യുഎഇയിൽ വരും ദിവസങ്ങളിലും അസ്ഥിര കാലാവസ്ഥ! ഏപ്രിൽ ആദ്യവാരം വരെ മഴയ്ക്ക് സാധ്യത

യുഎഇയിൽ വരും ദിവസങ്ങളിൽ കാലാവസ്ഥ അസ്ഥിരമായി തുടരുമെന്നും ഏപ്രിൽ ഒന്ന് വരെ മഴയ്ക്ക് സാധ്യതയുണ്ടെന്നും ദേശീയ കാലാവസ്ഥാ നിരീക്ഷണ കേന്ദ്രം അറിയിച്ചു. നാളെ മുതൽ താപനിലയിൽ പ്രകടമായ കുറവുണ്ടാകുമെന്നാണ് റിപ്പോർട്ട്. വടക്കുപടിഞ്ഞാറൻ കാറ്റ് ശക്തമാകുന്നതോടെ ചിലയിടങ്ങളിൽ പൊടിപടലങ്ങൾ ഉയരാനും കാഴ്ചപരിധി കുറയാനും സാധ്യതയുണ്ട്. ചൊവ്വാഴ്ച രാജ്യത്തിന്റെ വിവിധ ഭാഗങ്ങളിൽ മഴ ലഭിക്കുമെന്നും ബുധനാഴ്ചയോടെ വടക്കൻ, കിഴക്കൻ മേഖലകളിൽ ശക്തമായ മഴയ്ക്ക് സാധ്യതയുണ്ടെന്നും അധികൃതർ മുന്നറിയിപ്പ് നൽകി.

അബുദാബിയിലും ദുബായിലും കനത്ത ജാഗ്രതാ നിർദ്ദേശങ്ങളാണ് പുറപ്പെടുവിച്ചിരിക്കുന്നത്. അബുദാബിയിലെ പ്രധാന റോഡുകളിൽ വേഗതപരിധി മണിക്കൂറിൽ 100 കിലോമീറ്ററായി കുറച്ചു. വാദികൾക്ക് സമീപം പോകരുതെന്നും ദൃശ്യങ്ങൾ പകർത്താൻ ശ്രമിക്കരുതെന്നും പൊലീസ് കർശന നിർദ്ദേശം നൽകി. ദുബായിൽ വെള്ളക്കെട്ട് ഒഴിവാക്കാൻ ആർടിഎ പ്രത്യേക സംഘങ്ങളെ വിന്യസിച്ചിട്ടുണ്ട്. അസ്ഥിര കാലാവസ്ഥയെത്തുടർന്ന് അബുദാബിയിലേക്കുള്ള ഇ101 ബസ് സർവീസുകളിൽ ക്രമീകരണം ഏർപ്പെടുത്തിയിട്ടുണ്ട്.

Also Read: പശ്ചിമേഷ്യ കത്തുന്നു! ഒമാനിലും സൗദിയിലും ഇറാന്റെ മിന്നലാക്രമണം

ഷാർജ ഉൾപ്പെടെയുള്ള മറ്റ് എമിറേറ്റുകളിലും പ്രതിരോധ പ്രവർത്തനങ്ങൾ ശക്തമാണ്. ഷാർജയിൽ സ്വകാര്യ മേഖലയിലെ ജീവനക്കാർക്ക് നേരത്തെ ജോലി കഴിഞ്ഞ് മടങ്ങാനോ വീട്ടിലിരുന്ന് ജോലി ചെയ്യാനോ അനുവാദം നൽകണമെന്ന് പൊലീസ് നിർദ്ദേശിച്ചു. അജ്മാൻ, ഫുജൈറ, റാസൽഖൈമ എന്നിവിടങ്ങളിൽ റോഡുകളിലെ വെള്ളക്കെട്ട് നീക്കം ചെയ്യാൻ മുനിസിപ്പാലിറ്റി അധികൃതർ 24 മണിക്കൂറും സജീവമായി രംഗത്തുണ്ട്. കടലിൽ പോകുന്നവരും വാഹനയാത്രക്കാരും അതീവ ജാഗ്രത പാലിക്കണമെന്ന് അധികൃതർ ആവർത്തിച്ചു.

കെട്ടിക്കിടക്കുന്ന വെള്ളത്തിൽ കൊതുകുകൾ വളരാൻ സാധ്യതയുള്ളതിനാൽ ജാഗ്രത പാലിക്കണമെന്ന് പരിസ്ഥിതി മന്ത്രാലയം അറിയിച്ചു. വരും ദിവസങ്ങളിൽ താപനില കുറയാൻ സാധ്യതയുള്ളതിനാൽ വടക്കൻ, കിഴക്കൻ മേഖലയിലുള്ളവർ കൂടുതൽ ശ്രദ്ധിക്കണം. കാലാവസ്ഥാ വ്യതിയാനങ്ങൾ നിരീക്ഷിക്കാൻ എമർജൻസി ആൻഡ് ഡിസാസ്റ്റർ മാനേജ്‌മെന്റ് ടീമുകൾ സജ്ജമാണെന്നും അധികൃതർ വ്യക്തമാക്കി.

The post യുഎഇയിൽ വരും ദിവസങ്ങളിലും അസ്ഥിര കാലാവസ്ഥ! ഏപ്രിൽ ആദ്യവാരം വരെ മഴയ്ക്ക് സാധ്യത appeared first on Express Kerala.