എടയാർ തീപിടിത്തം! നോട്ടീസ് നൽകിയിട്ടും ‘കോയിൽ ടെസ്റ്റിങ്’ നടത്തിയില്ല; സിജി ലൂബ്രിക്കന്റ്സ് അടച്ചുപൂട്ടാൻ ഉത്തരവ്

എടയാറിലെ സിജി ലൂബ്രിക്കൻസ് എന്ന കരിഓയിൽ കമ്പനിയിലുണ്ടായ തീപിടിത്തത്തിന് കാരണം മാനേജ്മെന്റിന്റെ ഭാഗത്തുനിന്നുണ്ടായ ഗുരുതരമായ സുരക്ഷാവീഴ്ചയാണെന്ന് ഫാക്ടറീസ് ആൻഡ് ബോയ്‌ലർസ് വിഭാഗം നടത്തിയ പരിശോധനയിൽ കണ്ടെത്തി. കമ്പനിയിൽ വർഷം തോറും നിർബന്ധമായും നടത്തേണ്ട ‘കോയിൽ ടെസ്റ്റിങ്’ കൃത്യസമയത്ത് പൂർത്തിയാക്കാത്തതാണ് അപകടത്തിലേക്ക് നയിച്ച പ്രധാന കാരണമായി ചൂണ്ടിക്കാണിക്കപ്പെടുന്നത്.

കഴിഞ്ഞ വർഷം ഡിസംബർ 26-നകം ഈ പരിശോധന നടത്തണമെന്ന് കാട്ടി അധികൃതർ നോട്ടീസ് നൽകിയിരുന്നെങ്കിലും മൂന്ന് മാസം പിന്നിട്ടിട്ടും കമ്പനി ഇത് നടപ്പിലാക്കിയിരുന്നില്ല. ഈ ഗുരുതരമായ വീഴ്ചയെത്തുടർന്ന് പ്ലാന്റിന് പ്രവർത്തന അനുമതി നിഷേധിക്കുകയും സ്ഥാപനം ഉടനടി അടച്ചുപൂട്ടാൻ ഫാക്ടറീസ് ആൻഡ് ബോയ്‌ലർസ് ഡിപ്പാർട്ട്മെന്റ് ഉത്തരവിടുകയും ചെയ്തു. അന്തിമ റിപ്പോർട്ട് സമർപ്പിക്കുന്നതോടെ കമ്പനിക്കെതിരെ പ്രോസിക്യൂഷൻ ഉൾപ്പെടെയുള്ള കടുത്ത നിയമനടപടികൾ ഉണ്ടാകുമെന്നാണ് സൂചന.

Also Read:കേരളത്തിൽ കനത്ത ചൂട് തുടരുന്നു; 12 ജില്ലകളിൽ യെല്ലോ അലർട്ട്, പാലക്കാട് താപനില 40 ഡിഗ്രിയിലേക്ക്!

മാർച്ച് 26-ന് രാത്രി ഒമ്പത് മണിയോടെ ഉണ്ടായ തീപിടിത്തത്തിൽ ദാരുണമായി കൊല്ലപ്പെട്ടത് കഴിഞ്ഞ 22 വർഷമായി കേരളത്തിൽ താമസിച്ചിരുന്ന ബീഹാർ സ്വദേശി ശത്രുഘ്നനാണ്. പ്ലാന്റിനുള്ളിൽ തീ പടർന്നപ്പോൾ മറ്റുള്ളവർ ഓടി രക്ഷപ്പെട്ടെങ്കിലും, അപകടം ഒഴിവാക്കാൻ വാൽവ് ഓഫാക്കാനായി അകത്തേക്ക് കയറിയ ശത്രുഘ്നൻ അകത്ത് കുടുങ്ങിപ്പോകുകയായിരുന്നു. മരിച്ച തൊഴിലാളിയുടെ കുടുംബത്തിന് അഞ്ച് ലക്ഷം രൂപ ധനസഹായം നൽകാൻ ജില്ലാ കളക്ടർ നിർദ്ദേശിച്ചിട്ടുണ്ട്. കൂടാതെ, ഇദ്ദേഹത്തിന്റെ മക്കളുടെ പഠനച്ചെലവ് കമ്പനി ഏറ്റെടുക്കണമെന്നും ശത്രുഘ്നന്റെ ഭാര്യയ്ക്ക് താല്പര്യമുണ്ടെങ്കിൽ കമ്പനിയിൽ തന്നെ ജോലി നൽകണമെന്നും കളക്ടർ ആവശ്യപ്പെട്ടു.

നേരത്തെയും വിവാദങ്ങളിൽ അകപ്പെട്ട സ്ഥാപനമാണ് എടയാറിലെ ഈ സിജി ലൂബ്രിക്കന്റ്സ്. പുഴയിലേക്ക് മലിനജലം ഒഴുക്കിയതിന് മലിനീകരണ നിയന്ത്രണ ബോർഡ് മുൻപ് ഈ കമ്പനിക്ക് പിഴ ചുമത്തിയിട്ടുണ്ട്. പരിസ്ഥിതി നിയമങ്ങളും സുരക്ഷാ മാനദണ്ഡങ്ങളും നിരന്തരമായി ലംഘിച്ച പശ്ചാത്തലത്തിൽ പ്ലാന്റിനെതിരെ കർശനമായ അന്വേഷണമാണ് ഇപ്പോൾ നടക്കുന്നത്.

The post എടയാർ തീപിടിത്തം! നോട്ടീസ് നൽകിയിട്ടും ‘കോയിൽ ടെസ്റ്റിങ്’ നടത്തിയില്ല; സിജി ലൂബ്രിക്കന്റ്സ് അടച്ചുപൂട്ടാൻ ഉത്തരവ് appeared first on Express Kerala.