടെ ആയിരക്കണക്കിന് കപ്പലുകൾ കടലിൽ കുടുങ്ങിക്കിടക്കുകയാണ്. എണ്ണവില കുത്തനെ ഉയർന്നതോടെ, ഇതിനകം തന്നെ നിസ്സഹായാവസ്ഥയിലായിരുന്ന ആഗോള സമ്പദ്‌വ്യവസ്ഥ കൂടുതൽ സമ്മർദ്ദത്തിലായി. പല രാജ്യങ്ങളിലും ഇന്ധനവില വർധിച്ചതോടെ സാധാരണ ജനങ്ങളുടെ ജീവിതച്ചെലവ് ഉയർന്നിട്ടുണ്ട്. ചില രാജ്യങ്ങൾ ഇന്ധന റേഷനിങ് നടപ്പിലാക്കുകയും വ്യവസായ ഉൽപാദനം കുറയ്ക്കുകയും ചെയ്തിട്ടുണ്ട്.

ഈ സാഹചര്യത്തിൽ ഇറാന്റെ നിലപാട് വ്യത്യസ്തമായ ഒരു വാദം മുന്നോട്ടുവയ്ക്കുന്നു. അവരുടെ കാഴ്ചപ്പാടിൽ, സ്വന്തം സമുദ്ര അതിർത്തിയിലൂടെ കടന്നുപോകുന്ന കപ്പലുകൾക്ക് സുരക്ഷ നൽകുന്നതിനായി ഫീസ് ഈടാക്കുന്നത് അസാധാരണമല്ല. കൂടാതെ, യുദ്ധസാഹചര്യത്തിൽ ദേശീയ സുരക്ഷ ഉറപ്പാക്കാൻ നിയന്ത്രണങ്ങൾ അനിവാര്യമാണെന്ന വാദവും അവർ ഉന്നയിക്കുന്നു. അന്താരാഷ്ട്ര നിയമങ്ങളായ UNCLOS സംബന്ധിച്ച വ്യാഖ്യാന വ്യത്യാസങ്ങളും ഇവിടെ വലിയ വിവാദങ്ങൾക്ക് ഇടയാക്കുന്നു. ഇറാൻ ഈ കരാറിൽ ഒപ്പുവെച്ചിട്ടുണ്ടെങ്കിലും, അതിന്റെ നിയമബാധ്യതയെക്കുറിച്ച് അവർക്ക് വ്യത്യസ്തമായ നിലപാടാണ്.

അതേസമയം, ലോകത്തിന്റെ പ്രതികരണം ശക്തമാണ്. ചില രാജ്യങ്ങളും അന്താരാഷ്ട്ര സംഘടനകളും ഈ നടപടിയെ “സാമ്പത്തിക സമ്മർദ്ദം” എന്നും ചിലർ “സാമ്പത്തിക ഭീഷണി” എന്നും വിശേഷിപ്പിക്കുന്നു. എന്നാൽ മറ്റുചിലർ ഇത് ഒരു പ്രതിരോധ തന്ത്രമായി കാണുന്നത് ഒരു രാജ്യത്തിന് നേരിടേണ്ടിവരുന്ന ഉപരോധങ്ങൾക്കും സൈനിക സമ്മർദ്ദങ്ങൾക്കും നൽകിയ മറുപടിയായിട്ടാണ്. ഈ വ്യത്യസ്ത വിലയിരുത്തലുകൾ തന്നെ, ഇന്നത്തെ ലോക രാഷ്ട്രീയത്തിന്റെ സങ്കീർണ്ണത വ്യക്തമാക്കുന്നു.

ഹോർമുസ് കടലിടുക്ക് ഇന്ന് ഒരു സാധാരണ ജലപാതമല്ല; അത് ഒരു ഭൗമരാഷ്ട്രീയ ആയുധമാണ്. ഇവിടെ നടക്കുന്ന ഓരോ നീക്കവും ലോക വിപണികളെ സ്വാധീനിക്കുന്നു, രാജ്യങ്ങളുടെ നയതന്ത്ര നിലപാടുകൾ മാറ്റുന്നു, സാധാരണ ജനങ്ങളുടെ ജീവിതത്തെയും ബാധിക്കുന്നു. ഈ പ്രശ്നത്തിന് ദീർഘകാല പരിഹാരം കണ്ടെത്താൻ നയതന്ത്ര സംഭാഷണങ്ങളും സഹകരണവും അനിവാര്യമാണ്. ഇല്ലെങ്കിൽ, ഈ ചെറിയ കടലിടുക്ക് തന്നെ ആഗോള സമ്പദ്‌വ്യവസ്ഥയെ കുലുക്കുന്ന ഒരു വലിയ ശക്തിയായി തുടരുമെന്നതിൽ സംശയമില്ല.

EXPRESS VIEW

NB: ഈ വാർത്തയിൽ ഉപയോഗിച്ചിരിക്കുന്ന ചിത്രം പ്രതീകാത്മകമാണ്. (Generated by AI)

വീഡിയോ കാണാം…

The post യുദ്ധം ഇറാന് വൻ നേട്ടമാകുന്നു, അമേരിക്കയുടെ താഡ് സംവിധാനങ്ങൾ പരക്കെ തകർന്നു, ചുങ്കം വഴിയും നേട്ടം appeared first on Express Kerala.